قاراعاندىلىق وقۋشىلار «مۇقاعالي ماقاتاەۆ وقۋلارى» رەسپۋبليكالىق بايقاۋىندا ءساتتى ونەر كورسەتتى. №61 مەكتەپتىڭ بيىلعى تۇلەگى گران-پري يەگەرى اتانىپ كەلدى, دەپ جازادى Egemen.kz.
بايقاۋدىڭ قورىتىندى كەزەڭى اقىننىڭ تۋعان جەرى – الماتى وبلىسى رايىمبەك اۋدانىنىڭ قاراساز اۋىلىندا ءوتتى. قاتىسۋشىلار ماقاتاەۆتىڭ ولەڭدەرىن ناقىشىنا كەلتىرە وقىدى. قازىلار القاسى كورنەكىلىكتى, ساحنالىق مادەنيەتتى جانە كوركەم وقۋدى باعالادى.
بايقاۋ قورىتىندىسى بويىنشا «جىر ەستافەتاسى» نوميناتسياسى بويىنشا گران-پري №61 قاراعاندى ورتا مەكتەبىنىڭ 11 سىنىپ وقۋشىسى الينا ناۋرىزباەۆاعا بۇيىردى.
ونىڭ تالىمگەرى – قازاق ءتىلى مەن ادەبيەتى ءپانىنىڭ مۇعالىمى ديدار تورەكەلدينا. بۇل مۇعالىم ءۇشىن وسىنداي بايقاۋلارداعى 45-ءشى, ال الينا ءۇشىن 12-ءشى جەڭىس.
– قاتىسۋشىلار مۇقاعالي ماقاتاەۆتىڭ «اققۋلار ۇيىقتاعاندا», «رايىمبەك, رايىمبەك» جانە «التاي – اتىراۋ» اتتى ءۇش ءىرى پوەمالارىنان ۇزىندىلەردى (جالپى العاندا 40 بەتتەن تۇراتىن) مۇدىرمەي جاتقا وقۋى ءتيىس بولدى. بايقاۋ ەستافەتا تۇرىندە ءوتتى: بىرەۋى باستاسا, ەكىنشىسى جالعاستىرادى. ەڭ باستىسى – كىدىرمەي, سوزدەردى شاتاستىرىپ الماۋ كەرەك, – دەيدى ءۇش جىل قاتارىنان وقۋشىلارى وسى بايقاۋدا ۇزدىك بولعان پەداگوگ.
قازىر تۇلەك ۇبت تاپسىرۋعا دايىندىق ۇستىندە. ول تالىمگەرى سياقتى قازاق ءتىلى مەن ادەبيەتىنىڭ مۇعالىمى بولعىسى كەلەدى.
تاعى ءبىر جۇلدەلى ورىنعا جامبىل اتىنداعى مەكتەپتىڭ وقۋشىسى گاۋحار باقىتبەك يە بولىپ, «ايتىپ وتكەن اقىندا ارمان بار ما؟» نوميناتسياسىندا قولا جۇلدەگە يە بولدى. مەكتەپ وقۋشىسىن بايقاۋعا پەداگوگ سانا رازبەكوۆا دايىندادى.
جەڭىمپازدار ديپلومدارمەن جانە اقشالاي سەرتيفيكاتتارمەن ماراپاتتالدى.
قاراعاندى وبلىسى