ءماجىلىس دەپۋتاتى تاڭساۋلە سەرىكوۆ ءوزىنىڭ دەپۋتاتتىق ساۋالىن پرەمەر-ءمينيستردىڭ ورىنباسارى ەرمەك كوشەرباەۆقا جولدادى. ول قاراپايىم ەڭبەك ادامدارىنىڭ مارتەبەسى مەن جاعدايى تۋرالى ماسەلەلەردى قوزعادى, دەپ جازادى Egemen.kz.
مەملەكەت باسشىسى 2025 جىلدى – «جۇمىسشى ماماندىقتارى جىلى», ياعني ەڭبەك ادامى جىلى دەپ جاريالاۋى – ماڭداي تەرىن توگىپ, تىرشىلىكتىڭ تىنىسىن قامتاماسىز ەتىپ وتىرعان قاراپايىم جۇمىسشىلارعا دەگەن قۇرمەتتىڭ بيىك بەلگىسى ەكەنىن اتاپ وتكەن ت.سەرىكوۆ كەز كەلگەن مەكەمەدەگى ەدەن جۋشى, تەحنيكالىق قىزمەتكەر, گاردەروبشى, قاراۋىل, ۆاحتەر, اۋلا سىپىرۋشى سەكىلدى جۇمىسشىلاردىڭ مارتەبەسى مەن جاعدايى قازىرگى تاڭدا وزەكتى ەكەنىنە توقتالدى.
«بۇگىندە بۇل ساناتتاعى قىزمەتكەرلەردىڭ ەڭبەكاقىسى ەلىمىزدەگى ورتاشا جالاقى كورسەتكىشىنەن الدەقايدا تومەن. كوپ جاعدايدا ولار اۋىر فيزيكالىق ەڭبەكپەن اينالىسا تۇرا, الەۋمەتتىك جەڭىلدىكتەردەن, كاسىبي قورعاۋدان جانە كوتەرمەلەۋدەن تىس قالىپ جاتادى. ەگەر وسى قىزمەتكەرلەر ءبىر كۇن جۇمىس جاساماسا كوشە لاستانىپ, مەكەمە ءىشى كىرلەنىپ, جيھازدار شاڭ بولىپ ءبىز كۇندەلىكتى كورىپ جۇرگەن تازالىقتىڭ ءسانى كەتەر ەدى. ءبىز نەگە وسىعان ءمان بەرىپ قارامايمىز؟ اۋلا سىپىرۋشى, تەحنيكالىق قىزمەتكەرلەردىڭ ەڭبەك اقىسى از, جەڭىلدىك جوق, ءتىپتى ادامدار اراسىندا قاراپايىم ەدەن جۋشى دەپ مەنسىنبەي قاراۋشىلىق باسىمىراق. بۇگىندە بۇل ساناتتاعى ەڭبەككەرلەردىڭ جالاقىسى تومەن», دەدى دەپۋتات.
دەپۋتاتتىڭ ايتۋىنشا ولاردىڭ الەۋمەتتىك مارتەبەسى ناقتى ايقىندالماعان, ساۋىقتىرۋ مەن تىنىعۋعا مۇمكىندىگى شەكتەۋلى, كاسىبي دامۋعا جاعدايى قاراستىرىلماعان.
«ال ەندى وسى قىزمەتكەرلەردىڭ مارتەبەسىن قالاي كوتەرەمىز؟ ول ءۇشىن كەز كەلگەن مەملەكەتتىك, كۆازيمەملەكەتتىك مەكەمەلەر وسى ساناتتاعى قىزمەتكەرلەرگە جىلىنا ءبىر رەت تۇراقتى تۇردە مەكەمە ەسەبىنەن ساناتوريگە جولداما جانە 13 ءشى جالاقىسىن بەرۋ كەرەك. سونىمەن قاتار ەڭبەك دەمالىسىنا شىققاندا 2 ايلىق ەمدىك پوسوبياسىن بەرۋ قاجەت. سەبەبى ولاردا ونسىز دا ەڭبەك اقىسى از. جانە مىندەتتى تۇردە قايتا دايارلاۋ جانە كاسىبي دامۋ كۋرستارىنا اقىسىز قاتىسۋىنا جاعداي جاساۋ كەرەك. بۇل- ولارعا ماماندىقتارىن وزگەرتۋگە مۇمكىندىك بەرەدى. ال زەينەتكە شىققان ارداگەرلەرگە مەكەمەنىڭ ارنايى قۇرمەتتى اتاعى نە ماراپاتىن ەنگىزۋ قاجەت», دەدى ءماجىلىس دەپۋتاتى.
تاڭساۋلە عابدىماناپ ۇلىنىڭ سوزىنشە كۇن سايىن تاپ-تازا كەڭسەگە, تازا جولعا, جىلى قارسى الۋعا ۇيرەنگەنبىز. بىراق سول تازالىق پەن ءتارتىپتىڭ ارتىندا ءۇنسىز جۇرگەن مىڭداعان ەڭبەك ادامى بار ەكەنىن ەستەن شىعارماۋىمىز كەرەك. بۇل – تەك ماتەريالدىق ەمەس, ادامگەرشىلىك پەن ادىلەتتىلىكتىڭ دە ماسەلەسى.
«جۇمىسشى ماماندىقتارى جىلى» بوس ۇرانعا اينالماي, ناقتى ىستەرمەن كورىنىس تابۋى ءتيىس. وعان العاشقى قادام – ەڭ تومەنگى بۋىندا ەڭبەك ەتىپ جۇرگەن وسى ماماندارعا قامقورلىقتان باستالۋى قاجەت», دەپ ايتقان دەپۋتات بىرقاتار ۇسىنىستارىن ايتتى.
«اتالعان ساناتتاعى قىزمەتكەرلەرگە ەڭبەكاقىنى ارتتىرۋ. ولاردى «قوعامدىق ماڭىزى بار جۇمىسشى» رەتىندە زاڭنامالىق تۇرعىدا اتاۋ بەرۋ. جىل سايىنعى مەملەكەتتىك كۆوتا ارقىلى تەگىن ساۋىقتىرۋ شيپاجايلارىنا (ساناتوري) جولداما بەرۋ جۇيەسىن ەنگىزۋ – بۇل ولاردىڭ دەنساۋلىعىن قالپىنا كەلتىرىپ, قوعامداعى قادىر-قاسيەتىن ارتتىراتىنى انىق. مامانداردى وقىتۋ, قايتا دايارلاۋ جانە كاسىبي دامۋ كۋرستارىنا اقىسىز قاتىسۋىنا جاعداي جاساۋ. ارداگەر تەحنيكالىق قىزمەتكەرلەرگە (زەينەتكە شىققان ەدەن جۋشى, اۋلا سىپىرۋشى, گاردەروبشى, ت.ب.) ارنالعان قۇرمەتتى اتاق نەمەسە توسبەلگى ەنگىزۋ مۇمكىندىگىن قاراستىرۋ», دەپ ۇسىنىستارمەن تۇيىندەدى «اۋىل» پارتياسى فراكتسيا دەپۋتاتتارى اتىنان تاڭساۋلە سەرىكوۆ.