پاۆلودارعا رەسمي ىسساپارمەن ومبى وبلىسىنىڭ گۋبەرناتورى ۆيتالي حوتسەنكو باستاعان دەلەگاتسيا كەلدى. ونىڭ اياسىندا وڭىرارالىق ىنتىماقتاستىق ماسەلەلەرى تالقىلاندى.
پاۆلودار وبلىسى اكىمىنىڭ مىندەتىن اتقارۋشى سەرىك باتىرعوجينوۆ الەۋمەتتىك-ەكونوميكالىق ينتەگراتسيانىڭ نەگىزگى فاكتورلارىنىڭ ءبىرى رەتىندە شەكارا ماڭىنداعى ءوزارا قارىم-قاتىناستىڭ ماڭىزدىلىعىن اتاپ ءوتتى.
ء«بىزدىڭ وڭىرلەردى قولايلى گەوگرافيالىق جاعداي مەن تاتۋ كورشىلىك قاتىناستار عانا ەمەس, سونداي-اق ءبىز دامىتۋعا ۇمتىلاتىن تۇراقتى ەكونوميكالىق قارىم-قاتىناس تا بايلانىستىرادى», دەدى ول.
جيىن بارىسىندا كولىك, لوگيستيكا, ونەركاسىپ, اگروونەركاسىپتىك كەشەن سالالارىنداعى ارىپتەستىك كەلەشەگى, سونداي-اق ماڭىزدى ترانسشەكارالىق سۋ ارتەرياسى بولىپ تابىلاتىن ەرتىس وزەنىنىڭ ستراتەگيالىق رەسۋرسىن ۇتىمدى پايدالانۋ ماسەلەلەرى دە تالقىلاندى.
وبلىس اكىمىنىڭ ورىنباسارى ايگەرىم قابىلتاەۆا مەن ومبى وبلىسى ۇكىمەتى توراعاسىنىڭ ورىنباسارى اندرەي شپيلەنكو تانىستىرعان پاۆلودار مەن ومبى وبلىستارىنىڭ ينۆەستيتسيالىق الەۋەتى ىنتىماقتاستىق ءۇشىن نەگىزگى سالالاردى جانە كاسىپكەرلىكتى مەملەكەتتىك قولداۋ شارالارىن بەلگىلەۋگە مۇمكىندىك بەردى.
سونداي-اق «سيبير», «ومسكايا», «ەلەكتروتوچپريبور», «اگروفيرما تاۆريدا», «سوليانوە», تاعى دا باسقا ومبى كومپانيالارىمەن بايلانىستاردى نىعايتۋ ماسەلەلەرى تالقىلاندى. پاۆلودار وبلىسىنان ومبىعا ءداستۇرلى تۇردە اليۋميني, كومىر, گلينوزەم, پوليپروپيلەن بۇيىمدارى جانە كابىل-وتكىزگىش ونىمدەرى جەتكىزىلەدى. ءوزارا قارىم-قاتىناستى «قازاقستان ءاليۋمينيى» اق, «قازەنەرگوكابەل» اق, «بوگاتىر كومىر» جشس, «نەفتەحيم LTD» جشس سياقتى ەكونوميكا فلاگماندارى جانە باسقا دا كاسىپورىندار قولدايدى. ونىمدەرى رەسەي نارىعىنا ەكسپورتتالاتىن «مولكومپاۆلودار», «رۋبيكوم», «Turkey PVL» وڭدەۋ كاسىپورىندارى دا جوعارى باعاعا يە بولدى.
سونداي-اق مادەنيەت, ءبىلىم, جاستار ساياساتى جانە سپورت سالاسىنداعى بىرلەسكەن باستامالارعا ەرەكشە نازار اۋدارىلدى. مۇراجايلار مەن كىتاپحانالاردىڭ ناتيجەلى جۇمىسى, ومبى وبلىسىنداعى قازاق دياسپوراسىمەن ءوزارا قارىم-قاتىناس اتالىپ ءوتتى. كەزدەسۋ قورىتىندىسىندا وڭىرلەر اراسىنداعى ءوزارا ىنتىماقتاستىق تۋرالى مەموراندۋمعا قول قويىلىپ, الداعى ۋاقىتتا ىسكە اسىرىلاتىن باستامالار تىزبەسى كەلىسىلدى.
ەرتىس وزەنىنىڭ الەۋەتىن پايدالانۋ ماسەلەلەرى بويىنشا دا جەكە جيىن ءوتتى. وندا كولىك مينيسترلىگى مەن سۋ رەسۋرستارى جانە يرريگاتسيا مينيسترلىگىنىڭ وكىلدەرى, سونداي-اق ومبى وبلىسى ۇكىمەتىنىڭ مۇشەلەرى بىرلەسكەن كولىك-لوگيستيكالىق جانە ەكولوگيالىق جوبالاردى ىسكە اسىرۋدى تالقىلادى. ەرتىستىڭ سۋ رەسۋرستارىن ۇتىمدى پايدالانۋ ونەركاسىپتىك, اگرارلىق جانە كەمە قاتىناسى سەكتورلارىنىڭ ورنىقتى دامۋىنىڭ ماڭىزدى ەلەمەنتى رەتىندە قاراستىرىلىپ وتىر. وزەننىڭ تۋريستىك-مادەني الەۋەتى دە اتالىپ ءوتتى. كەيىنگى ون جىلدا بۇل تاراپتا «ەرتىس – دوستىق وزەنى» اتتى بىرلەسكەن جوبا ىسكە اسىپ جاتىر.
دەلەگاتسيا مۇشەلەرى «پاۆلودار وزەن پورتى» اق جۇمىسىمەن دە تانىسىپ, «پاۆلودار» اەا «ۋپنك-پۆ» جشس, «HAGI-پاۆلودار» جشس (Zenith زاۋىتى) جانە پاۆلودار اۋدانىنداعى «Agro-Trade PV» جشس-دا بولدى.
پاۆلودار وبلىسى