باتىس قازاقستان وبلىسىندا پوليتسيا قىزمەتكەرى مەن نوتاريۋس قاتىسقان قىلمىستىق توپ كولىكتەردى زاڭسىز تىركەۋمەن اينالىسقانى انىقتالدى, دەپ حابارلايدى Egemen.kz قارجىلىق مونيتورينگ اگەنتتىگىنە سىلتەمە جاساپ.
تەرگەۋ مالىمەتىنشە, كۇدىكتىلەر 82 اۆتوكولىكتى زاڭسىز ەسەپكە قويعان. ولار كليەنتتەردى مەسسەندجەرلەر ارقىلى تاۋىپ, مىندەتتى تولەمدەردى تولەمەي-اق كولىكتى تىركەۋگە كومەكتەسەتىنىن ايتقان.
كەلىسىم جاسالعاننان كەيىن ۇيىمداستىرۋشى كولىك تۋرالى مالىمەتتەردى اۆتوينسپەكتورعا جىبەرىپ وتىرعان. ال ينسپەكتور بۇرىن ەسەپتەن شىعارىلعان, سيپاتتاماسى ۇقساس كولىكتەردى تاڭداپ العان.
ودان كەيىن جالعان ساتىپ الۋ-ساتۋ كەلىسىمدەرى مەن سەنىمحاتتار راسىمدەلىپ, جالعان تۇلعالار تارتىلعان. قۇجاتتار ارنايى حقكو ارقىلى وتكىزىلگەن. نوتاريۋستىق ارەكەتتەر كولىك يەلەرىنىڭ قاتىسۋىنسىز جۇرگىزىلگەن.
ۆەدومستۆو مالىمەتىنشە, مەملەكەتكە كەلتىرىلگەن شىعىن كولەمى 705 ميلليون تەڭگەنى قۇراعان. سوت سانكتسياسىمەن كۇدىكتىلەردىڭ جالپى قۇنى 2,4 ميلليارد تەڭگە بولاتىن مۇلكىنە تىيىم سالىندى.
قازىرگى ۋاقىتتا بەس كۇدىكتى قاماۋعا الىنسا, تاعى ۇشەۋى ۇيقاماققا جىبەرىلگەن. قىلمىستىق ءىس سوتقا جولداندى.
ەسكە سالايىق, بۇعان دەيىن الماتى وبلىسى بالقاش اۋدانىندا پوليتسيا ءبولىمى باسشىسىنىڭ ورىنباسارى قىزمەتتىك كولىكپەن ءوز جۇبايىن قاعىپ ولتىرگەنىن جازعانبىز.
سونداي-اق اقتاۋدا پوليتسيا كولىگى ءبىر جارىم جاسار بالانى قاعىپ كەتكەنى تۋرالى جاريالاندى.
ورالدا پوليتسيا قىزمەتكەرى قىز زورلادى دەگەن كۇدىكپەن ۇستالدى.