اتىراۋ وبلىسىنىڭ تۇرعىندارى بىلتىردان بەرى وزەن-كولدەرگە شومىلۋ ماۋسىمىن كۇتىپ ءجۇر. بىراق, جاعاجايلار ءالى كۇنگە دايىن ەمەس, دەپ حابارلايدى Egemen.kz.
اتىراۋ وبلىستىق توتەنشە جاعدايلار دەپارتامەنتىنىڭ يميدجدىك جۇمىس جانە سىرتقى كوممۋنيكاتسيالار توبىنىڭ مالىمەتىنە سۇيەنسەك, سۋ ايدىندارىنداعى 46 ورىندا سۋعا تۇسۋگە رۇقسات بەرىلگەن. الايدا, جاعاجايلار دايىن بولماعاندىقتان, 41 ورىندا شومىلۋ ماۋسىمىن اشۋ بەلگىسىز مەرزىمگە كەيىنگە شەگەرىلىپ وتىر.
«قازىر وبلىس اۋماعىنداعى سۋ ايدىندارىندا 70 قاۋىپتى ورىن بار. سوعان بايلانىستى قاۋىپسىزدىك شارالارىن كۇشەيتۋ ماقساتىندا توتەنشە جاعدايلار دەپارتامەنتىنىڭ قىزمەتكەرلەرى جەرگىلىكتى اتقارۋشى ورگاندارمەن بىرگە سۋ ايدىندارىنا 266 تىيىم سالۋ بەلگىسىن, 12 اقپاراتتىق ستەند ورناتىلدى. سۋ ايدىندارىن شومىلۋعا دايىنداۋ, قاۋىپسىزدىك تالاپتارىنا سايكەستىگىن تەكسەرۋ جۇمىسى جۇرگىزىلىپ جاتىر. كۇن سايىنعى رەيدتىك ءىس-شارالار كەزىندە بىرقاتار قۇقىق بۇزۋشىلىق انىقتالدى. وزەن-كولدەردىڭ شومىلۋعا ارنالماعان ءارى جابدىقتالماعان تۇسىندا سۋعا ءتۇسۋ فاكتىلەرى ءجيى كەزدەسەدى. اسىرەسە, ىشىندە بالالار ەرەسەكتەردىڭ قاداعالاۋىنسىز شومىلىپ ءجۇر», دەيدى وبلىستىق دەپارتامەنتتىڭ باسقارماسى باستىعىنىڭ مىندەتىن ۋاقىتشا اتقارۋشى دارىن انۋاربەكوۆ.
توتەنشەلىكتەر سۋعا تۇسۋگە بايلانىستى قاۋىپسىزدىك ەرەجەلەرىن بۇزعان 44 ادامعا قر اكىمشىلىك قۇقىقبۇزۋشىلىق تۋرالى كودەكستىڭ 412-بابىمەن 600 مىڭ تەڭگەدەن استام ايىپپۇل سالعان. جىل باسىنان بەرى 4 ادام سۋعا باتقان. ءجانتاسىلىم ەتكەندەردىڭ اراسىندا 1 بالا بار.