الماتى ماڭىنداعى قاراساي اۋدانىنا قاراستى كەمەرتوعان اۋىلىندا اۋىزسۋ ماسەلەسى كوپ جىلدان بەرى شەشىلمەي كەلەدى. ءماجىلىس دەپۋتاتتارى ماكسيم روجين مەن دانيار قاسقاراۋوۆ وڭىرگە جۇمىس ساپارى اياسىندا اۋىل تۇرعىندارىمەن كەزدەستى, دەپ حابارلايدى Egemen.kz.
تۇرعىنداردىڭ ايتۋىنشا, ورتالىقتاندىرىلعان سۋ جۇيەسى بولعانىمەن, ونىڭ تەحنيكالىق جاعدايى وتە ناشار. قۇبىرداعى سۋ قىسىمى تىم ءالسىز, ال كەيبىر كوشەلەرگە مۇلدە جەتپەيدى. تۇرعىندار سۋدى تۇندە ىدىستارعا جيناپ, كۇن ءتارتىبىن سوعان بەيىمدەۋگە ءماجبۇر. ماسەلە تەك ونىڭ قولجەتىمسىزدىگىندە عانا ەمەس, ساپاسىنا دا قاتىستى. قوعام بەلسەندىسى راۋشان جۇماتاەۆا كوپتەگەن جەكەمەنشىك ۇڭعىما ءوز بەتىمەن, سانيتارلىق نورمالاردى ساقتاماي قازىلعانىن ايتتى.
«AMANAT» پارتياسى فراكتسياسىنىڭ مۇشەسى ماكسيم روجين بۇل ماسەلە العاش رەت ءبىر جارىم جىل بۇرىن قاسكەلەڭدەگى قوعامدىق قابىلداۋدا كوتەرىلگەنىن اتاپ ءوتتى. ول كەزدە 20-دان استام ماسەلە تىركەلىپ, ولاردىڭ باسىم بولىگى شەشىلگەن. الايدا قازىر ەڭ وزەكتى اۋىزسۋ ماسەلەسى قالىپ وتىر.
«قازىر اۋىلدا 4500-دەن استام ءۇي ورتالىق سۋ جۇيەسىنە قوسىلماعان. تۇرعىندار ءارتۇرلى تاريفپەن, ساپاسى كۇمان تۋدىراتىن جەكە ۇڭعىمالاردان سۋ تۇتىنىپ وتىر. قاجەتتى قۇجاتتار مەن جەر تەلىمى دايىن. ەندى باستى ماقسات – رەسپۋبليكالىق بيۋدجەتتەن قارجى تارتۋ. بۇل ماسەلە ۇكىمەت قاراۋىنا ۇسىنىلدى. پرەمەر-مينيستر تاراپىنان باقىلاۋعا الىندى. بيۋدجەت ناقتىلانعاندا قارجى بولىنۋگە ءتيىس. بۇل ماسەلە «AMANAT» پارتياسىنىڭ تىكەلەي باقىلاۋىندا. پارتيانىڭ «حالىقپەن بىرگە!» سايلاۋالدى باعدارلاماسىندا ينفراقۇرىلىمدى جاڭعىرتۋ نەگىزگى باسىمدىقتاردىڭ ءبىرى رەتىندە بەلگىلەنگەن», دەدى م.روجين.
جوبالىق-سمەتالىق قۇجاتتاماعا سايكەس, ۇزىندىعى 184,8 شاقىرىم بولاتىن سۋ قۇبىرى, ەكى سۋ قويماسى, ءۇش ناسوس ستانتسياسى, ديزەلدى گەنەراتور مەن ترانسفورماتورلىق قوسالقى ستانتسيا سالۋ جوسپارلانعان. قۇرىلىس اياقتالعاننان كەيىن شامامەن 20 مىڭ ادام تازا اۋىزسۋعا قول جەتكىزەتىن بولادى.
قاراساي اۋدانىندا وسىنداي جوبالار كەزەڭ-كەزەڭىمەن جۇزەگە اسىرىلۋدا. قازىر جاڭاتۇرمىس پەن قاراتوبە اۋىلدارىندا سۋ قۇبىرى جەلىسى سالىنىپ جاتىر. سونداي-اق ەلتاي, جارمۇحامبەت, شالقار جانە قايرات اۋىلدارىندا دا قۇرىلىس جۇمىستارى باستالعان. بۇل جوبالارعا 1,7 ميلليارد تەڭگە بولىنگەن.