اقتوبە وبلىسى, ويىل اۋدانىنىڭ وڭتۇستىك-شىعىس باعىتىنداعى قۇمساي قورىمىندا ارحەولوگيالىق قازبا جۇمىستارى بيىلعى جازدا قايتا جانداندى. وسىدان بەس مىڭ جىلداي بۇرىن پايدا بولعان قورعاندار ءۇيىندىسى ەرتە قولا داۋىرىندەگى «كونە شۇڭقىر» مادەنيەتىنە سايكەس كەلەدى ءارى بۇل جەردەگى وبالاردان سولتۇستىك كاۆكاز بەن مەسوپوتاميا ويپاتى وركەنيەتىنە ۇقساس جەرلەۋ عۇرپى انىقتالدى, دەپ حابارلايدى Egemen.kz.
قۇمساي قورىمىندا 168 وبا بار. كەي وبالاردا ەرەسەكتەر مەن بالالار بىرگە جەرلەنگەن. قازبا جۇمىستارى كەزىندە سيىر مالىنىڭ سۇيەگى, تاس جەبەنىڭ ۇشى, قۇمىرا سىنىعى, باقا سۇيەگىنەن جاسالعان توستاعان تابىلدى. جەرلەۋ عۇرپى دالا وركەنيەتىنە ۇقسامايتىن وبالار شەتەلدىك عالىمداردىڭ دا قىزىعۋشىلىعىن تۋعىزىپ وتىر. ەجەلگى ادامداردىڭ بايلانىسىن زەرتتەۋگە ميچيگان ۋنيۆەرسيتەتىنىڭ پروفەسسورى اليشا ۆەنترەسكە ميللەر دە كىرىسىپ, ء ا. مارعۇلان اتىنداعى ارحەولوگيا ينستيتۋتىنىڭ جەتەكشى عىلىمي قىزمەتكەرى ارمان بەيسەمباەۆپەن بىرگە قورىمنان تابىلعان مۇردەلەرگە گەنەتيكالىق زەرتتەۋدى باستادى. حالىقارالىق ەكسپەديتسيا قۇرامىنا ماسكەۋلىك ارحەولوگ عالىم الەكسەي حاۆانسكي دە قوسىلدى.
قازىرگى كەزدە قۇمسايدا جۇرگىزىلىپ جاتقان قازبا جۇمىستارىنا اقتوبە جانە قاراعاندى ۋنيۆەرسيتەتتەرىنىڭ تاريح فاكۋلتەتى ستۋدەنتتەرى دە قوسىلدى. وندىرىستىك تاجىريبەدەن ءوتىپ جاتقان ستۋدەنتتەردىڭ جاعدايىن كورۋگە ويىل اۋدانىنىڭ اكىمى اسقار قازىباەۆ, قۇدايبەرگەن جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ رەكتورى لاۋرا قاراباسوۆا كەلدى.
اقتوبە وبلىسى