ءماجىلىستىڭ جالپى وتىرىسىندا ءماجىلىس توراعاسى ەرلان قوشانوۆ بۇگىن ۇكىمەت پەن جوعارى اۋديتورلىق پالاتانىڭ ەسەبى جان-جاقتى تالقىلانعانىن, بايىپتى سىن دا, ۇتىمدى ۇسىنىستا كوپ ايتىلعانىن, ونى بۇگىنگى داۋىس بەرۋدىڭ ناتيجەسى دە كورسەتكەنىن, ۇكىمەت ءوز جۇمىسىندا ولارعا باسا نازار اۋدارۋعا ءتيىس ەكەنىن ايتتى, دەپ حابارلايدى Egemen.kz.
«بۇرىن بيۋدجەتتىڭ شىعىس بولىگىنە قاتىستى ءبىراز سۇراق تۋىندايتىن. بيىل وكىنىشكە قاراي بيۋدجەتتىڭ كىرىس بولىگىن جوسپارلاۋ مەن ورىنداۋدا كەتكەن كەمشىلىكتەرگە بايلانىستى ماسەلەلەر بولىپ وتىر. سونىڭ سالدارىنان ۇلتتىق قوردان قاراجات الۋ مەن سىرتتان قارىز الۋ كولەمى ارتىپ كەلەدى. دەپۋتاتتاردىڭ بۇل الاڭداۋشىلىعى ورىندى دەپ سانايمىن. ءتيىستى مەملەكەتتىك ورگاندار وسى ماسەلە بويىنشا قورىتىندى جاساۋلارى كەرەك», دەدى ەرلان قوشانوۆ.
ءماجىلىس توراعاسىنىڭ ايتۋىنشا, ارينە, سىناۋ دا كەرەك. بىراق وسى ماسەلەلەردىڭ قالاي شەشىلىپ جاتقانى تۋرالى دا بۇگىن ايتۋىمىز كەرەك. دەپۋتاتتار وسى ماسەلەلەردى زاڭنامالىق دەڭگەيدە شەشۋ ءۇشىن جىل بويى بەلسەنە جۇمىس اتقاردى.
«مەملەكەت باسشىسىنىڭ تاپسىرماسىمەن جاڭا بيۋدجەت كودەكسى ازىرلەندى. وندا بۇرىننان كەلە جاتقان تۇيتكىلدەردىڭ دەنى ەسكەرىلگەن. وسىلايشا, جاڭا بيۋدجەت كودەكسى بۇرىنعى مودەلدىڭ ولقى تۇستارىن – بولشەكتەنۋدى, جارياسىزدىقتى جانە باقىلاۋدىڭ السىزدىگىن جويۋعا باعىتتالعان», دەپ ايتقان ە.قوشانوۆتىڭ سوزىنشە بۇكىل بيۋدجەت پروتسەسى تسيفرلانىپ, اشىق بولادى. قارجىلىق ءتارتىپ كۇشەيە تۇسەدى. مەملەكەتتىك ورگاندار ناقتى ناتيجەگە قول جەتكىزۋ بويىنشا بيۋدجەتتىك دەربەستىككە يە بولادى.
«جانە قاراجاتتى يگەرۋ عانا ەمەس, ءدال وسى جايت ولاردىڭ تيىمدىلىگىنە باعا بەرۋگە نەگىز بولماق. ەڭ باستىسى, ۇلتتىق قور قاراجاتى تەك ستراتەگيالىق ماقساتتار مەن ينۆەستيتسياعا جۇمسالادى. مۇنى دەپۋتاتتار قاتاڭ قاداعالايدى. جىل سايىن ۇكىمەت نىسانالى ينديكاتورلاردى بيۋدجەت مۇمكىندىكتەرىنە وراي تۇزەتىپ وتىراتىن. ءبىز وعان جول بەرۋگە بولمايتىنىن بىرنەشە رەت اشىق ايتتىق», دەدى ەرلان جاقان ۇلى.
توراعانىڭ مالىمدەۋىنشە, مەملەكەتتىك جوسپارلاۋ جۇيەسىنە قويىلاتىن تالاپ بيۋدجەتتى جوسپارلاۋ ساپاسىن جاقسارتادى ءارى مەملەكەتتىك ورگانداردىڭ ستراتەگيالىق باسقارۋ باعىتىن ايقىنداي تۇسەدى.
«الدىڭعى جىلدارى ءبىز رەسپۋبليكالىق بيۋدجەتكە ديۆيدەندتەر تولەۋدە دە تەڭگەرىمسىزدىك بارىن بايقادىق. وسى ماسەلە دە جاڭارتىلعان بيۋدجەت كودەكسىندە رەتتەلگەن. ال كۆازيمەملەكەتتىك سەكتور كومپانيالارىنىڭ ديۆيدەند ساياساتى قايتا قارالدى. جالپى, جاڭا بيۋدجەت كودەكسى مەملەكەتتىك قارجى جۇيەسىن تولىعىمەن قايتا جاڭعىرتىپ, ۇكىمەتتىڭ دەربەس جاۋاپكەرشىلىگىن ارتتىرۋعا ءتيىس. بيۋدجەتتى اتقارۋعا قاتىستى ايتىلعان بۇگىنگى ۇسىنىستارعا ۇكىمەت باسا ءمان بەرۋى قاجەت ەكەنىنە تاعى دا نازار اۋدارعىم كەلەدى. بۇل ماسەلە ءاردايىم دەپۋتاتتاردىڭ باقىلاۋىندا بولادى. جالپى, بىرلەسكەن جۇمىس ءۇشىن بارشاڭىزعا ريزاشىلىعىمدى بىلدىرەمىن. پالاتالاردىڭ الداعى بىرلەسكەن وتىرىسىندا وسى ماسەلەنى تالقىلاۋدى جالعاستىرامىز», دەپ تولىقتىردى ءماجىلىس سپيكەرى.