كەنتاۋ قالاسىندا 2025 جىلى جالپى قۇنى 10,3 ملرد تەڭگەنى قۇرايتىن 16 جوبا ىسكە اسىرىلادى. بۇل جوبالار ناتيجەسىندە 492 ادام تۇراقتى جۇمىسپەن قامتىلادى دەپ كۇتىلەدى. اتاپ ايتقاندا, ونەركاسىپ سالاسىندا 4 ءىرى جوبا جىل سوڭىنا دەيىن جۇمىسىن باستايدى. بۇل تۋرالى كەنتاۋ قالاسىنىڭ اكىمى جاندوس تاسوۆ وڭىرلىك كوممۋنيكاتسيالار قىزمەتىنىڭ الاڭىندا وتكەن بريفينگتە مالىمدەدى, دەپ جازادى Egemen.kz.
ونىڭ ايتۋىنشا, بيىل اشىلاتىن ءتورت ءىرى جوبامىزدىڭ ەكەۋى ارنايى ەكونوميكالىق ايماقتا, قالعان ەكەۋى يندۋستريالدى ايماقتا ورنالاسقان.
«اتاپ ايتار بولساق, «KentauRedStar»جشس-ءى – كىرپىش وندىرىسىمەن اينالىسادى. 2023 جىلى قۇرىلىسى باستالعان نىساننىڭ جوبا قۇنى - 1,5 ملرد تەڭگە. بيىل مامىر ايىندا ىسكە قوسىلعان زاۋىتتا 80 ادام تۇراقتى جۇمىسپەن قامتىلعان. ءوندىرىس ورنى جىلىنا 45 ملن دانا كىرپىش وندىرۋگە قاۋقارلى. بۇدان بولەك, «TURAN SHENHUA» جشس-ءى گاز قازاندىقتارىن جانە تۇرمىستىق تەحنيكالالاردى ءوندىرۋدى قولعا الماق. 2025 جىلدىڭ قاراشا ايىندا جۇمىسىن باستايدى دەپ جوسپارلانعان ءوندىرىس ورنىندا 120 ادامعا جۇمىس تابىلماق. جوبا قۇنى – 2,4 ملرد تەڭگە. سونداي-اق, بيىل اياقتالۋى ءتيىس جوبالار قاتارىندا مەتالل بۇيىمدارىن وندىرۋگە باعىتتالعان «ايدارسترويگرۋپپ» جشس-ءى جانە «ساپار قۇرىلىس-س» جك مەتالل ءوندىرىسى تسەحى بار», دەدى جاندوس تاسوۆ.
ايتا كەتەيىك, 2025 جىلدىڭ العاشقى 5 ايىندا كەنتاۋ قالاسىنىڭ وڭىرلىك ءونىمى 33,1 ملرد تەڭگەنى قۇراعان. وسى كەزەڭدە نەگىزگى كاپيتالعا تارتىلعان ينۆەستيتسيا كولەمى 5,2 ملرد تەڭگە. ونەركاسىپ ءونىمىنىڭ كولەمى 23,6 ملرد تەڭگەگە جەتىپ, كەنتاۋ وبلىستا 4-ورىنعا جايعاسقان. ونىڭ ىشىندە وڭدەۋ ونەركاسىبىنىڭ ۇلەسى 20,1 ملرد تەڭگەنى قۇراسا, اۋىل شارۋاشىلىعىندا جالپى ءونىم كولەمى 2,1 ملرد تەڭگە بولعان.
قالاعا قاراستى ايماقتاردا تۋريزم سالاسى دا دامىپ كەلەدى. جىل باسىنان بەرى وڭىرگە كەلۋشىلەر سانى 16,6%-عا ارتقان. بۇل كورسەتكىشتى ارتتىرا ءتۇسۋ ءۇشىن حانتاعى اۋىلىندا 13 گەكتار اۋماقتا 15 زاماناۋي ءمودۋلدى كاپسۋلالارمەن جابدىقتالعان «KHANTAU» دەمالىس ايماعى سالىنىپ جاتىر. 400 ملن تەڭگە كولەمىندە باعالانعان بۇل جوبا جىل سوڭىنا دەيىن اياقتالادى. سونىمەن قاتار, «قاراتاۋ» مەملەكەتتىك تابيعي قورىعى اۋماعىندا ۆيزيت-ورتالىق سالۋ كوزدەلگەن. جالپى اۋماعى 300 شارشى مەتر بولاتىن نىسان جىلىنا 100 مىڭ ءتۋريستى قابىلداۋعا قاۋقارلى.
وڭىردەگى قۇرىلىس سالاسى دا قارقىن الىپ كەلەدى. 2025 جىلدىڭ شىلدەسىندە 5 قاباتتى 60 پاتەرلى الەۋمەتتىك-نەسيەلىك تۇرعىن ءۇيدىڭ قۇرىلىسى اياقتالادى.
«سونداي-اق, شاھارداعى 288 كوپقاباتتى تۇرعىن ءۇي قازىرگى تاڭدا تولىقتاي جاڭارتىلعان. وڭىردەگى ينفراقۇرىلىم سالاسىندا دا بىرقاتار جۇمىستار اتقارىلۋدا. جالپى بۇگىنگى تاڭداعى ءوڭىردىڭ گازمەن قامتىلۋ كورسەتكىشى 85%-عا جەتكەن. ال, كەنتاۋ قالاسى مەن وعان قاراستى اۋىلدار 100% اۋىز سۋمەن قامتىلعان. سونداي-اق, قالا كوشەلەرىنىڭ جارىقتاندىرىلۋى 98%-دى قۇراسا, وڭىردەگى قاناعاتتانارلىق جاعدايداعى جولدار ۇلەسى 87,7%-عا جەتىپ وتىر», دەلىنگەن حابارلامادا.