الەم كۋبوگى استانادا وتەدى

ەلىمىزدىڭ قۇراماسى قازىرگى كەزدە دايىندىقتى قىزۋ جۇرگىزىپ جاتىر. ۇلتتىق قۇرامانىڭ باس باپكەرى قايرات ءساتجانوۆ اس­تانانىڭ شارشى الاڭىنا مىنا شا­كىرتتەرىن شىعارۋدى ءجون كوردى: 50 كگ – سانجار تاشكەنباي, 55 كگ – ماحمۇد سابىرحان, 60 كگ – سەرىك تەمىرجانوۆ, 65 كگ – ەرتۋعان زەينۋللينوۆ, 70 كگ – ابىلايحان ءجۇسىپوۆ, 75 كگ – سابىرجان اقكالىقوۆ, 80 كگ – نۇربەك ورالباي, 85 كگ – بەكزات نۇرداۋلەتوۆ, 90 كگ – ساعىندىق توعامباي, + 90 كگ – ايبەك ورالباي.

اتالعان بىلعارى قولعاپ شەبەر­لەرىنىڭ بارلىعى دا بۇگىنگى تاڭداعى ەڭ ۇزدىك سپورتشىلار. قۇرامادا تەك اتاقتى ساكەن بيبوسىنوۆ پەن اسلان شىمبەرگەنوۆ, جاس دارىن تورەحان سابىرحان عانا جوق. ولاردىڭ نە سەبەپ­تى باس كوماندانىڭ ساپىنا ەنبەي قالعانى بەلگىسىز. قالعاندارىنىڭ ءتورت كوزى تۇگەل. نۇربەك ورالباي پاريج وليمپياداسىنىڭ كۇمىس جۇلدەگەرى, 2023 جىلعى الەم چەمپيونى. سانجار تاشكەنباي, ماحمۇد سابىرحان, بەكزات نۇرداۋلەتوۆ كەزىندە تورتكۇل دۇنيەنىڭ تەڭدەسسىزى دەپ تانىلعان. بەكزات بۇل اتاققا 2019 جىلى ەكاتەرينبۋرگتە قول جەتكىزسە, سانجار مەن ماحمۇد 2023 جىلى تاشكەنتتە توپ جاردى. ابىلايحان وليمپيا ويىندارىنا ەكى رەت قاتىسىپ, الەم چەمپيوناتىندا ءۇش رەت قولا مەدالدى ولجالاعان ساقا سپورتشى. سەرىك وسىدان ءتورت جىل بۇرىن بەلگرادتاعى بايراقتى باسەكەدە ۇزدىك ۇشتىكتى تۇيىندەدى. ايبەكتىڭ ازيانىڭ ەكى دۇركىن چەمپيونى دەگەن اتاعى بار. ەرتۋعان مەن ساعىندىق ازيا ويىندارىنىڭ قولا جۇلدەگەرلەرى. سابىرجان جاستار اراسىنداعى الەم بىرىنشىلىگىنىڭ جەڭىماپازى, ازيا چەمپيوناتىنىڭ (U-20) ءفيناليسى.

ەلىمىزدىڭ قۇراماسى ساپىنا وسىنداي تالاي دۇرمەكتەن ءوتىپ, كوپتەگەن ءدۇبىرلى دودادا ابدەن ىسىلعان دۇل­دۇلدەر ەنىپ وتىر. ولاي بولسا, ءوز جان­كۇيەرلەرىمىزدىڭ كوز الدىندا وتەتىن الەم كۋبوگىندە قازاقتىڭ جامپوز جىگىت­تەرى وزدەرىنىڭ مىقتىلىعىن تۇبەگەيلى مويىنداتۋعا ءتيىس.

بيىلعى جىلدىڭ ءساۋىر ايىندا برا­زيليادا وتكەن الەم كۋبوگىنىڭ تۇساۋ­­كە­­سە­رىندە ەلىمىزدىڭ ەرلەر قۇرا­ما­سى ەكى التىن, ءبىر قولا مەدال يە­لەندى. نۇرسۇلتان التىنبەك (55 كگ) پەن داۋ­لەت تولەمىسوۆ (85 كگ) توپ جارىپ, دياس مولجىگىتوۆ (80 كگ) قولاعا قول جەتكىزدى. جالپى ەسەپتە جەر­لەستەتەرىمىز وزبەكستان (5 التىن+2 كۇمىس+1 قولا) مەن رينگ قوجايىن­دارىنان (2+2+1) قالىپ قويدى. ەكىنشى كەزەڭ پولشادا ۇيىمداستىرىلدى. ۆارشاۆادا دا وزبەكتەر (6+1+2) الدىنا جان سالمادى. ەكىنشى, ءۇشىنشى ورىنداردا – جارىس قوجايىندارى (5+3+10) مەن يتاليا (3+3+1). بۇل جارىسقا ەلىمىزدىڭ بوكس­شىلارى قاتىسقان جوق.