الىپ كيمەشەك

پاۆلوداردىڭ ورتالىق جاعا­لا­ۋىندا وتاندىق فەشن-يندۋستريادا­عى مەگا رەكورد تىركەلدى. ءداستۇرلى ەتنو­مادەنيەتتەگى قازاق ايەلدەرىنىڭ كيىمى – «الىپ كيمەشەك» تانىستىرىلدى. ءىس-شاراعا اق كيمەشەك كيگەن 200-گە جۋىق انا قاتىسىپ, ۇلتتىق باس كيىمدى دارىپتەدى.

– قازاق حالقىنىڭ ءداستۇرلى مادە­نيەتىندەگى بۇل باس كيىمدى تەك تۇرمىستاعى ايەلدەر كيگەن. كيمەشەك ايەلدەردىڭ وتباسىنداعى جانە قوعامداعى ەرەكشە مارتەبەسىنىڭ كورسەتكىشى ىسپەتتى. جوبا اۆتورى – بەلگىلى ديزاينەر-شەبەر گۇلايىم اكۋمباەۆا, ول جۇمىسىنا جەرگىلىكتى فولكلوردى نەگىز ەتىپ ال­عان. ءىس-شارانى قالالىق اكىمدىكتىڭ قولدا­ۋىمەن «قازاق انالارى – داستۇرگە جول» رقب ۇيىمداستىرىپ وتىر, – دەپ حا­بار­لادى پاۆلودار قالالىق اكىمدىگىنەن.

«الىپ كيمەشەك» جوباسىنىڭ ­يدەياسى ماعان بىلتىر كەلدى. ءبىز­دىڭ قازاق­تىڭ كيمەشەگىن نەگە حالىقارا­لىق دەڭگەيگە شىعارماسقا دەدىم. ون­داعى ماقساتىم – وسى ۇلتتىق كيىمى­مىز­دى الەمگە ايگىلى ەتۋ. ونى تىككەندە ۇزىن­دىعى سۋاعارىمەن بىرگە 4 مەتردى يگەردى. ال الدىڭعى بولىگى 2,35 مەتر بولدى. نەگىزىنەن «قازاقتاردىڭ ۇلت­تىق كيىمى» دەگەن عىلىمي كاتالوگ بار. سول كاتالوگتىڭ 99-بەتىندە 1950 جىلى تىگىلگەن كيمەشەكتىڭ ۇلگىسى بويىنشا جاسادىم. ۇلگىنى 2,5-3 ەسەگە ۇلكەيتكەندە وسى ولشەمدەر شىقتى», دەيدى گۇلايىم اكۋمباەۆا.

الىپ كيمەشەكتى Global Book of Records/GbR وكىلدەرى رەسمي تۇردە تىركەپ, Global Book of Records/GbR جاڭا حالىقارالىق رەكوردتار كىتابىنا ەنگىزدى.

مەگا باس كيىمنىڭ جالپى بيىكتىگى ­3 مەتر 80 سم, كۇمىس جانە مەتالل تيىندارمەن اشەكەيلەنگەن, ءىنجۋ مەن باسقا دا اسىل تاستاردى قوسا العاندا 2025 دانا مونشاق قولدانىلعان.

پاۆلودار