«اماNات» پارتياسىنان سايلانعان ءماجىلىس دەپۋتاتتارى مۇقاش ەسكەندىروۆ پەن گۇلدارا نۇرىم تاراز قالاسىنداعى م-1 قالالىق جىلۋ ماگيسترالىن قايتا جاڭارتۋ جوباسىنىڭ جۇزەگە اسىرىلۋ بارىسىن تەكسەردى, دەپ حابارلايدى Egemen.kz.
قازىر تارازدا جىلۋ جەلىلەرىن قايتا جاڭارتۋ جۇمىستارى جالعاسۋدا. وتكەن جىلى 4602 مەتر قۇبىر اۋىستىرىلدى, بيىل جىل سوڭىنا دەيىن تاعى 1 536 مەترى جاڭارتىلادى. مۇقاش ەسكەندىروۆ بۇل تەك ءبىر عانا ماگيسترالدى جوندەۋ ەمەس, سونداي-اق ينفراقۇرىلىمدى جاڭعىرتۋدىڭ جۇيەلى قادامى ەكەنىن ايتتى. «AMANAT» پارتياسى مۇنداي جۇمىستارعا باستى باسىمدىقتاردىڭ ءبىرى رەتىندە قارايدى.
«ادامداردىڭ ءومىر ءسۇرۋ ساپاسىن ارتتىرۋ ءۇشىن ەڭ الدىمەن ۇيلەردە جىلۋ, ىستىق سۋ جانە كارىز جۇيەسىنىڭ دۇرىس جۇمىس ىستەۋى قاجەت. تارازدا جىلۋ جەلىلەرى ماسەلەسى ونداعان جىل بويى شەشىلمەي كەلگەن. ەندى بۇعان كوز جۇما قاراۋعا بولمايدى. تۇرعىندار قىسقى سۋىقتا جىلۋدان تارىقپايتىنىنا سەنىپ ءومىر ءسۇرۋى كەرەك», دەدى م.ەسكەندىروۆ.
جوبانىڭ جالپى قۇنى 10 ميلليارد تەڭگەدەن اسادى. تاپسىرىس بەرۋشى – قالا اكىمدىگى, مەردىگەر – «سارىاعاش-امان» كومپانياسى. تەحنيكالىق جانە اۆتورلىق قاداعالاۋدى كاسىبي مامانداندىرىلعان ۇيىمدار جۇزەگە اسىرادى. جوبا اياقتالعاننان كەيىن تاراز قالاسىنداعى جىلۋ جەلىلەرىنىڭ توزۋى 67 پايىزدان 51 پايىزعا دەيىن تومەندەمەك.
گۇلدارا نۇرىمنىڭ ايتۋىنشا, جامبىل وبلىسى «اماNات» پارتياسىنىڭ سايلاۋالدى باعدارلاماسى, سونداي-اق دەپۋتاتتار ازىرلەگەن «جىلۋ ەنەرگەتيكاسى تۋرالى» زاڭنىڭ ناقتى جۇزەگە اسىرىلۋىنىڭ ۇلگىسىن كورسەتىپ وتىر. زاڭدا سەنىمدىلىك, قاۋىپسىزدىك جانە جىلىتۋ ماۋسىمىنا دايىندىق بويىنشا قاتاڭ تالاپتار بەلگىلەنگەن.
«حالىق ەگەر پارتيا ۋادە بەرسە, ونى ورىندايتىنىنا كوز جەتكىزۋى كەرەك. ءبىز قۇر سوزبەن شەكتەلمەيمىز, ءار ايماقتا تۇرعىن ءۇي مەن كوممۋنال سالاسىندا, مەديتسينادا, گازداندىرۋدا ناقتى ناتيجەگە جۇمىس ىستەيمىز. تارازدا ءبىز وسىنىڭ ناقتى مىسالىن كورىپ وتىرمىز. قارجى ءبولىندى, مەردىگەر جۇمىس ىستەپ جاتىر, قۇبىرلار اۋىستىرىلۋدا, تۇرعىندار ناقتى وزگەرىستى كورىپ وتىر», دەدى گ.نۇرىم.
وبلىستا بارلىعى 9 جىلۋ ەنەرگيا كەشەنى جانە 593 اۆتونومدى قازاندىق جۇمىس ىستەيدى. تارازدا 1025 كوپقاباتتى تۇرعىن ءۇيدىڭ 921-ءى جازعى ۋاقىتتا ىستىق سۋمەن قامتىلعان. قالعان 104 ۇيگە جوندەۋ جۇمىستارى اياقتالعان سوڭ ىستىق سۋ بەرىلەدى. جالپى وبلىستا 2025-2026 جىلدارداعى جىلۋ بەرۋ ماۋسىمىنا دايىندىق كەستەگە ساي جۇرگىزىلۋدە.
«اماNات» پارتياسىنىڭ سايلاۋالدى باعدارلاماسىن ىسكە اسىرۋ اياسىندا جامبىل وبلىسى بويىنشا 2027 جىلعا دەيىن 26,8 شاقىرىم جىلۋ جەلىسىن, 1,2 مىڭ شاقىرىم ەلەكتر جەلىسىن جوندەۋ جانە قايتا جاڭارتۋ جوسپارلانعان.