قۇقىقتىق مەملەكەت قۇرۋ تەك زاڭداردى قابىلداۋمەن شەكتەلمەيدى, ول ءار ازاماتتىڭ ءوز قۇقىعىن ءبىلىپ, قورعاي الاتىن دەڭگەيگە جەتۋىمەن ولشەنەدى. ەندەشە, «قۇقىقتىق ساۋاتتىلىق» ۇعىمى مەن حالىقتىڭ ونى قانشالىقتى بىلەتىنىنە توقتالايىق.
كونستيتۋتسيامىزدا «قازاقستان رەسپۋبليكاسى ءوزىن قۇقىقتىق جانە الەۋمەتتىك مەملەكەت رەتىندە ورنىقتىرادى», دەلىنگەن. ادىلەت مينيسترلىگىنىڭ مالىمدەۋىنشە, ازاماتتاردىڭ قۇقىقتىق ساۋاتتىلىعى جىل سايىن ارتىپ كەلەدى. بىراق بۇل ءوسىم بارلىق ەل بويىنشا بىركەلكى ەمەس. ماسەلەن, قالا تۇرعىندارىنىڭ قۇقىقتىق ساۋاتتىلىق دەڭگەيى اۋىلدىق ايماقتارعا قاراعاندا الدەقايدا جوعارى ەكەنى جاسىرىن ەمەس. بۇل ءبىلىم بەرۋ مۇمكىندىكتەرىنىڭ, الەۋمەتتىك جەلىلەرگە قولجەتىمدىلىكتىڭ جانە قۇقىقتىق اقپارات كوزدەرىنىڭ ءارتۇرلى بولىپ تارالۋىنا بايلانىستى.
2022 جىلى مينيسترلىكتىڭ جۇرگىزگەن ساۋالناماسىنا سايكەس, ەلىمىزدەگى ءاربىر ءۇشىنشى ازامات ءوزىنىڭ نەگىزگى كونستيتۋتسيالىق قۇقىقتارىن تولىق بىلمەيتىنىن مويىنداعان. بۇل قۇقىقتىق مەملەكەتتى نىعايتۋ جولىندا ەلەۋلى كەدەرگى ەكەنى انىق. قاراپايىم تۇرمىستىق جاعدايدىڭ وزىندە قۇقىقتىق ساۋاتتىڭ تومەندىگى ازاماتتارعا قيىندىقتار تۋدىرادى. ماسەلەن, ەڭبەك شارتىنسىز جۇمىسقا ورنالاسقان ازامات جۇمىس بەرۋشى الدىندا ءوز قۇقىعىن قورعاي المايدى, سەبەبى قۇجاتتىق نەگىزى جوق.
سونداي-اق قازىر الەۋمەتتىك مەسسەندجەرلەردە «حالىقتىق زاڭگەرلەر» كوبەيىپ كەتكەن. ولار كوبىنە ازاماتتارعا بەيرەسمي ءارى ءجيى قاتە كەڭەس بەرەدى. ساراپشىلاردىڭ ايتۋىنشا, سوڭعى جىلدارى ازاماتتىق ىستەر بويىنشا جىبەرىلگەن قاتەلىكتەردىڭ بىرقاتارى وسىنداي بەيرەسمي كەڭەستەرگە سەنۋدىڭ سالدارىنان بولعان. وسىعان وراي بۇگىندە مەملەكەت تاراپىنان بىرقاتار ناقتى باستامالار قولعا الىنىپ جاتىر. ماسەلەن 2023 جىلدان بەرى جۇزەگە اسىرىلىپ جاتقان «زاڭ ۇستەمدىگى» جوباسى اياسىندا «ادىلدىك جولى» قوعامدىق بىرلەستىگى ەلىمىزدىڭ بارلىق وڭىرىندە قۇقىقتىق ءتۇسىندىرۋ جۇمىستارىن جۇرگىزىپ كەلەدى. جوبانىڭ باستى ماقساتى حالىقتىڭ قۇقىقتىق مادەنيەتىن ارتتىرۋ, جەمقورلىققا قارسى باعىت قالىپتاستىرۋ جانە ازاماتتاردىڭ زاڭ اياسىندا ارەكەت ەتۋىنە جاعداي جاساۋ. جىل سوڭىنا دەيىن 300 مىڭنان استام ازاماتتى قۇقىقتىق ساۋاتتىلىققا وقىتۋ جوسپارلانعان. بۇل باعىتتا جاڭا تەحنولوگيالار دا قولدانىلىپ جاتىر. ماسەلەن, جاساندى ينتەللەكت نەگىزىندە قۇرىلعان «ايتەكە» ۆيرتۋالدى كومەكشى ىسكە قوسىلىپ, ازاماتتارعا قۇقىقتىق كەڭەس بەرىپ, قۇجاتتاردى راسىمدەۋگە سەپتىگىن تيگىزىپ ءجۇر.
سونداي-اق قازىر ەلىمىزدىڭ بارلىق وڭىرىندە زاڭ ورتالىقتارى جۇمىس ىستەيدى. بۇل ورتالىقتاردا زاڭگەرلەر ازاماتتاردى قابىلداپ, وتىنىشتەرىن قارايدى.
قۇقىقتىق ساۋاتتى ازامات – ادىلەتتى قوعامنىڭ تىرەگى. سول سەبەپتى بۇل باعىتتاعى جۇمىستى قوعام بولىپ بىرگە اتسالىسۋىمىز كەرەك.
كامشات تولەگەنوۆا,
ل.گۋميليوۆ اتىنداعى ەۇۋ-دىڭ 2-كۋرس ستۋدەنتى