شىمكەنت قالاسىندا سوت شەشىمىمەن كەزىندە زاڭسىز جەكەشەلەنىپ كەتكەن جەرلەر مەملەكەتكە قايتارىلىپ, ال ونداعى قۇرىلىس نىساندارى ءسۇرىلىپ جاتىر. ماسەلەن قالانىڭ قاق ورتاسىنداعى «قيال الەمى» ساياباعى مەملەكەتكە ءوتىپ, ونداعى كوممەرتسيالىق نىساندار زاڭسىز دەپ تانىلدى, دەپ حابارلايدى Egemen.kz.
شاھاردىڭ كورىكتى اۋماعى – اباي ساياباعىندا ورنالاسقان بىرقاتار زاڭسىز قۇرىلىس نىساندارىنا قاتىستى دا ءدال وسى سەكىلدى سوت وتىرىستارى ءوتتى. بۇل جولى دا قالا اكىمدىگى ءتيىستى تالاپ ارىزدار بەرىپ, زاڭ اياسىندا شارالار قابىلدانۋىن سۇراعان.
تالاپ ارىزعا ساي شىمكەنت قالاسىنىڭ مامانداندىرىلعان اۋدانارالىق ەكونوميكالىق سوتى 2024 جىلعى 29 قاراشادا «سايات» وندىرىستىك كووپەراتيۆىنىڭ «سوحو» كافەسىن ءوز ەسەبىنەن بۇزۋ تۋرالى شەشىم شىعارادى. 2025 جىلعى 12 اقپاندا شىمكەنت قالالىق سوتى دا بۇل شەشىمدى وزگەرىسسىز قالدىرادى. ەندى بيىل مامىر ايىندا قالالىق اكىمدىك پەن كاسىپكەر سوتتا تاتۋلاسىپ, ءدامحانانى مەملەكەت مەنشىگىنە وتكىزۋ تۋرالى ۇيعارىم شىعارىلادى.
اباي ساياباعى اۋماعىندا ورنالاسقان «INGOLSTAD» كافەسىنە قاتىستى دا سوت شەشىم قابىلدادى. 2024 جىلعى 18 جەلتوقساندا شىمكەنت قالاسىنىڭ مامانداندىرىلعان اۋدانارالىق ەكونوميكالىق سوتى ءدامحانانى جاۋاپكەردىڭ ەسەبىنەن ماجبۇرلەپ بۇزۋ تۋرالى تالاپتى قاناعاتتاندىرعان بولاتىن. بۇل شەشىم بيىل ناۋرىزدا اپەللياتسيالىق ساتىدا قارالىپ, وزگەرىسسىز قالدىرىلدى. ءارى سوت القاسى تاراپتاردىڭ مەدياتسيا تارتىبىمەن تاتۋلاسۋ كەلىسىمىن ماقۇلدامادى. قازىرگى تاڭدا اتالعان ىسكە بايلانىستى تاتۋلاسۋ كەلىسىمىن بەكىتۋ تۋرالى ءوتىنىش شىمكەنت قالاسىنىڭ مامانداندىرىلعان اۋدانارالىق ەكونوميكالىق سوتىنا قايتا جولدانىپ, ءىس قارالۋ ۇستىندە.
ال, «كوليزەي» كافەسىنە قاتىستى شىمكەنت قالاسىنىڭ مامانداندىرىلعان اۋدانارالىق ەكونوميكالىق سوتى 2025 جىلعى 24 ساۋىردەگى شەشىمىمەن مەملەكەتتىك ورگانع ياعني قالالىق اكىمدىكتىڭ تالاپ ارىزىن قاناعاتتاندىرمادى. بۇل شەشىمگە قارسى اكىمدىك تاراپىنان اپەللياتسيالىق شاعىم بەرىلىپ, قازىرگى ۋاقىتتا ءىس سوتتا قارالىپ جاتىر.
ءوز كەزەگىندە جاۋاپتى سالا وكىلدەرى اتالعان سوت ىستەرى قالا اۋماعىنداعى زاڭسىز قۇرىلىستاردى جويۋ, قالا كەلبەتىن ساقتاۋ مەن جەر زاڭناماسىن بۇزۋعا جول بەرمەۋ ماقساتىندا جۇرگىزىلىپ جاتقان جۇمىستار ەكەنىن جەتكىزدى.
شىمكەنت