قىتايدىڭ وڭتۇستىك-باتىسىنداعى گۋيچجوۋ پروۆينتسياسىندا تولاسسىز جاۋىن-شاشىن سالدارىنان سۋ تاسقىنى بولىپ, 80 مىڭنان استام تۇرعىن قاۋىپسىز ايماقتارعا كوشىرىلدى, دەپ حابارلايدى Egemen.kz سينحۋا اگەنتتىگىنە سىلتەمە جاساپ.
قارعىن سۋدان جۋنتسزيان جانە تسۋنتسزيان ۋەزدەرى قاتتى زارداپ شەككەن. اپات سالدارىنان جۋنتسزيان ۋەزىندە 48 900, ال تسۋنتسزياندا 32 000 ادام ۋاقىتشا ەۆاكۋاتسيالانعان. ەكى ۋەزدە دە توتەنشە جاعداي رەجيمى ەڭ جوعارى ءبىرىنشى دەڭگەيگە كوتەرىلگەن.
حابارلاعانداي, دۋليۋ وزەنىندەگى سۋ دەڭگەيى قاۋىپتى مەجەدەن 6,68 مەترگە كوتەرىلگەن.
«قۇتقارۋ جۇمىستارىنا ءورت سوندىرۋشىلەر مەن ەرىكتىلەردەن قۇرالعان توپتار تارتىلدى. ولار ارنايى قايىقتار مەن قۇرال-جابدىقتار كومەگىمەن تۇرعىنداردى ەۆاكۋاتسيالاپ جاتىر», دەلىنگەن رەسمي حابارلامادا.
بۇدان بولەك, پروۆينتسيانىڭ توتەنشە جاعدايلار دەپارتامەنتى زارداپ شەككەن ايماقتارعا گۋمانيتارلىق كومەك جىبەرگەن. ونىڭ ىشىندە 30 000 بوتەلكە اۋىز سۋ مەن 10 000 پورتسيا تەز دايىندالاتىن كەسپە بار. جۇكتەمەلەر جوعارى جىلدامدىقتى پويىزدار مەن كولىك ارقىلى جەتكىزىلگەن.
سونداي-اق گۋيچجوۋدا نوسەر جاڭبىر سالدارىنان ساندۋ ۋەزىندەگى تاس جول كوپىرىنىڭ ءبىر بولىگى وپىرىلىپ تۇسكەن. قازىرگى ۋاقىتتا ادام شىعىنى تۋرالى مالىمەت تىركەلمەگەن.
ەستەرىڭىزگە سالا كەتەيىك, بۇعان دەيىن قىتايدا 2024 جىلعى ءساۋىر ايىندا كۇشتى سۋ تاسقىنى بولىپ, 50 مىڭ ادام ەۆاكۋاتسيالانعان, 11 ادام حابار-وشارسىز كەتكەن ەدى.