اباي وبلىسىنىڭ سەمەي قالاسىندا 4 شىلدە كۇنى سۋ جاعاسىندا بالىق اۋلاپ وتىرعان جاسوسپىرىمگە بىرنەشە ادام شابۋىل جاساپ, سوققىعا جىققان, دەپ حابارلايدى Egemen.kz.
زارداپ شەككەن بالا اۋىر جاراقات الىپ, بىرنەشە دەنە جاراقاتى مەن سۇيەك سىنۋى دياگنوزىمەن مەديتسينالىق مەكەمەگە جەتكىزىلگەن.
اباي وبلىسىنىڭ بالا قۇقىقتارى جونىندەگى ۋاكىلى ەلزيرا سولتاباەۆانىڭ ايتۋىنشا, قازىرگى تاڭدا قر قك 107-بابى (دەنساۋلىققا قاساقانا ورتاشا اۋىرلىقتاعى زيان كەلتىرۋ) بويىنشا قىلمىستىق ءىس قوزعالدى. سونىمەن قاتار, سوت-مەديتسينالىق ساراپتاما تاعايىندالعان.
«مەن بالانىڭ اناسىمەن بايلانىستامىن. قازىر ولارعا پسيحولوگيالىق قولداۋ ورتالىعىنىڭ كومەگى ۇسىنىلدى», – دەدى وڭىرلىك ومبۋدسمەن Instagram پاراقشاسىندا.
ەلزيرا سولتاباەۆا جابىرلەنۋشى تاراپپەن تىكەلەي بايلانىستا ەكەنىن, قازىرگى ۋاقىتتا بالانىڭ جاعدايى باقىلاۋدا ەكەنىن ايتتى.
ول «مۇنداي جاعدايلار بالانىڭ پسيحيكاسىنا اۋىر اسەر ەتۋى مۇمكىن, سوندىقتان كاسىبي پسيحولوگتار كومەگى وتە ماڭىزدى» ەكەنىن ەرەكشە اتاپ ءوتتى.