جامبىل وبلىسىندا فۋرمانوۆ اينالما كانالى 40 جىلدان كەيىن العاش رەت مەحانيكالىق ادىسپەن تازارتىلىپ جاتىر. سۋ رەسۋرستارى جانە يرريگاتسيا مينيسترلىگى اتالعان جوبانى تۇركىستان وبلىسىنىڭ سوزاق اۋدانىنا شۋ وزەنىنىڭ سۋىن ءتيىمدى جەتكىزۋ ماقساتىندا قولعا العان, دەپ جازادى Egemen.kz.
ۇزىندىعى 120 شاقىرىمدى قۇرايتىن, وتكىزۋ مۇمكىندىگى سەكۋندىنا 45–50 تەكشە مەترگە جەتەتىن بۇل كانال مويىنقۇم اۋدانىنا قاراستى قىلىشباي, قۇموزەك, قارابوگەت جانە سارىوزەك اۋىلدارىنىڭ تۇسىنان وتەدى.
مينيسترلىك وكىلدەرىنىڭ مالىمەتىنشە, تازالاۋ جۇمىستارى بيىل اياقتالىپ, كانال ارقىلى سۋ جىبەرۋ قايتا جاندانادى. بۇل شۋ وزەنىنەن ەكولوگيالىق ماقساتتا بولىنەتىن سۋدىڭ تيىمدىلىگىن ارتتىرىپ, سوزاق اۋدانىنداعى تابيعي احۋالدى جاقسارتۋعا سەپ بولماق.
«سۋ رەسۋرستارى جانە يرريگاتسيا مينيسترلىگى جىل سايىن تاسوتكەل سۋ قويماسىنان سوزاق اۋدانىنىڭ ەكوجۇيەسىن قولداۋ ءۇشىن شامامەن 200 ملن تەكشە مەتر سۋ جىبەرەدى. كانالدى تازارتۋ سۋ جىبەرۋدىڭ تيىمدىلىگىن ارتتىرىپ, 40 جىلدان بەرى العاش رەت ونى ءوز ماقساتىنا ساي پايدالانۋعا مۇمكىندىك بەرەدى. سونىمەن قاتار كانال بويىنداعى ەلدى مەكەندەردىڭ سۋعا قولجەتىمدىلىگى جاقسارادى. نىساندا جۇرگىزىلىپ جاتقان جۇمىستار مينيسترلىكتىڭ قاتاڭ باقىلاۋىندا», دەدى ۆەدومستۆو باسشىسى نۇرجان نۇرجىگىتوۆ.
ايتا كەتەيىك, بىلتىر قىركۇيەكتەن بيىلعى ءساۋىردىڭ سوڭىنا دەيىن شۋ وزەنى ارقىلى سوزاق اۋدانىنا 1,5 ملرد تەكشە مەتردەن استام سۋ جەتكىزىلگەن.