بيىل 24 ماۋسىمدا قازاقستان رەسپۋبليكاسى حالىقارالىق كاپيتال نارىعىنا 2,5 ملرد. اقش دوللارىنداعى ەگەمەندى ەۋرووبليگاتسيالاردى ورنالاستىردى, ونىڭ ىشىندە: 7 جىل مەرزىمگە 1,35 ملرد اقش دوللارى سوماسىنداعى ترانش, كۋپوندىق مولشەرلەمەسى – 5%; ال 12 جىل مەرزىمگە 1,15 ملرد اقش دوللارى سوماسىنداعى ترانش, كۋپوندىق مولشەرلەمەسى – 5,5%, دەپ حابارلايدى Egemen.kz قارجى مينيسترلىگىنىڭ ءباسپاسوز قىزمەتىنە سىلتەمە جاساپ.
ۇسىنىستىڭ الدىندا قر قارجى مينيسترلىگى لوندوندا روۋدشوۋ وتكىزىپ, وعان شامامەن 180 ءىرى ينۆەستور قاتىستى. ەۋرووبليگاتسيالارعا دەگەن سۇرانىس ۇسىنىستان ەكى ەسە اسىپ ءتۇستى, بۇل ەۋروپا, اقش, ازيا جانە تاياۋ شىعىس ەلدەرىنەن كەلگەن ارتاراپتاندىرىلعان ءارى ساپالى ينۆەستورلاردىڭ جوعارى قىزىعۋشىلىعىن كورسەتتى.
مۇناي باعاسىنىڭ كۇرت تومەندەۋى, گەوساياسي تۇراقسىزدىق جانە بازالىق مولشەرلەمەلەردىڭ قۇبىلمالىلىعى سياقتى كۇردەلى نارىقتىق جاعدايلارعا قاراماستان, قارجى مينيسترلىگى وتە باسەكەگە قابىلەتتى تابىستىلىقپەن ورنالاستىرۋعا قول جەتكىزدى. الىنعان كىرىستىلىك دەڭگەيى نەسيەلىك رەيتينگى جوعارى (A/AA) پولشا, ساۋد ارابياسى, چيلي سياقتى ەلدەردىڭ كورسەتكىشتەرىمەن سالىستىرۋعا كەلەدى جانە BBB رەيتينگىندەگى مەكسيكا, پەرۋ, ۆەنگريا سەكىلدى ەلدەردەن ايتارلىقتاي تومەن بولدى.
اتاپ ايتقاندا, قازاقستان بيىلعى جىلى A/BBB رەيتينگىندەگى ەلدەر اراسىندا ەڭ تومەنگى مولشەرلەمەلەردىڭ بىرىمەن وبليگاتسيالاردى ورنالاستىرۋ بويىنشا رەكورد ورناتتى.
مۇنداي ءتيىمدى تابىستىلىق دەڭگەيلەرىنە ەلدىڭ مىقتى ماكروەكونوميكالىق كورسەتكىشتەرى – تۇراقتى ەكونوميكالىق ءوسىم, تومەن مەملەكەتتىك قارىز جانە جوعارى سىرتقى رەزەرۆتەر ارقاسىندا قول جەتكىزىلدى.
مەملەكەت باسشىسىنىڭ باستاماسىمەن جۇرگىزىلىپ جاتقان سالىق-بيۋدجەت سالاسىنداعى رەفورمالار مەن ساياسي وزگەرىستەر حالىقارالىق ينۆەستورلاردىڭ قازاقستانعا دەگەن سەنىمىن ەداۋىر ارتتىردى.
بۇل ورنالاستىرۋ بولاشاقتا ۇلتتىق كومپانيالار مەن جەكە سەكتور ەميتەنتتەردىڭ شىعارىلىمى ءۇشىن بەنچمارك بەلگىلەۋگە مۇمكىندىك بەردى.
ەۋرووبليگاتسيالار لوندون قور بيرجاسىندا, استانا حالىقارالىق قارجى ورتالىعىنىڭ بيرجاسىندا جانە قازاقستان قور بيرجاسىندا ليستينگكە ەنگىزىلەدى.