شومىلۋ ماۋسىمى باستالعالى بەرى وبلىستىق توتەنشە جاعدايلار دەپارتامەنتى, ءبىلىم باسقارماسى مەن قالا اكىمدىگىنىڭ قىزمەتكەرلەرىنەن جاساقتالعان توپتار پروفيلاكتيكالىق جۇمىستاردى كۇشەيتتى. ولار كانالدار مەن سۋ ايدىندارىنا رەيد ۇيىمداستىرىپ كەلەدى, دەپ حابارلايدى Egemen.kz.
قالا اۋماعىندا سۋعا شومىلۋعا بولمايتىن 16 ۋچاسكە بار. بىراق اپتاپقا شىداماعان ۇلكەن دە, كىشى دە ونداي ەسكەرتۋلەردى ەلەي بەرمەيدى.
وبلىستىق ءبىلىم باسقارماسىنىڭ ءبولىم باسشىسى پاراسات جاڭابەرگەنوۆتىڭ ايتۋىنشا رەيدتەر مامىر ايىنىڭ 25-نەن باستاپ كۇندەلىكتى ۇيىمداستىرىلىپ كەلەدى. دەگەنمەن قاداعالاۋسىز قالعان بالالار تىيىم سالىنعان جەرلەردە شومىلىپ, ونىڭ ارتى وكىنىشتى جاعدايلارعا ۇلاسىپ جاتقان وقيعالار بار. «ۇلكەندەر بالالاردى باقىلاۋدى كۇشەيتىپ, ولاردى بوس ۋاقىتىندا تەگىن ۇيىرمەلەرگە قاتىستىرسا», دەيدى ول.
وبلىستىق تجد ازاماتتىق قورعانىس باسقارماسىنىڭ باستىعى جاندوس جۇگىنىسوۆ جىل باسىنان بەرى ءتۇرلى سەبەپتەرمەن 14 ادام سۋعا كەتكەنىن ايتادى, ونىڭ جەتەۋى بالا. رەيدتەر بارىسىندا 13 ازاماتقا ەسكەرتۋ جاسالىپ, كەيبىر تۇرعىندارعا حاتتامالار تولتىرىلعان.
تۇرعىندار قاۋىپسىزدىگى ءۇشىن ۇيىمداستىرىلاتىن رەيد جۇمىستارى جالعاسا بەرەدى.