ەلىمىزدە حالىقتى الەۋمەتتىك قولداۋعا قاتىستى ۇلان-اسىر جۇمىس جاسالىپ جاتىر. اسىرەسە وزدىگىنەن ءۇي ساتىپ الا المايتىن جەڭىلدەتىلگەن ساناتتاعى ازاماتتارعا دەگەن جاناشىرلىق ايرىقشا. كوپتەگەن ادامدار بەلگىلى ءبىر تارتىپپەن كەزەككە تۇرىپ, باسپاناعا قول جەتكىزىپ كەلەدى.
الايدا كەيبىر جانداردىڭ قيىن جاعدايى زاڭدا جەتكىلىكتى قاراستىرىلماعان با, الدە زاڭنامانى جەتىك بىلمەيتىن شەنەۋنىكتەر ەسكەرمەي مە, ايتەۋىر الەۋمەتشىل مەملەكەتىمىزدىڭ جاناشىرلىعىن جوققا شىعارىپ, داعدارىپ قوياتىن وقيعالار دا كەزدەسىپ قالادى. ءبىز بۇگىن سونىڭ ءبىر مىسالى تۋرالى اڭگىمەلەمەكپىز.
كاميلا (قۇجاتتا ءامينا) الىباەۆا سولتۇستىككە اتى شىققان ءانشى, اقىندىق ونەرى دە بار. ءداستۇرلى ءاننىڭ ءدۇلد ۇلى عاريفوللا قۇرمانعاليەۆتىڭ شاكىرتى. ۇزاق جىلدار بويى حالىقتىڭ رۋحىن كوتەرۋگە اتسالىسىپ, ساحنادا ونەر كورسەتتى. پەتروپاۆلدىڭ فيلارمونياسىندا ءان شىرقادى. كەڭەستىك كەزەڭدە قازاق ونەرىنە قامقورلىق كەمشىن بولىپ, فيلارمونياداعى قازاق توبىن تاراتىپ جىبەرگەن سوڭ, وبلىستىق تەلەارنادا دىبىس رەجيسسەرى قىزمەتىن اتقارىپ, زەينەت دەمالىسىنا شىقتى. تەلەارنادا ىستەگەن جىلدارى دا ونەردەن قول ۇزبەي, وبلىس, رەسپۋبليكا كولەمىندەگى كونتسەرتتەرگە, ايتىستارعا قاتىسىپ, ءوڭىرىمىزدىڭ نامىسىن قورعاپ ءجۇردى.
وسىنداي جان بۇگىندە عارىپ بولىپ وتىر. قانت ديابەتى دەرتىنىڭ سالدارىنان ءبىرىنشى توپتاعى مۇگەدەكتىككە ۇشىراعان. ەكى بىردەي جانارى كورۋدەن قالعان. وزەگىنەن ورگەن ەكى ۇلىنىڭ ءبىرى ۇيلەنىپ, بولەك كەتكەن. 30-دان اسقان ەكىنشى ۇلى ءجۇرىپ-تۇرۋى كىسىنىڭ قولىنا قاراپ قالعان اناسىن كۇتىپ, جانىندا وتىر. رەسمي تۇردە «1-توپتاعى مۇگەدەك ادامنىڭ كۇتۋشىسى» دەپ رەسىمدەلگەن.
ساحنادا جارقىلداپ جۇرگەن جىلداردا ونەرىن باعالاعان باسشىلار وعان ءبىر بولمەلى پاتەر بەرگىزگەن. سوعان ءماز بولعان باسى قازاقتىڭ تاۋبەشىلدىگىمەن ونى كەڭىتىپ الۋدى بالاسى جاس بولعاندا ويلاماعان ەكەن. ويلاسا دا نان تابۋدىڭ ءوزى قيىن بولعان جىلداردا وعان قول جەتكىزە الماعان. ەندى جانىنداعى بالاسى ءوسىپ, ازامات بولعاندا ەكەۋىنە قۋىقتاي ءبىر بولمە تارلىق ەتىپ وتىر. ەر ازاماتتىڭ الدىندا قارتاڭ كىسىگە كيىنىپ-شەشىنۋدىڭ ءوزى ءبىر مۇڭ.
2008 جىلى ول سول كەزدەگى وبلىس اكىمى سەرىك بىلالوۆقا جۇگىنىپ, ءۇيىن كەڭىتىپ بەرۋدى وتىنگەندە, اكىم ونىڭ جاعدايىن كوميسسيامەن قاراپ, 2009 جىلعى قىركۇيەكتە جەڭىلدىگى بار ادامدار قاتارىندا كەڭەيتىلگەن ءۇيدىڭ كەزەگىنە قويعىزادى. بۇل 4000-كەزەك بولاتىن, بىراق جازعان قۇلدا شارشاۋ بار ما, كاميلا اپاي سوعان كونىپ, كەزەككە تۇرعان. سودان بەرى 16 جىل ۋاقىت وتسە دە كاميلا ء(امينا) الىباەۆا ءالى كۇنگە لايىقتى پاتەر الا الماي كەلەدى.
«كەزەگىمدى بىلسەم 244-كە جەتكەن ەكەن. شۇكىر, ازايعان ەكەن دەپ قۋانىپ قالسام, قىزمەتكەر ماعان: «اپا, مەنىڭ ءۇيىم بار, سوندىقتان كەزەكتەن سىزىڭىز» دەپ ارىز جازىڭىز. زاڭ جۇزىندە سىزگە ءۇي بەرۋگە بولمايدى», دەيدى. مىنا سوزدەن كەيىن مەن جۇرەگىم اۋزىما تىعىلىپ, تالىپ قالا جازدادىم. سوندا مەن 16 جىل بويى ەرىككەننەن كەزەككە تۇرىپ كەلىپپىن بە, ونداي زاڭ بولسا نەگە ءۇي بەرەمىز دەپ كەزەككە تۇرعىزدىڭدار دەسەم, الگى قىزمەتشى ماردىمدى جاۋاپ بەرمەدى», دەيدى ول.
قايتادان ەسىكتەردى جاعالاپ, قابىلداۋلارعا جازىلىپ, كەزەكتەرگە تۇرىپ, قاشانعى جۇرە بەرسىن, بۇل جولى ك.الىباەۆا ەل گازەتى «ەگەمەن» ارا تۇسەر مە ەكەن دەپ, بىزگە قايرىلدى. «تۇرعىن ءۇي قاتىناستارى تۋرالى» زاڭنىڭ 75-بابىنىڭ 1-بولىگىندە مەملەكەت بەرەتىن ۇيلەردىڭ پايدالى كولەمى ءاربىر ادامعا 15 شارشى مەتردەن كەم بولمايتىنى, سونداي-اق زاڭدا «وتباسىندا اۋىر دەرتتى ادامدار بولسا وندايعا جەكە بولمە بەرىلەدى» دەپ جازىلعان. ك.الىباەۆانىڭ قازىرگى ءۇيىنىڭ پايدالى كولەمى 18 شارشى مەتر, 2 ادامعا ەكى ەسەگە جۋىق تار.
ك.الىباەۆا: «مەن ارتىق پاتەر سۇراپ وتىرعان جوقپىن, ال دەگەننەن: ء«بىر بولمەمدى الىپ, ورنىنا كەزەگىم كەلگەندە ەكى بولمەلى پاتەر بەرسەڭىزدەر بولدى دەگەنمىن», دەيدى.
ادىلەتتى, الەۋمەتشىل ەلدىڭ قىزمەتكەرلەرى مەملەكەتتىڭ حالىققا جاساپ وتىرعان جاناشىرلىعىنا نۇقسان كەلتىرمەۋگە ءتيىس. ءتيىستى ورگاندار بۇعان كوڭىل اۋدارار دەگەن ۇمىتتەمىز.
سولتۇستىك قازاقستان وبلىسى