2025 جىلعى 30 ماۋسىمدا اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە ماتەماتيكا, فيزيكا جانە ينفورماتيكا فاكۋلتەتىنىڭ ءبىتىرۋشى تۇلەكتەرىنە ارنالعان سالتاناتتى ديپلوم تابىستاۋ ءراسىمى ءوتتى. ءىس-شاراعا ۋنيۆەرسيتەتتىڭ باسقارما توراعاسى–رەكتورى بولات تىلەپ, ءبىلىم بەرۋ باعدارلامالارىن تالداۋ دەپارتامەنتىنىڭ ديرەكتورى نۇرجامال وشانوۆا, فاكۋلتەت دەكانى شەريپيدين حامراەۆ, كافەدرا مەڭگەرۋشىلەرى, پروفەسسورلىق-وقىتۋشىلار قۇرامى, تۇلەكتەر, ولاردىڭ اتا-انالارى مەن قۇرمەتتى قوناقتار قاتىستى, دەپ حابارلايدى Egemen.kz.
سالتاناتتى شارادا قر عىلىم جانە جوعارى ءبىلىم ءمينيسترى ساياسات نۇربەكتىڭ تۇلەكتەرگە ارنالعان بەينەقۇتتىقتاۋى كورسەتىلىپ, جاس ماماندارعا اقجارما تىلەكتەر جولداندى.
سونىمەن قاتار ۋنيۆەرسيتەت رەكتورى بولات تىلەپ قۇتتىقتاۋ ءسوز سويلەپ, ءبىتىرۋشى تۇلەكتەردى وسى ماڭىزدى كۇنمەن قۇتتىقتاپ, ولاردىڭ كوپجىلدىق تاباندى ەڭبەكتەرى مەن وقۋ بارىسىندا جەتكەن جەتىستىكتەرىنە جوعارى باعا بەردى. سونداي-اق, الداعى ءومىر جولىندا ساتتىلىك تىلەپ, جاس مامانداردىڭ ۋنيۆەرسيتەت بەدەلىن ارتتىرىپ, ەل يگىلىگىنە ادال قىزمەت ەتەتىنىنە سەنىم ءبىلدىردى.
ء«سىز وسى قاراشاڭىراقتا بويىڭىزعا تەك ءبىلىم عانا ەمەس, ومىرلىك باعىت-باعدار, ادامي قۇندىلىقتار مەن اسقاق رۋحتى ءسىڭىردىڭىز. ارينە, بۇل ءسىز ءۇشىن الداعى ءومىر جولىڭىزدا سەنىمدى سەرىگىڭىز, بيىك ماقساتتارعا جەتەلەيتىن التىن ارقاۋ بولادى دەپ سەنەمىن. كاسىبي جولىڭىز تابىس پەن ساتتىلىككە تولى بولعاي!», دەدى رەكتور.
ديپلوم تابىستاۋ راسىمىندە تۇلەكتەرگە ۋنيۆەرسيتەت اتىنان ۇلى اقىن اباي قۇنانباەۆتىڭ «قارا سوزدەر» جيناعى ەستەلىك رەتىندە تارتۋ ەتىلدى. سونداي-اق, سالتاناتتى شارادا ەسترادا ءانشىسى جىگەر اۋىپباەۆ ارنايى قوناق رەتىندە قاتىسىپ, ءوزىنىڭ ونەرىمەن كەش قوناقتارىنا مەرەكەلىك كوڭىل كۇي سىيلادى.
بيىل ماتەماتيكا, فيزيكا جانە ينفورماتيكا فاكۋلتەتىن 850 تۇلەك ءساتتى ءتامامداپ, جوعارى ءبىلىم تۋرالى ديپلومعا يە بولدى. ونىڭ ىشىندە 692 باكالاۆر جانە 156 ماگيسترانت بار. ال 98 تۇلەك وقۋ ورنىن ۇزدىك اياقتاپ, «قىزىل ديپلوم» يەگەرى اتاندى.