ەنەرگەتيكا ۆيتسە-ءمينيسترى قۇدايبەرگەن ارىمبەك قىزىلوردا وبلىسىنداعى مۇناي-گاز ءوندىرۋشى كومپانيالارمەن كەڭەس وتكىزدى. كەڭەستە ءوڭىردىڭ گاز قورلارىن يگەرۋ, ءوندىرىستى ۇلعايتۋ جانە ەنەرگەتيكالىق قاۋىپسىزدىككە ۇلەس قوسۋ باعىتىندا بىرقاتار ناقتى ماسەلەلەر قارالدى, دەپ جازادى Egemen.kz.
قىزىلوردا وبلىسىنىڭ گاز رەسۋرستارىنىڭ جالپى الەۋەتى 22 ملرد تەكشە مەتردەن اسادى. بۇل – ەلدىڭ ەنەرگەتيكالىق قورى ءۇشىن ايتارلىقتاي ماڭىزدى كورسەتكىش. سوڭعى جىلدارى وڭىردە بۇل باعىتتاعى جۇمىس جاندانا باستاعان. ماسەلەن, 2022 جىلى «بك «قازگەرمۇناي» جشس وڭتۇستىك اقساي گازكوندەنساتتى كەن ورنىن وندىرىستىك يگەرۋگە ەنگىزدى. قازىر بۇل كاسىپورىن ايماقتىق گاز حابىنا اينالىپ كەلەدى.
2025 جىلدىڭ تامىزىنا دەيىن «Kazpetrol Group» جشس مەن «گالاز ي كومپانيا» جشس ءوندىرىپ وتىرعان ىلەسپە مۇناي گازى «قازگەرمۇنايدىڭ» ۋكپگ–1,2 قوندىرعىسىنا جەتكىزىلمەك. ال قىركۇيەككە قاراي بۇل قوندىرعىعا «تۇزكولمۇنايگاز وپەرەيتينگ» جشس-نىڭ شيكى گازى باعىتتالادى.
«پەتروقازاقستان ۆەنچەرس ينك.» كومپانياسى گاز قورلارىن يگەرۋگە ءتۇرلى تاسىلدەر قاراستىرىپ وتىر. اتاپ ايتقاندا, «پەتروقازاقستان قۇمكول رەسورسيز» اق-مەن بىرلەسىپ ارىسقۇم كەن ورنىنىڭ گاز شاپكاسىن يگەرۋ جوباسى بويىنشا جۇمىس ىستەۋدە. قازىرگى تاڭدا وسى ۋچاسكەنى ونەركاسىپتىك تۇرعىدا پايدالانۋدىڭ تەحنيكالىق-ەكونوميكالىق نەگىزدەمەسى ازىرلەنىپ جاتىر.
سونداي-اق «تورعاي پەترولەۋم» اق جىلىنا 50 ملن تەكشە مەترگە دەيىن گاز قابىلداۋعا جانە ونى پايداعا اسىرۋعا دايىن ەكەندىگىن جەتكىزدى. ۆيتسە-مينيستر قۇدايبەرگەن ارىمبەك بۇل كولەمدى سۇيىتىلعان تابيعي گاز (ستگ) وندىرىسىنە باعىتتاۋ بويىنشا الەۋەتتى ينۆەستورلارمەن جۇمىس ىستەۋدى ۇسىندى.
كەڭەستە «بك «كۋاتاملونمۋناي» جشس-نىڭ 2026 جىلدان باستاپ سىناق جۇرگىزۋگە ارنالعان ۇڭعىمالاردى ىرىكتەۋ جونىندەگى جوسپارلارى تانىستىرىلدى. ال «سنپس-اي دان مۋناي» اق-پەن گاز كەن ورىندارىن يگەرۋ بويىنشا قوسىمشا كەلىسسوزدەر وتكىزۋ جوسپارلانۋدا.
جيىن بارىسىندا ەنەرگەتيكا مينيسترلىگى مەن وبلىس اكىمدىگى تاراپىنان الەۋمەتتىك-ەكونوميكالىق جاۋاپكەرشىلىك ماسەلەلەرى دە كوتەرىلدى. كومپانيالار – «كور مۇناي كومپانياسى» اق, «كەن-اي-ويل قىزىلوردا» جشس, «كريستالل مەنەدجمەنت» اق, «Sozak Oil and Gas» اق, «تۇران-بارلاۋ» جشس جانە باسقالار – كەلىسىمشارتتىق مىندەتتەمەلەرىن ورىنداۋ بارىسى جانە ءوڭىردىڭ ينفراقۇرىلىمىنا قارجىلاي ۇلەس قوسۋ باعىتىنداعى جۇمىستارى بويىنشا ەسەپ بەردى.
قۇدايبەرگەن ارىمبەك قىزىلوردا وبلىسىنىڭ گاز الەۋەتى ەلدىڭ ەنەرگەتيكالىق قاۋىپسىزدىگىن نىعايتۋعا, جاڭا جۇمىس ورىندارىن قۇرۋعا جانە وندىرىستىك ينفراقۇرىلىمدى كەڭەيتۋگە ۇلكەن مۇمكىندىك بەرەتىنىن اتاپ ءوتتى.