جەتپىس جىل جوندەۋ كورمەگەن

«جاڭبىر جاۋىپ, قار ەرىگەندە توبەدەن تامشىلاعان سۋ بوكس زالىنىڭ ءىشىن كولشىككە اينالدىرادى. سونىڭ سالدارىنان تاقتايدان توسەلگەن ەدەن ءشىرىپ, جامايتىن جەر قالمادى. ونى ءار كەز ءوز قالتامىزدان قارجى شىعارىپ, جوندەپ كەلەمىز. وڭى­رىمىزدە بولعان جەر سىلكىنىسىندە عيماراتتىڭ قابىرعالارىنا زاقىم كەلىپ, شىتىناپ كەتتى. سپورت مەكتەبىنىڭ كارىز جۇيەسى ورتالىققا قوسىلماعاندىق­تان, ىرگەدەگى سەپتيك ۇنەمى تولىپ, ودان شىققان جاعىمسىز ءيىس قولقانى قاۋىپ, قىسى-جازى تىنىس الۋ مۇمكىن ەمەس. ونى سور­عىزۋ دا قالتاعا سالماق سالادى. قالتانى قاعار قارجىدان بۇ­رىن, مۇندا جاتتىعاتىن بالالار مەن ۇس­تازداردىڭ دەنساۋلىعىنا ايتارلىقتاي زيان تيگىزىپ وتىر. قىستا وت جاعىپ, كۇل شىعارۋمەن اينالىسامىز», دەيدى №2 بالا­لار مەن جاسوسپىرىمدەر سپورت مەك­تەبى ديرەكتورىنىڭ وقۋ ءىسى جونىن­دەگى ورىنباسارى دۋلات تۇزەلباي.

ىرگەدەن وتەتىن كوگىلدىر گاز قۇ­بىرىنا قوسىلۋعا ارا قاشىق­تىقتىڭ سايكەس كەلمەۋى كەسىرىن تيگىزىپ تۇرعانىن تىلگە تيەك ەتكەن دۋلات بەكجان ۇلى وت جاعۋ ماۋسىمىندا عيماراتتى جىلۋمەن جەتكىلىكتى مولشەردە قامتاماسىز ەتۋگە 21 ملن تەڭگەگە كومىر ءتۇسىرىپ, ونى 300 مەتردەگى قويماعا تاسىمالداۋ دا قيىندىق تۋدىرىپ, تي­تىقتاتىپ جۇرگەنىن اشىپ ايتتى.

شەلەكتەگى نىساننىڭ سىن كوتەرمەيتىن احۋالىمەن الىس-جاقىننان كەلەتىن اتقامىنەر­لەر, اكىم-قارالار, ءار دەڭگەيدەگى دەپۋ­تاتتار تەگىستەي حاباردار بول­عانىمەن, ايتىلعان ءسوز اي­تىل­عان جەردە قالىپ جاتقانى قىنجىلتادى.

جالپى اۋماعى 150 شارشى مەترلىك 2 قاباتتى مەملەكەتتىك مەنشىكتەگى نىساننىڭ توزىعى جەتكەنىنە قاراماستان, 988 وقۋ­شى ۇزدىكسىز جاتتىعىپ, سان الۋان سپورت تۇرلەرى بويىنشا بايراقتى باسەكەلەرگە قاتىسىپ, كوك تۋىمىزدى كوكتە جەلبىرەتىپ كەلە­دى. بالالار مەن جاسوسپىرىمدەر ەركىن كۇرەس, دزيۋدو, بوكس, قازاق كۇرەسى, فۋتبول, ۆولەيبول, باس­كەتبول, كيكبوكسينگ, گرەك-ريم, ايەلدەر كۇرەسى, ساياتشىلىق سىندى سپورت تۇرلەرىمەن جاتتى­عىپ, ايتارلىقتاي جەتىستىكتەرگە جەتىپ ءجۇر. بيىل بوكستان اقەركە دالاباي ازيا چەمپيونى اتاندى. ءىنجۋ باققوجا ەركىن كۇرەستەن ازيا بالالار ويىنىندا 2-ورىن, يسپانيادا وتكەن حالىقارالىق جارىستا 1-ورىن, تۇركيادا وتكەن بەلدەسۋدە 2-ورىن الىپ, ۇجىمنىڭ مەرەيىن ءوسىردى. مەكتەپ تۇلەگى ەلەونورا تۇرعانوۆا بوكستان ازيا, الەم چەمپيونى اتانعان. قۇسبەگىلىك ونەرگە باۋليتىن مامان ايان سەيىتجاننىڭ شاكىرتى بەكسۇلتان سەيىتجان ءۇرجاردا وتكەن جارىستا الەم چەمپيونى اتانىپ, ابىرويىن اسقاقتاتقان.

كيكبوكسينگتەن الەم چەمپيونى, الەم كۋبوگىنىڭ يەگەرى, ەۋروپانىڭ 2 دۇركىن چەمپيونى, ازيا چەمپيونى ەلمۇرات قايىپجانوۆ باسقاراتىن سپورت مەكتەبىندە شتات سانى – 59, ونىڭ ىشىندە 29-ى باپكەر. ەڭبەك ۇجىمى قيىندىققا قاراماستان, اۋىل بالالارى مەن جاسوسپىرىمدەردى سالاماتتى ءومىر سالتىنا, سپورتقا باۋلىپ, ناتيجەلى جۇمىس ىستەپ وتىر. ءسوز ءتۇيىنى, شەلەك اۋىلىنداعى مەملەكەت مەنشىگىندەگى بۇل نىسانعا نازار اۋداراتىن, كۇردەلى جوندەۋ جۇرگىزىلەتىن ۋاقىت جەتتى.

الماتى وبلىسى