ترانزيتتىك باعىتتار ءارتاراپتاندىرىلادى

2024 جىلدىڭ قورىتىن­دىسىندا ورتا ءدالىز ارقىلى تاسىمال كولەمى بۇرناعى جىلمەن سالىستىرعاندا 65%-عا ارت­قان. ەۋرازيانىڭ ءدال ورتا تۇسى­نا ورنالاسقان ەلىمىزدە 11 حالىقارالىق ترانزيتتىك ءدالىز بار. وتكىزۋ قابىلەتىن ارتتىرۋ مەن جۇك تاسىمالىنداعى جاعدايدى جاقسارتۋ ماقساتىندا جالپى ۇزىندىعى 1,3 مىڭ كم بولاتىن 4 ءىرى تەمىرجول جوباسىنىڭ قۇرىلىسى جالعاسىپ جاتىر. ولاردىڭ قاتا­رىندا دوستىق – مويىنتى, الما­تى اينالما جەلىسى, داربازا – ماقتاارال, باقتى – اياگوز تەمىر­جول ماگيسترالدارى بار. بۇل جوبالار تاۋار تاسىمالداۋ مەن لوگيستيكالىق ينفراقۇرىلىمدى جاقسارتۋ ءۇشىن ستراتەگيالىق ماڭىزعا يە.

بىلتىر 12 مىڭ كم اۆتوجول جوندەۋدەن وتسە, سونىڭ 7 مىڭىندا جۇمىس اياقتالدى. قاراعاندى – الماتى, تالدىقورعان – وسكەمەن, اقتوبە – قاندىاعاش, بۇقتىرما كوپىرى, شامالعانداعى جول ايرىعى مەن تۇركىستان وڭىرىندەگى تۋنەل ترانزيتتىك قوزعالىستىڭ ساپاسىن ەداۋىر ارتتىردى. بيىل جوندەۋ جۇمىستارى 13 مىڭ كم جولدى قامتيدى. ونىڭ قاتارىندا رەسپۋبليكالىق ماڭىزى بار جولداردىڭ 2 مىڭ كم-دە قايتا جاڭعىرتۋ, وبلىس ورتالىقتارى اراسىنداعى 6,6 مىڭ جانە جەر­گىلىكتى جولداردىڭ 4,2 مىڭ كم-ءى جوندەلمەك. جىل سوڭىنا دەيىن 9 مىڭ كم جولدا جۇمىستار تو­لىق اياقتالالى.

مەملەكەت باسشىسىنىڭ تاپ­سىر­ماسىنا سايكەس, 10 مىڭ كم ترانزيتتىك اۆتوجولدا ور­تاشا جوندەۋ جۇمىستارى جالعاسىپ جاتىر. جوبا «قازاق­ستان دامۋ بانكى» ارقىلى قارجى­لاندى­رىلعان. جوندەۋ جۇمىستارى وڭىر­ارالىق جانە اۋدانارالىق بايلانىستاردى جاقسارتادى. نەگىزگى باعىتتار – قاندىاعاش – شالقار, جەزقازعان – پەتروپاۆل, اتىراۋ – دوسسور, جاڭاوزەن – كەندىرلى – تۇرىكمەنستان شەكاراسى, قاراعاندى – اياگوز.

«ورتاشا جوندەۋ رەكونس­ترۋكتسيامەن سالىستىر­عان­دا 7 ەسە ارزان ءارى 2 ەسە جىلدام جۇرەدى, سوندىقتان بۇل ءادىس ترانزيتتىك ينفرا­قۇرىلىمدى ءتيىمدى دامى­تۋعا مۇمكىندىك بەرەدى. مۇنداي شارالار رەسپۋبليكالىق جول­دار­دىڭ 94%-ىن نورماتيۆتىك تالاپتارعا سايكەستەندىرۋگە جول اشادى. بۇل ءوز كەزەگىن­دە ترانزيت اعىنىن تارتۋ­عا, قوزعالىس قاۋىپسىزدىگىن ارتتىرۋعا جانە ەكونوميكالىق تيىمدىلىككە وڭ اسەر ەتەدى», دەيدى كولىك مينيسترلىگى, اۆتوجول كوميتەتى توراعاسىنىڭ ورىنباسارى جامبىل باقتيار.