الەمنىڭ جەتەكشى جوعارى وقۋ ورىندارىن ساراپقا سالاتىن بەدەلدى QS World University Rankings 2026 ناتيجەلەرى جاريالاندى. بۇل جولعى جاھاندىق رەيتينگتە اباي اتىنداعى قازاق ۇلتتىق پەداگوگيكالىق ۋنيۆەرسيتەتى 628-ورىنعا كوتەرىلىپ, وتكەن جىلعى كورسەتكىشپەن سالىستىرعاندا بىردەن 43 ساتىعا العا جىلجىدى. بۇل – ۋنيۆەرسيتەت تاريحىنداعى ەلەۋلى سەرپىلىستەردىڭ ءبىرى, دەپ جازادى Egemen.kz.
وسىلايشا, اباي ۋنيۆەرسيتەتى الەمدىك ۇزدىك 650 ۋنيۆەرسيتەت قاتارىنا ەنىپ, ەلىمىزدەگى ۇزدىك بەس جوعارى وقۋ ورنىنىڭ ءبىرى رەتىندە ءوز ورنىن ايقىن نىقتادى.
اتالعان جەتىستىك – وقۋ ورنىنىڭ ءبىلىم بەرۋ ساپاسى مەن باسقارۋ تيىمدىلىگىن ارتتىرۋ باعىتىنداعى ۇزاق جىلدىق جۇيەلى ەڭبەگىنىڭ جەمىسى. رەيتينگ ناتيجەسىنە وڭ ىقپال ەتكەن باستى فاكتورلار قاتارىندا – وقىتۋشى مەن ستۋدەنت اراسىنداعى وڭتايلى اراقاتىناس, جۇمىس بەرۋشىلەر اراسىنداعى جوعارى بەدەل, سونداي-اق شەتەلدىك پروفەسسورلار ۇلەسىنىڭ ارتۋى ەرەكشە اتاپ وتىلەدى.
اباي ۋنيۆەرسيتەتى ءوزىنىڭ ۇزاق مەرزىمدى دامۋ ستراتەگياسىنا سايكەس, پەداگوگيكالىق ءبىلىم بەرۋدىڭ ۇلتتىق كوشباسشىسى رەتىندە حالىقارالىق دەڭگەيدەگى بەدەلىن نىعايتىپ كەلەدى. ۋنيۆەرسيتەتتىڭ QS رەيتينگىندەگى بۇل ىلگەرىلەۋى – ساپالى ءبىلىم بەرۋ, عىلىمي-زەرتتەۋ جەتىستىكتەرى, حالىقارالىق سەرىكتەستىك جانە اكادەميالىق ۇتقىرلىق باعىتتارىنداعى ناتيجەلى جۇمىستىڭ ايقىن كورىنىسى.