سەنات دەپۋتاتتارىنىڭ وڭىرلەرگە ساپارى جالعاسىن تاپتى. كەشە ولار جەرگىلىكتى سايلاۋشىلارمەن كەزدەسىپ, ايماقتى الاڭداتقان احۋالمەن تانىستى. سونداي-اق ماڭىزى جوعارى ءىس-شاراعا قاتىسىپ, ءسوز سويلەدى.
«رۋحاني ديپلوماتيا مەن الەمدىك جانە ءداستۇرلى دىندەردىڭ قاسيەتتى مۇراسىن ساقتاۋ» اتتى حالىقارالىق كونفەرەنتسيادا سەنات دەپۋتاتى دارحان قىدىرالى ءتۇرلى سەنىمدەر اراسىنداعى ديپلوماتيانىڭ رولىنە توقتالدى. ءدىني كونفەسسيالار, عىلىمي قاۋىمداستىق, ديپلوماتيالىق توپتار جانە ازاماتتىق سەكتوردىڭ وكىلدەرى دىنارالىق ديالوگ سالاسىنداعى سىن-قاتەردى, سونداي-اق جاھاندىق بەيبىتشىلىك پەن ءوزارا تۇسىنىستىكتى نىعايتۋداعى كەلىسىم مەن سەنىمنىڭ ماڭىزىن تالقىلادى. كونفەرەنتسيادا ءسوز سويلەگەن د.قىدىرالى استانادا وتەتىن الەمدىك جانە ءداستۇرلى دىندەر كوشباسشىلارىنىڭ VIII سەزى قارساڭىنداعى كەزدەسۋدىڭ ەرەكشە ءمانى بار ەكەنىن اتاپ ءوتتى.
«پرەزيدەنت دىنارالىق ديالوگكە, كەلىسىم مەن ءوزارا تۇسىنىستىككە ەرەكشە ءمان بەرەدى. بۇل باعىتتا الەمدىك جانە ءداستۇرلى دىندەر كوشباسشىلارى سەزىنىڭ حاتشىلىعى مەن پارلامەنت سەناتى تاراپىنان اۋقىمدى جۇمىس اتقارىلىپ جاتىر. مۇسىلمان اقساقالدار كەڭەسىنىڭ قىزمەتى دە ەلىمىزدىڭ رۋحاني ديپلوماتيا سالاسىنداعى باعىت-باعدارىمەن ۇندەس. وزگەرمەلى الەمدە رۋحاني باعدارلار مەن قاسيەتتى مۇرالاردى ساقتاۋ ماڭىزدى», دەدى د.قىدىرالى.
2 شىلدەدە سەناتورلار نۇرتورە ءجۇسىپ پەن التىنبەك نۇح ۇلى ءال-فارابي اتىنداعى قازۇۋ وقىتۋشىلارىمەن كەزدەستى. ن.ءجۇسىپ جوعارى وقۋ ورنىنىڭ باسشىلىعىمەن اڭگىمە بارىسىندا ءال-فارابي اتىنداعى قازاق ۇلتتىق ۋنيۆەرسيتەتى قازىرگى زامانعى وتاندىق جوعارى ءبىلىم مەن عىلىم جۇيەسىن قالىپتاستىرۋدا شەشۋشى ءرول اتقاراتىن ورتالىق ازياداعى ەڭ كونە جانە جەتەكشى جوعارى وقۋ ورىندارىنىڭ ءبىرى ەكەنىن اتاپ ءوتتى.
«بۇگىندە جاھاندىق سىن-قاتەرلەر مەن قارقىندى وزگەرىپ جاتقان الەم جاعدايىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ ماڭىزى ارتا ءتۇستى. بۇل – جاي عانا ءبىلىم بەرۋ مەكەمەسى ەمەس, ءبىلىم ۇدەتۋدەگى ۇلتتىڭ ستراتەگيالىق رەسۋرسى, جاڭا بۋىن كوشباسشىلارىن تاربيەلەۋ جانە حالىقارالىق ارەنادا ەلىمىزدىڭ كەلبەتىن ىلگەرىلەتۋ ورتالىعى. ۋنيۆەرسيتەتتى قولداۋ جانە دامىتۋ, ونىڭ دەربەستىگىن نىعايتۋ, حالىقارالىق ارىپتەستىكتى كەڭەيتۋ, ەلىمىزدىڭ تۇكپىر-تۇكپىرىنەن جانە شەتەلدەن تالانتتى جاستاردىڭ اعىنىن قامتاماسىز ەتۋ – مەملەكەتتىڭ اسا ماڭىزدى مىندەتى», دەدى ن.ءجۇسىپ.
دەپۋتات ا.نۇح ۇلى ءوز كەزەگىندە قازۇۋ ءۇش دەڭگەيلى ءبىلىم جۇيەسىن ەنگىزۋدەگى باستاماشىنىڭ ءبىرى ەكەنىن اتاپ ءوتتى.
«قازۇۋ تەك وقىتىپ قويماي, ۇلت ەليتاسىن قالىپتاستىرادى. پارلامەنت دەپۋتاتتارىنىڭ 25%-دان استامى, ونداعان اكىمدەر, مينيسترلەر, عالىمدار, ديپلوماتتار مەن قوعام قايراتكەرلەرى – ءال-فارابي اتىنداعى ۋنيۆەرسيتەتتىڭ تۇلەكتەرى», دەدى ا.نۇح ۇلى.
كەشە سەنات دەپۋتاتتارى بيبىگۇل جەكسەنباي, مارات قوجاەۆ جانە گەننادي شيپوۆسكيح ەلورداداعى ۇلتتىق بالالاردى وڭالتۋ ورتالىعى مەن قالالىق پسيحيكالىق دەنساۋلىق ورتالىعىندا بولدى. كەزدەسۋ بارىسىندا مەملەكەت باسشىسىنىڭ ەلىمىزدە جۇرگىزىلىپ جاتقان الەۋمەتتىك رەفورمالارعا قاتىستى تاپسىرمالارى تۋرالى جان-جاقتى ايتىپ بەردى جانە پارلامەنتتىڭ اعىمداعى زاڭ شىعارۋ قىزمەتى مەن باستامالارى بويىنشا قابىلدانعان زاڭداردىڭ ەرەجەلەرىن ءتۇسىندىردى.
ال سەناتورلار ولگا بۋلاۆكينا مەن شاكارىم بۇقتۇعۇتوۆ شىعىس قازاقستان وبلىسىنىڭ سامار جانە كۇرشىم اۋداندارىندا الەۋمەتتىك جانە ينفراقۇرىلىمدىق جوبالاردى جۇزەگە اسىرۋ بارىسىمەن تانىستى.
«باسىم مىندەتتىڭ ءبىرى – اۋىل بالالارىنا ساپالى ءبىلىم بەرۋ. اۋىلدى سوزبەن ەمەس, ناقتى جوبالار ارقىلى دامىتۋ كەرەك. ەگەر ءبىز اۋىل جاستارىن ساقتاپ قالعىمىز كەلسە, وندا مەكتەپ, سپورتزال, جول جانە مەديتسينا قالاداعىدان كەم بولماۋى كەرەك», دەدى و.بۋلاۆكينا.
ساپار بارىسىندا اۋدان جانە وبلىس اكىمدەرىمەن, ءماسليحات دەپۋتاتتارىمەن جانە كاسىپكەرلەرمەن كەزدەسۋلەر ءوتتى. سۋ قۇبىرلارى مەن دەنە شىنىقتىرۋ نىساندارىن سالۋ, سانيتارلىق قاۋىپسىزدىكتى ساقتاۋ ماسەلەلەرى مەن ءتۋريزمدى دامىتۋ مۇمكىندىكتەرى تالقىلاندى. سونداي-اق دارىگەرلەردىڭ جەتىسپەۋشىلىگى, تەگىن ءدارى-دارمەكتەرمەن قامتاماسىز ەتۋدىڭ كەشىگۋى, الەۋمەتتىك سالا نىساندارىنىڭ جاي-كۇيى, جاستار ساياساتى مەن جاس ماماندارعا تۇرعىن ءۇي بەرۋ سەكىلدى جۇيەلى ماسەلەلەر دە قوزعالدى. سەناتورلار ساپار قورىتىندىسى بويىنشا كوتەرىلگەن ءاربىر ماسەلە سەنات تالقىسىنا شىعارىلىپ, ءوڭىردى كوتەرۋگە باعىتتالعان زاڭنامانى جەتىلدىرۋ جونىندەگى جۇمىستى جالعاستىرۋعا ۋادە بەردى.