بۇگىن وسكەمەندە ۇلتتىق دومبىرا كۇنى مەن سۋ شارۋاشىلىعى قىزمەتكەرلەرىنىڭ كاسىبي مەرەكەسى قاتار اتالىپ ءوتتى. بۇل كۇن ونەر مەن ەڭبەكتى ۇندەستىرەتىن ەرەكشە ءسات ەدى, دەپ حابارلايدى Egemen.kz.
ەرتىس بويىنداعى «سامال» ساياباعىنان باستالعان كەمەلەر شەرۋى اعىسقا قارسى ءجۇزىپ, كەمەجايعا دەيىن جەتتى. مۇندا جينالعان قالالىقتار مەن قالا قوناقتارى قايىقتاردىڭ سۋ بەتىندە ويقاستاعانىن كورىپ, تاڭ-تاماشا بولدى. كوك تۋدى جەلبىرەتكەن كەمەلەردىڭ بىرىنە اقساقالدار مەن اق جاۋلىقتى كەيۋانالار مىنسە, ەندى بىرىنە كۇي كۇمبىرلەتكەن دومبىراشىلار جايعاسقان. ءسويتىپ, ىركەس-تىركەس ەرتىسپەن ءجۇزىپ ءوتتى. ادىر بەلدەردىڭ ورتاسىنان قونىس تەپكەن وسكەمەندى قاق جارىپ, ەرتىس اقسا, وعان باتىس التايدان ارقىراپ-سارقىراپ باستاۋ العان ءۇلبى قوسىلادى. وسىنداي ەرەكشە شاھاردا سۋ جولىن دامىتسا, سۇرانىس جوق ەمەس. ءتىپتى, وزگە دە قالالاردان سۋ ترامۆايىن قىزىقتاپ كەلەتىن مەيماندار از ەمەس.
– جاز شىقسا, بالا-شاعامىزبەن قايىققا ءمىنىپ, اناۋ گەس-كە دەيىن قىدىرىپ قايتامىز. سۋلى قالادا تۇرىپ, مۇنداي سەرۋەننىڭ بارى زاڭدى دا. ايتپەسە, جاساندى وزەننەن وكىرتىپ پايدا تاۋىپ وتىرعان قالالاردى دا بىلەمىز. ونىڭ قاسىندا بىزدىكى قولدا بار بايلىق, – دەيدى وسكەمەن قالاسىنىڭ تۇرعىنى ساقىپ باسەنوۆا.
بۇگىنگى ەرەكشە شاراعا وبلىس باسشىسى نۇرىمبەت ساقتاعانوۆ تا كەلىپ قاتىستى. ول كۇي كۇمبىرىن اۋەلەتىپ جۇرگەن جاس دومبىراشىلارعا جۇرەكجاردى تىلەگىن ايتتى.
– بۇگىن ءبىز حالقىمىزدىڭ رۋحاني بايلىعىن جانە تاريحى مەن ءداستۇرىنىڭ اجىراماس بايلانىسىن بىلدىرەتىن ەرەكشە مەرەكە – ۇلتتىق دومبىرا كۇنىن اتاپ ءوتىپ وتىرمىز. دومبىرا – جاي عانا مۋزىكالىق اسپاپ ەمەس, بۇل – ۇرپاقتار ساباقتاستىعىنىڭ سيمۆولى, وتكەن مەن بۇگىندى, بولاشاقتى جالعايتىن مۇرا. وسى اسىل مۇرا جاستارىمىزدى شابىتتاندىرىپ, مادەني بولمىسىمىزدى نىعايتىپ, ءبىزدى ۇلى مۇرامىزدى ماقتانىشپەن بولاشاققا جەتكىزۋگە ۇندەي بەرسىن! – دەدى وبلىس اكىمى نۇرىمبەت ساقتاعانوۆ.
بۇل اۋقىمدى شارا سوڭعى 40 جىلدا وڭىردەگى كەمە قاتىناسى سالاسىندا العاش رەت وتكىزىلىپ وتىر. ايماق باسشىسى ايتقانداي, سۋ رەسۋرستارىنا باي شىعىس قازاقستاندا كەمە قاتىناسى قايتا جاندانىپ, سەرپىندى دامىپ كەلەدى. بۇگىنگى اۋقىمدى شارا سونىڭ دالەلى.
– كەلەر جىلى ءبىز بۇل پارادقا وزگە وبلىستار مەن شەكارا ماڭى مەملەكەتتەرىنەن دە قاتىسۋشىلاردى شاقىرامىز. ويتكەنى, ەرتىس وزەنى مەن ونىڭ اكۆاتورياسى بۇعان تولىق مۇمكىندىك بەرەدى, – دەدى وبلىس اكىمى نۇرىمبەت ساقتاعانوۆ.
پارادقا «قازاقستان سۋ جولدارى» كومپانياسىنىڭ «بولات كارەنتاەۆ», «التاي», «كس-111» سەكىلدى تەپلوحودتارى, «BELALEKS» جانە شقو تجد كاتەرلەرى قاتىستى. سونىمەن قاتار, گيدروتسيكل يەلەرى دە بەلسەنە اتسالىستى.
وسكەمەن