اۋىل شارۋاشىلىعى ءمينيسترى ايداربەك ساپاروۆ تاجىكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى حايرۋللو يبودزودامەن, سونداي-اق تاجىك اۋىل شارۋاشىلىعى بيزنەسىنىڭ وكىلدەرىمەن كەزدەستى, دەپ حابارلايدى Egemen.kz.
تاراپتار قازاقستاننان تاجىكستانعا استىق جەتكىزىلىمىن ءوزارا ءتيىمدى شارتتارمەن ۇلعايتۋ پەرسپەكتيۆالارىن, استىق نارىعى بويىنشا اقپارات الماسۋ ماسەلەلەرىن, سونداي-اق اۋىل شارۋاشىلىعى سالاسىنداعى ەكىجاقتى ىنتىماقتاستىقتى كەڭەيتۋدىڭ جولدارىن تالقىلادى.
كەلىسسوزدەردىڭ باستى تاقىرىبى - قازاقستاننان تاجىكستانعا استىق ەكسپورتىن ارتتىرۋ ماسەلەسى بولدى.
تاجىكستان - ءداستۇرلى تۇردە قازاقستاندىق استىق ونىمدەرىنىڭ نەگىزگى وتكىزۋ نارىقتارىنىڭ ءبىرى. ورتا ەسەپپەن بۇل ەلگە جىل سايىن شامامەن 1 ميلليون توننا استىق جەتكىزىلەدى.
«قازاقستان تەمىر جولى» ۇلتتىق كومپانياسى» اق دەرەكتەرى بويىنشا, 2024 جىلدىڭ قورىتىندىسىندا تاجىكستانعا استىق ەكسپورتىنىڭ كولەمى 1,3 ميلليون توننانى قۇرادى, بۇل 2023 جىلمەن سالىستىرعاندا 20%-عا كوپ.
ال 2024 جىلعى قىركۇيەكتەن 2025 جىلعى ماۋسىمعا دەيىنگى ارالىقتا جاڭا ونىمنەن 1,2 ميلليون توننا استىق ەكسپورتتالعان, بۇل وتكەن جىلدىڭ وسىنداي كەزەڭىمەن سالىستىرعاندا 1,5 ەسە ارتىق (سول كەزەڭدە — 823 مىڭ توننا بولعان).
ايداربەك ساپاروۆ ەكسپورتتى كەڭەيتۋ ماسەلەلەرىندە جان-جاقتى قولداۋ كورسەتۋگە دايىن ەكەنىن راستاپ, قازاقستاننىڭ اگروونەركاسىپتىك كەشەن سالاسىنداعى تاجىكستانمەن سەرىكتەستىكتى نىعايتۋعا مۇددەلى ەكەنىن اتاپ ءوتتى.