جاقىندا ەلىمىز «50-in-5» جاھاندىق باستاماسىنا قوسىلدى. بۇل باستاما تسيفرلىق قوعامدىق ينفراقۇرىلىمنىڭ (DPI) نەگىزگى ەلەمەنتتەرىن جەدەل ەنگىزۋدى ماقسات ەتەدى. سونداي-اق تەحنولوگيالار زاماناۋي, ىڭعايلى, پرواكتيۆتى مەملەكەتتىك قىزمەتتەردى دامىتۋعا نەگىز بولىپ, ادامداردىڭ ءومىر ءسۇرۋ ساپاسىن ارتتىرىپ, تسيفرلىق ەكونوميكانى ىلگەرىلەتۋگە ىقپال جاسايدى.
تسيفرلىق قوعامدىق ينفراقۇرىلىم – بۇل تسيفرلىق تولەمدەر, سايكەستەندىرۋ جانە دەرەكتەر الماسۋ جۇيەلەرىنىڭ قاۋىپسىز ءارى ءوزارا ارەكەتتەسە الاتىن جيىنتىعى. تسيفرلىق داۋىردە بۇل جۇيەلەر ەكونوميكا مەن الەۋمەتتىك ومىرگە تولىققاندى قاتىسۋدىڭ باستى العىشارتىنا اينالدى. «DPI» بارلىق ەلدە ورنىقتى ءارى يننوۆاتسيالىق ەكونوميكا قۇرىپ, تۇرعىنداردىڭ ءال-اۋقاتىن قامتاماسىز ەتۋى ءۇشىن قاجەت.
«50-in-5» باستاماسىنىڭ نەگىزگى ماقساتى – 2028 جىلعا دەيىن 50 ەل كەم دەگەندە ءبىر «DPI» ەلەمەنتىن ەنگىزۋ. بۇل تاجىريبە الماسۋ جانە اشىق تسيفرلىق ونىمدەردى قولدانا وتىرىپ, بىرلەسكەن شەشىمدەر ازىرلەۋ شىعىنىن ازايتىپ, ترانسفورماتسيانى جەدەلدەتە تۇسەدى.
«ەلىمىزدەگى تسيفرلىق ترانسفورماتسيانىڭ باستى وزەگى – ادام. ءبىز ءۇشىن تەحنولوگيا – جاي عانا تەحنولوگيا ەمەس, ول ازاماتتاردىڭ ءومىرىن جاقسارتاتىن قۇرال. وسى ماقساتتا ءار قادامىمىزدى حالىق يگىلىگى ءۇشىن جاساي وتىرىپ, اشىق, تۇسىنىكتى جانە ءتيىمدى تسيفرلىق مەملەكەت قۇرىپ جاتىرمىز. شىن مانىندە, تسيفرلىق شەشىمدەر قاشىقتىقتى قىسقارتادى. وسى ارقىلى ادامدار قايدا تۇرسا دا, ءبىز ولارعا جاقىن بولا الامىز. «50-in-5» باستاماسىنا قوسىلۋ – ازاماتتارعا ارنالعان تسيفرلىق ترانسفورماتسيامىزدى ۇدەتىپ, شىعىنداردى ازايتۋعا مۇمكىندىك بەرەتىن ماڭىزدى قادام», دەدى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ.
قازىر ەلىمىزدە تسيفرلىق قوعامدىق ينفراقۇرىلىمنىڭ نەگىزگى ەلەمەنتتەرى تابىستى ەنگىزىلىپ وتىر. ماسەلەن, تسيفرلىق سايكەستەندىرۋ جۇيەسىنىڭ (Digital ID) نەگىزگى بولىگى – «eGov Mobile» ءموبيلدى قوسىمشاسى. بۇل – رەسمي ەلەكتروندىق ۇكىمەتتىڭ سۋپەرموبيلدى قوسىمشاسى, ول قاۋىپسىز اۆتوريزاتسيا, قاشىقتان جەكە باسىن راستاۋ جانە مەملەكەتتىك قىزمەتتەردىڭ كەڭ اۋقىمىنا قول جەتكىزۋ مۇمكىندىگىن قامتيدى.
بۇگىندە «eGov Mobile» قوسىمشاسىن 10,9 ملن-نان استام ەل تۇرعىنى پايدالانادى. ونىڭ ىشىندە اي سايىنعى بەلسەندى اۋديتوريا 5,3 ملن ادامدى قۇرايدى, ال تاۋلىگىنە ورتا ەسەپپەن 354 مىڭ پايدالانۋشى قوسىمشاعا كىرەدى. «قىزمەتتەر» بولىمىندە 200 ءتۇرلى سەرۆيس قولجەتىمدى, ال «eGov Mobile» ارقىلى كورسەتىلگەن مەملەكەتتىك قىزمەتتەردىڭ جالپى سانى 82 ملن-نان استى. اسىرەسە ادامدار «تسيفرلىق قۇجاتتار» ءبولىمىن كوپ پايدالانادى. وندا جەكە كۋالىكتەن باستاپ, جۇرگىزۋشى كۋالىگىنە دەيىن 38 ءتۇرلى ەلەكتروندىق قۇجات قولجەتىمدى. بۇل فۋنكتسيا ىسكە قوسىلعاننان بەرى قۇجاتتاردى 25,7 ملن-نان استام رەت قولدانعان.
سونىمەن قاتار مەملەكەتتىك جۇيەلەر اراسىندا دەرەكتەر الماسۋ ءۇشىن «Smart Data Ukimet» اقپاراتتىق-تالدامالىق پلاتفورماسى جۇمىس ىستەيدى. وعان 124 مەملەكەتتىك ورگاننىڭ اقپاراتتىق جۇيەسى بىرىكتىرىلگەن. بۇل ينتەگراتسيا ازاماتتاردىڭ ومىرلىك جاعدايلارىنا اۆتوماتتى تۇردە جاۋاپ رەتىندە پرواكتيۆتى مەملەكەتتىك قىزمەتتەردى ازىرلەۋگە مۇمكىندىك بەرەدى.
قازىردە الەۋمەتتىك باعىتتاعى 45 پرواكتيۆتى مەملەكەتتىك قىزمەت ازىرلەنگەن. ولار ازاماتتارعا, اسىرەسە قيىن جاعدايعا تاپ بولعان ادامدارعا باعىتتالعان اتاۋلى كومەك كورسەتۋگە ارنالعان. وسىنداي قىزمەتتەر 4,3 ملن-نان استام رەت كورسەتىلدى. سونداي-اق «Smart Data Ukimet», ەلەكتروندىق ۇكىمەت ءشليۋزى جانە «Smart Bridge» بىرىگىپ, ۇلتتىق دەرەكتەر الماسۋ جۇيەسىنىڭ نەگىزىن قۇرايدى.
ازات ەسەن