ۇلتتىق ستاتيستيكا بيۋروسىنىڭ مالىمەتىنشە, 2024 جىلدىڭ قورىتىندىسى بويىنشا ەلىمىزدە 251 ويىن-ساۋىق جانە دەمالىس ساياباعى جۇمىس ىستەگەن. بۇل كورسەتكىش وتكەن جىلمەن سالىستىرعاندا 9,1%-عا ارتقان, دەپ حابارلايدى Egemen.kz.
وڭىرلەر اراسىندا دەمالىس ورىندارىنىڭ سانى بويىنشا تۇركىستان وبلىسى كوش باستاپ تۇر — مۇندا 32 ساياباق تىركەلگەن. ودان كەيىن شىمكەنت قالاسى — 29 ساياباقپەن, ال قاراعاندى وبلىسىندا — 28 دەمالىس ورنى بار.
ساياباقتارعا كەلۋشىلەر سانى 2024 جىلى 15,5 ميلليون ادامعا جەتكەن. كوبىنە ەلوردا تۇرعىندارى مەن قوناقتارى دەمالىس ساياباقتارىنا بارعان. استانادا 3,2 ملن ادام تىركەلسە, شىمكەنتتە — 2,7 ملن, الماتىدا — 2,5 ملن ادام.
مەنشىك قۇرىلىمى بويىنشا ساياباقتاردىڭ 69,3%-ى جەكە تۇلعالارعا تيەسىلى بولسا, 29%-ى مەملەكەتتىك, ال 1,5%-ى شەتەلدىك مەنشىك يەلەرىنە قارايدى.
دەمالىس ورىندارىنىڭ 131-ءى اشىق اسپان استىندا ورنالاسقان, ال 120-سى عيمارات ىشىندە قىزمەت كورسەتەدى. اۋىلدىق جەرلەردە 51 ساياباق جۇمىس ىستەيدى, بۇل جالپى كورسەتكىشتىڭ 19,1%-ىن قۇرايدى.
سونداي-اق, ەلدەگى دەمالىس ورىندارىندا جالپى سانى 3 923 اتتراكتسيون مەن ويىن اۆتوماتى تىركەلگەن.