پرەمەر-مينيستر ولجاس بەكتەنوۆ قىتايلىق Qingdao Wanlin Food Co., Ltd. كومپانياسى ديرەكتورلار كەڭەسىنىڭ توراعاسى لي يانتاومەن كەزدەسۋ وتكىزدى. وندا اۋىل شارۋاشىلىعى ونىمدەرىن تەرەڭ وڭدەۋ سالاسىنداعى ىنتىماقتاستىق ماسەلەلەرى تالقىلاندى. بىرلەسكەن ينۆەستيتسيالىق جوبالاردى, ونىڭ ىشىندە قۇرعاق (كەپتىرىلگەن) كوكونىستەر وندىرەتىن زاۋىت سالۋ بويىنشا جوبالاردى ىسكە اسىرۋعا كوڭىل ءبولىندى.
كەزدەسۋ بارىسىندا Qingdao Wanlin Food كومپانياسىنىڭ تۇركىستان وبلىسىندا يندۋستريالدى پارك سالۋ جونىندەگى جوسپارلارى قارالدى. جوبا جالپى اۋدانى 70 گەكتار اۋىل شارۋاشىلىعى ونىمدەرىن قايتا وڭدەۋ نىسانداردى كەزەڭ-كەزەڭىمەن ىسكە قوسۋدىڭ جانە ونەركاسىپ ينفراقۇرىلىمىن دامىتۋ جونىندەگى ءۇش كەزەڭىن قامتيدى. بۇل قۇرعاق كوكونىستەر, مال ازىقتىق داقىلدار وندىرەتىن زاۋىتتاردى ىسكە قوسۋ, سونداي-اق قىتاي بيزنەسى تاراپىنان كەمىندە 15 سەرىكتەس تارتا وتىرىپ, ونەركاسىپتىك پارك سالۋ.
وندىرىستىك قۋاتى جىلىنا 50 مىڭ توننا قۇرعاق كوكونىس وندىرەتىن زاۋىتىن سالۋ جۇمىستارى باستالدى. ينۆەستور ينۆەستيتسيا سوماسىن 30 ملن دوللاردان 90 ملن دوللارعا دەيىن ارتتىردى, 300 جۇمىس ورنىن اشۋ كۇتىلۋدە. كومپانيا ءبىرىنشى كەزەڭدە «تۇركىستان» اكك ونەركاسىپ پاركىندەگى دايىن ءوندىرىس نىساندارىن جالعا الدى. جاقىن ارادا جابدىقتى مونتاجداۋ جوسپارلانۋدا, ءبىرىنشى كەزەڭدى پايدالانۋعا بەرۋ بيىلعى شىلدەگە جوسپارلانعان. جوبانى دامىتۋ ستراتەگياسى ەلىمىزدىڭ جەتىسۋ جانە سولتۇستىك وڭىرلەرىندە ءسابىز جانە سارىمساق وڭدەۋ بويىنشا قوسىمشا زاۋىتتار سالا وتىرىپ, ءوندىرىستى كەڭەيتۋدى قامتيدى. ءوندىرۋشى دايىن ءونىمدى قازاقستاندا ساتۋعا, سونداي-اق اقش پەن ەو نارىعىنا ەكسپورتتاۋعا نيەتتى.
«قازاقستاندا ەكونوميكانىڭ نەگىزگى سالالارىنىڭ ءبىرى رەتىندە اۋىل شارۋاشىلىعىن دامىتۋعا كوپ كوڭىل ءبولىنىپ وتىر. مەملەكەت باسشىسىنىڭ تاپسىرماسى بويىنشا ءبىز شارۋالاردى قولداۋ شارالارىن ەداۋىر ارتتىردىق. بىلتىر ەلىمىزدە 4,5 مىڭ تونناعا جۋىق كوكونىستەن جوعارى ءونىم الىندى. اۋىل شارۋاشىلىعى ءوندىرىسىن ءارتاراپتاندىرۋ اياسىندا بيىل باقشا داقىلدارىنىڭ ەگىس القابى كەڭەيتىلىپ, 222 مىڭ گەكتارعا دەيىن جەتكىزىلدى. ءبىز Wanlin Group-پەن اۋىل شارۋاشىلىعى ونىمدەرىن قايتا وڭدەۋ بويىنشا, ونىڭ ىشىندە ەلىمىزدىڭ اگرارلىق وڭىرلەرىندە جاڭا وندىرىستەردى ورنالاستىرۋدى قامتيتىن ۇزاقمەرزىمدى ستراتەگيالىق ارىپتەستىككە مۇددەلىمىز. قازاقستان بىرلەسكەن عىلىمي-زەرتتەۋ جانە تاجىريبەلىك-كونسترۋكتورلىق جۇمىستار ورتالىقتارىن قۇرۋ, اگروتەحنوپاركتەرگە ينۆەستيتسيا سالۋ, ەكسپورتقا باعدارلانعان لوگيستيكالىق حابتاردى دامىتۋ ارقىلى كووپەراتسيانى كەڭەيتۋگە اشىق», دەپ اتاپ ءوتتى و.بەكتەنوۆ.
سالالىق مينيسترلىكتەر مەن تۇركىستان وبلىسىنىڭ اكىمدىگىنە ەكى اپتا مەرزىمدە ينۆەستيتسيالار تۋرالى كەلىسىم جوباسىن دايىنداۋدى قامتاماسىز ەتۋ تاپسىرىلدى.
ءوز كەزەگىندە Qingdao Wanlin Food Co., Ltd. ديرەكتورلار كەڭەسىنىڭ توراعاسى لي يانتاو قازاقستان اۋىل شارۋاشىلىعىنىڭ ايتارلىقتاي الەۋەتىنە توقتالىپ, اوك ونىمدەرىن تەرەڭ وڭدەۋ سالاسىنداعى بىرلەسكەن جوبالاردى جۇزەگە اسىرۋعا قىزىعۋشىلىق ءبىلدىردى.
كەلىسسوزدەر قورىتىندىسى بويىنشا تاراپتار كەلەشەگى زور بارلىق باعىت بويىنشا ءوزارا ءتيىمدى ىنتىماقتاستىقتى دامىتۋعا نيەتتى ەكەنىن جەتكىزدى.
Qingdao Wanlin Food Co., Ltd. – قىتايدىڭ اۋىل شارۋاشىلىعى ونىمدەرىن تەرەڭ وڭدەۋ سالاسىنداعى جەتەكشى كومپانيالارىنىڭ ءبىرى. ازىق-ت ۇلىك قىزمەتى قۇرعاق كوكونىستەردى (سارىمساق, اق پياز جانە ت.ب.) زەرتتەۋگە, ازىرلەۋگە, وندىرۋگە جانە ەكسپورتتاۋعا باعىتتالعان. قىزمەتكەرلەر سانى 1 مىڭ ادامنان اسادى, نەگىزگى قۇرالداردىڭ كولەمى 90 ملن دوللاردان اسادى. ونىمدەر اقش پەن ەۋروپا ەلدەرىنە ەكسپورتتالادى. جىلدىق ساتۋ كولەمى – 10 مىڭ توننادان استام قۇرعاق كوكونىس. كومپانيا Nestle, Unilever, Kerry جانە باسقا دا ءىرى سەرىكتەستەرمەن ىنتىماقتاستىق ورناتقان.