كەيىپكەرىمىز الەكساندر شوربان قوس ىشەكتى دومبىرامەن سىرلاسقاندى ۇناتادى. بۇگىندە جان سەرىگىن قولىنا العان. كوڭىلى تەڭىزدىڭ اقباس تولقىندارى ءتارىزدى الاساپىران. ساعىنىش كۇيى. كىر جۋىپ, كىندىك كەسكەن توپىراعىنا دەگەن پەرزەنتتىك پەيىل.
الەكساندر – جارقايىڭ اۋدانىنىڭ تۋماسى. وسىنداعى ورتا مەكتەپتى بىتىرگەن. دومبىراعا نەلىكتەن ءۇيىر بولعانىن قازىر ءوزى دە تاپ باسىپ ايتا المايدى. بالالار مۋزىكا مەكتەبىنە الدەبىر قۇدىرەت جەتەكتەپ اكەلگەن. بىردەن باۋىر باسىپ كەتتى. شەشەن دومبىرا كۇمبىرلەپ سويلەگەن سايىن كوكىرەگىندەگى ادەمى سەزىمدەرمەن استاسىپ جاتقانداي كورىنەتىن. كۇي تاريحى تۋرالى الىپپە ىسپەتتى اجارلى اڭگىمەنى وسى مەكتەپتە ەستىپ-بىلگەن. مىڭ سان ءان-اۋەن, قوس ىشەكتەن توگىلەتىن قۇدىرەتتى سازدىڭ استارىندا كونە تاريحتىڭ كومبەسى بۇعىپ جاتىر ەكەن-اۋ. الەكساندرعا سايىن دالا توسىندە سارى ساعىممەن جارىسىپ قۇلديلاي جۇيتكيتىن تۇلپارلاردىڭ ءدۇبىرى, ايدىن كول ۇستىندەگى اققۋ-قازدىڭ سۇڭقىلداعان ءۇنى كەرەمەت اسەر بەرەتىن. جانىنان دومبىراسىن تاستامايتىن بولدى. اقسەلەۋلى دارقان دالانىڭ سارىنى ەستىلسە, دومبىراعا كوشىرىپ العىسى كەلىپ تۇراتىن. جالاۋلى جاسىل دۇنيە كۇي بولىپ تۇرعانداي سەزىلەتىن.
تاعدىر جولى سان قيلى الەكساندر قازىر رەسەيدىڭ كراسنودار قالاسىندا تۇرادى. وسى قالاداعى مەملەكەتتىك مادەنيەت يننستيتۋتىن بىتىرگەن. جوعارى وقۋ ورنىندا وقىپ جۇرگەندە وزگە دە اسپاپتاردى بىرتىندەپ مەڭگەرىپ ويناپ كوردى. ءبارىبىر دومبىرانىڭ ءۇنى بەبەۋلەپ تۇرادى ەكەن. وزگە اسپاپ قانشا شەشەن بولسا دا قوس ىشەكتىڭ قۇدىرەتىنە سىنىق سۇيەم جەتپەيتىندەي.
– دومبىرانىڭ ۇنىندە ادام جانىن باۋرايتىن, تىلمەن جەتكىزە المايتىنداي الاپات كۇش بار, – دەيدى الەكساندر, – مەنىڭ جانىمدى تەبىرەنتەتىن دە سول عوي. التايدان اتىراۋعا دەيىنگى شەكسىز قازاق دالاسىن, ونىڭ ىشىندە ساعىنىش وتى مازداپ تۇراتىن جارقايىڭنىڭ جالپاق جونىن ساعىنعاندا قولىما دومبىرا الىپ كۇي تارتامىن. كادىمگىدەي ۋاتادى. سارىتاپ ساعىنىش تۇنعان اۋەن ىشىندە تەبىرەنىپ, تەربەلىپ جۇرگەن كەزىمدە جارقايىڭنىڭ عاجاپ سۋرەتى كوز الدىما كەلەدى. جۇرەكتىڭ باسىنداعى كىلكىگەن مۇڭدى سامال جەلدىڭ لەبىندەي ىدىراتىپ تارقاتىپ جىبەرەدى. كوڭىل كوكتەمدەي قۇلپىرادى. ءوزىم جەتە الماسام دا اقشا بۇلتتارمەن استاسىپ دومبىرامنىڭ ءۇنى جەتە مە دەپ ويلايمىن.
كەيىپكەرىمىزدىڭ ايتۋىنا قاراعاندا, كۇي تولقىنى مەن اكەسىنىڭ قاراشاڭىراعى, بالالىق شاعى وتكەن تانىس كوشەلەرى, تاي-ق ۇلىنداي تەبىسىپ وسكەن قۇربىلارى كوڭىل تورىنەن شىقپايدى ەكەن. تاعى ءبىر ايتقانى, ءماندى مادەنيەت پەن ورەلى ونەر – ەل ىشىندەگى ىرىستى ىنتىماقتىڭ ءتىنىن بەكىتەتىن ۇلى كۇش. سول كۇشتى ادامداردىڭ كوكىرەگىنە دارىتىپ, قۋات بەرىپ تۇرعان ماڭگىلىك مۇرا دەپ ەسەپتەيدى.
قازاق دالاسىندا دومبىرا كۇنى اتالىپ وتەتىندىگىن ەستىگەن. ەل تاريحى, وتكەنى مەن باستان كەشكەن نەبىر ۇلى وقيعالار كۇي تىلىنە كوشىپ, كەيىنگى ۇرپاقتىڭ سۇيەگىنە ءسىڭىپ جاتىر. ەستىگەن ساتتە اق تۇيەنىڭ قارنى جارىلعانداي قۋانعان. دومبىرانىڭ قۇدىرەتىن التى الاشتىڭ بالاسى تۇگىلى, ءوزى دە مويىنداپ جان سەرىگىنە اينالدىرىپ كەلەدى ەمەس پە.
اقمولا وبلىسى,
جارقايىڭ اۋدانى