ەلىمىزدە ەڭ كوپ نەكە تامىز ايىندا تىركەلەدى

ستاتيستيكالىق مالىمەتتەرگە سايكەس, 2015 جىلدان 2024 جىلعا دەيىنگى ارالىقتا نەكە قيۋدىڭ ەڭ جوعارى كورسەتكىشى ءدال وسى ايعا تيەسىلى. سوڭعى ون جىلدا تامىز ايىندا ورتا ەسەپپەن 14,9 مىڭ جۇپ رەسمي تۇردە نەكەسىن قيدىرعان. 2016 جىلى بۇل كورسەتكىش رەكوردتىق دەڭگەيگە جەتىپ, 16,9 مىڭ نەكە تىركەلگەن.

بۇرىن شىلدە مەن قىركۇيەك تە تانىمال ايلار قاتارىندا بولعان. الايدا 2023 جىلدان باستاپ ماۋسىم ايى قىركۇيەكتى باسىپ وزىپ, ۇزدىك ۇشتىككە ەنگەن. ماسەلەن, 2024 جىلى ماۋسىمدا 11,6 مىڭ, ال قىركۇيەكتە 10,8 مىڭ نەكە قيىلعان.

وسىلايشا, سوڭعى ەكى جىلدا ماۋسىم, شىلدە جانە تامىز ايلارى نەكە تىركەلەتىن ەڭ بەلسەندى كەزەڭگە اينالدى.

ەڭ تومەنگى نەكە سانى ادەتتە قاڭتار ايىندا تىركەلەدى. سوڭعى ونجىلدىقتا بەس رەت قاڭتار ەڭ از نەكە قيىلعان اي بولدى. سونداي-اق مامىر دا تومەن كورسەتكىشتەرمەن ەرەكشەلەنەدى.

ايتا كەتەيىك, نەكەگە تۇرۋ بەلسەندىلىگى 2020 جىلدىڭ ساۋىرىندە ەڭ تومەنگى دەڭگەيگە تۇسكەن. بۇل كورسەتكىش كوروناۆيرۋس پاندەمياسىنا بايلانىستى شەكتەۋلەر كەزىندە تىركەلگەن.