قازاقستاندا العاش رەت تەحنيكالىق جانە كاسىپتىك ءبىلىم بەرۋ ۇيىمدارىنىڭ ستۋدەنتتەرى حالىقارالىق دەڭگەيدە كاسىبي قۇزىرەتتەرىن راستاي باستادى. بۇل باستاما جۇمىسشى ماماندىقتار جىلى اياسىندا قولعا الىنىپ, ءبىلىم الۋشىلاردىڭ ناقتى داعدىلارىن مويىنداۋدىڭ جاڭا قۇرالى رەتىندە ەنگىزىلىپ جاتىر, دەپ حابارلايدى Egemen.kz.
وقۋ-اعارتۋ مينيسترلىگىنىڭ حابارلاۋىنشا, جاڭا جۇيە Certiport حالىقارالىق پلاتفورماسى نەگىزىندە ىسكە قوسىلىپ, قازىرگى تاڭدا ەلدىڭ بەس كوللەدجىندە پيلوتتىق رەجيمدە جۇزەگە اسىرىلىپ جاتىر. العاشقى رەسمي تەستىلەۋ ورتالىعى «Talap» كوممەرتسيالىق ەمەس اكتسيونەرلىك قوعامى بازاسىندا اشىلعان.
ايتا كەتەيىك, Certiport – ۇلىبريتانيالىق Pearson كومپانياسىنىڭ قۇرامىنا كىرەتىن, كەڭسە باعدارلامالارى مەن تسيفرلىق تەحنولوگيالار سالاسىندا سەرتيفيكات بەرەتىن الەمگە تانىمال پلاتفورما. اتالعان سەرتيفيكاتتار 150-دەن استام ەلدە مويىندالىپ, ستۋدەنتتەرگە شەتەلدە تاعىلىمدامادان وتۋگە, جۇمىسقا ورنالاسۋعا جانە جاھاندىق ەڭبەك نارىعىنا شىعۋعا جول اشادى.
«قازىرگى تاڭدا كوللەدج تۇلەكتەرىنە تەك ديپلوم ەمەس, ناقتى داعدىلارىن راستاۋى دا قاجەت بولۋدا. حالىقارالىق سەرتيفيكاتتاۋ ولارعا قازاقستاندا دا, شەتەلدە دە جاڭا مانساپتىق مۇمكىندىكتەر اشادى», دەدى قر وقۋ-اعارتۋ مينيسترلىگىنىڭ تەحنيكالىق جانە كاسىپتىك ءبىلىم بەرۋ دەپارتامەنتىنىڭ ديرەكتورى اسەت مۇحانبەتوۆ.
العاشقى ەمتيحان سەسسياسى ASTANA POLYTECHNIC جوعارعى كوللەدجىنىڭ بازاسىندا وتكەن. تەستىلەۋ ناتيجەسىندە ءتورت ستۋدەنت ءوز بىلىكتىلىگىن ءساتتى دالەلدەپ, حالىقارالىق سەرتيفيكاتتارعا يە بولعان. اتاپ ايتساق, دميتري كارپيۋك – كيبەرقاۋىپسىزدىك مامانى, ارسەني تسىپلاكوۆ – كيبەرقاۋىپسىزدىك مامانى, راشيد حيسماتۋللين – كيبەرقاۋىپسىزدىك مامانى جانە ادەمى قابدوللا – JavaScript باعىتىنداعى IT-مامان.