ەڭبەك موبيلدىلىگىنە ارنالعان رەسپۋبليكالىق فورۋم باستالدى

فورۋم اياسىندا ەرىكتى تۇردە قونىس اۋدارۋ ارقىلى ەڭبەك نارىعىنداعى تەڭگەرىمسىزدىكتى شەشۋگە باعىتتالعان ءىس-شارالار لەگى ۇيىمداستىرىلىپ وتىر. بۇل ماقساتتا ارنايى بوس جۇمىس ورىندارى جارمەڭكەسى ءوتىپ, وعان جۇمىس بەرۋشىلەر مەن جۇمىس ىزدەۋشى ازاماتتار قاتىستى.

نۇربول دولداشەۆتىڭ ايتۋىنشا, فورۋمعا قاتىسۋعا بالالار ۇيلەرى مەن اۋىلدارىنىڭ تاربيەلەنۋشىلەرى, جەتىم بالالار مەن اتا-اناسىنىڭ قامقورلىعىنسىز قالعان 16–23 جاس ارالىعىنداعى مەكتەپ-ينتەرنات تۇلەكتەرى ءوتىنىش بەرە الادى. سونىمەن قاتار, باسىمدىق ەكونوميكالىق سەبەپتەرمەن, شتاتتىڭ قىسقارۋىنا بايلانىستى نەمەسە وندىرىستىك كولەمنىڭ ازايۋىنا وراي جۇمىستان بوساتىلعان ازاماتتارعا بەرىلەدى.

وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى كوشى-قون ءبولىمىنىڭ باسشىسى لاۋرا ماحمۋتوۆا اتاپ وتكەندەي, فورۋم بارىسىندا سولتۇستىك وڭىرلەردىڭ وكىلدەرى قاتىساتىن ارنايى «قونىس اۋدارۋ» جارمەڭكەلەرى دە ۇيىمداستىرىلىپ جاتىر. بۇل جارمەڭكەلەر وبلىستىڭ بارلىق اۋداندارى مەن قالالارىن قامتيدى.

قونىس اۋدارۋشىلارعا مەملەكەت تاراپىنان جان-جاقتى قولداۋ كورسەتىلەدى. اتاپ ايتقاندا:

وتباسىنىڭ ءاربىر مۇشەسىنە 275,2 مىڭ تەڭگە كولەمىندە ءبىر رەتتىك ماتەريالدىق كومەك قاراستىرىلعان;

تۇرعىن ءۇيدى جالداۋ جانە كوممۋنالدىق قىزمەتتەرگە ارنالعان شىعىنداردى وتەۋ ءۇشىن 12 اي بويى 15–30 اەك كولەمىندە (ياعني, 58 980–117 960 تەڭگە ارالىعىندا) تولەم ۇسىنىلادى.

ەرىكتى قونىس اۋدارۋ باعدارلاماسىنا قاتىسۋ ءۇشىن تۇرعىلىقتى مەكەنجايى بويىنشا مانساپ ورتالىقتارىنا جۇگىنۋ قاجەت. بيىلعى وڭىرلىك كۆوتا اياسىندا قونىس اۋدارۋشىلاردى قابىلدايتىن وبلىستار – اباي, قاراعاندى, قوستاناي, پاۆلودار, سولتۇستىك قازاقستان, ۇلىتاۋ جانە شىعىس قازاقستان.

ماڭعىستاۋداعى بۇل فورۋم تەك ەڭبەك رەسۋرستارىنىڭ تەڭگەرىمدى بولىنۋىنە ىقپال ەتىپ قويماي, الەۋمەتتىك جاعىنان وسال توپتاعى جاستاردىڭ ءوز بولاشاعىن جوسپارلاپ, جاڭا ايماقتاردان ورىن تابۋىنا دا مۇمكىندىك بەرمەك. وسىلايشا, جۇمىس كۇشى تاپشىلىعى بايقالاتىن وڭىرلەرگە كاسىبي مامانداردى تارتۋ مەن ەل ىشىندەگى دەموگرافيالىق جانە ەكونوميكالىق تەڭگەرىمدى ساقتاۋ ماسەلەلەرى شەشىمىن تابۋعا ءبىر قادام جاقىنداي تۇسەدى.