مەملەكەت باسشىسىنىڭ بيىل 15 ساۋىردە قول قويعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ 16 ماۋسىمدا كۇشىنە ەندى, دەپ حابارلايدى Egemen.kz.
تۋريزم جانە سپورت مينيسترلىگى ازىرلەگەن اتالعان قۇجاتتىڭ نەگىزگى جاڭالىعىنىڭ ءبىرى – قر-نىڭ ازاماتى ەمەس سپورتشىلاردى مەملەكەتتىك بيۋدجەت جانە كۆازيمەملەكەتتىك سەكتور سۋبەكتىلەرىنىڭ قاراجاتى ەسەبىنەن قارجىلاندىرۋعا تىيىم سالۋ. بۇل نورما ەل ازاماتتارىنىڭ سپورتتاعى جانە قارجىلىق قولداۋداعى باسىمدىعىن قامتاماسىز ەتۋگە باعىتتالعان.
ء«بىز ەڭ الدىمەن وتاندىق سپورتشىلاردىڭ ءتيىستى دەڭگەيدە دايىندالىپ, جوعارى جەتىستىكتەرگە جەتۋىنە جاعداي جاساعىمىز كەلەدى», دەگەن ەدى بۇعان دەيىن سالا ءمينيسترى ەربول مىرزابوسىنوۆ.
مينيسترلىكتىڭ ءباسپاسوز قىزمەتىنىڭ مالىمدەۋىنشە اتالعان زاڭ شەڭبەرىندە سونداي-اق كاسىبي سپورت كلۋبتارىن ۇستاۋعا مەملەكەت تاراپىنان قارجىلاندىرۋ ءليميتى بەلگىلەندى, بۇل – بيۋدجەت قاراجاتىن ءتيىمدى ءارى اشىق پايدالانۋعا, كلۋبتاردى قوسىمشا قارجى كوزدەرىن ىزدەۋگە ىنتالاندىرۋعا جانە مەملەكەتتىك بيۋدجەتكە تاۋەلدىلىكتى ازايتۋعا باعىتتالعان.
جاڭا نورمالار سپورت سالاسىندا تۇراقتى ءارى ءتيىمدى قارجىلىق مودەل قالىپتاستىرۋعا ىقپال ەتەدى. ەندىگى كەزەكتە بۇقارالىق سپورتتى دامىتۋعا, بالالار مەن جاسوسپىرىمدەر سپورت مەكتەپتەرىنە قولداۋ كورسەتۋگە جانە جوعارى جەتىستىكتەر سپورتىن ىلگەرىلەتۋگە باسىمدىق بەرىلەتىن بولادى.