قاراعاندى وبلىسىنىڭ ساران قالاسىندا «مونوقالالاردىڭ بولاشاعى: وڭ تاجىريبە جانە تۇراقتى دامۋ» اتتى رەسپۋبليكالىق سەمينار-كەڭەس ءوتىپ جاتىر. ءىس-شاراعا ەلىمىزدەگى 20 مونوقالانىڭ اكىمدەرى, مينيسترلىك وكىلدەرى جانە ساراپشىلار قاۋىمداستىعىنىڭ مۇشەلەرى قاتىستى, دەپ حابارلايدى Egemen.kz.
سەمينار مەملەكەت باسشىسى قاسىم-جومارت توقاەۆتىڭ مونوقالالار ەكونوميكاسىن ءارتاراپتاندىرۋ جونىندەگى تاپسىرمالارىن ورىنداۋ اياسىندا ۇيىمداستىرىلدى. قاتىسۋشىلار مونوقالالاردىڭ دامۋ تەندەنتسيالارىن, ەكونوميكانىڭ قۇرىلىمىن نىعايتۋ, تسيفرلىق شەشىمدەردى ەنگىزۋ جانە تۇراقتى دامۋ جولدارىن تالقىلادى.سونىمەن قاتار ساران قالاسىنىڭ تاجىريبەسى ەرەكشە اتاپ ءوتىلدى. يندۋستريالىق ايماق قۇرۋ ارقىلى قالا مونوقالا مارتەبەسىنەن شىعىپ, وڭىرلىك دامۋ درايۆەرىنە اينالدى.
وسىلايشا, ساراندا قولداۋ شارالارىنىڭ ناتيجەسىندە ەكونوميكانى ارتاراپتاندىرۋعا ىقپال ەتكەن Saran يندۋستريالىق ايماعى قۇرىلدى.
2019-2024 جىلدار ارالىعىندا قالادا ونەركاسىپ ءوندىرىسىنىڭ كولەمى 5,6 ەسە ءوستى, وڭدەۋ سالاسىنىڭ ۇلەسى 92%-عا جەتتى. سالىق تۇسىمدەرى ءۇش ەسە ءوستى. جاڭا زاۋىتتاردا 2 مىڭنان استام جۇمىس ورنى اشىلدى, ءارى قارايعى جوبالار تاعى 3,5 مىڭعا جۋىق جۇمىس ورنىن قامتاماسىز ەتەدى, بۇل جەرگىلىكتى تۇرعىنداردى دا, باسقا وڭىرلەردىڭ قىزمەتكەرلەرىن دە تارتادى.
جاڭا وندىرىستەر قۇرۋ جۇمىسپەن قامتۋدىڭ وسۋىنە جانە شوب-تى دامىتۋعا, سونداي-اق قالالىق ينفراقۇرىلىم مەن تۇرعىنۇي قۇرىلىسىن جاڭعىرتۋعا ىقپال ەتەدى.
بيىل قالا ەكونوميكاسىنا 76 ملرد تەڭگەدەن استام ينۆەستيتسيا تارتۋ جوسپارلانعان.
جالپى, قازاقستاندا وڭىرلەردى قولداۋدىڭ جۇيەلى شارالارىن جۇزەگە اسىرۋ ناتيجەسىندە مونوقالالار سانى 27-دەن 20-عا دەيىن قىسقاردى, بۇل ءىرى وندىرىستەردىڭ جانە ەكونوميكانىڭ وزگە دە ءتۇرلى باعىتتارىنىڭ ءوسۋىن بىلدىرەدى.
سەمينار-كەڭەس قورىتىندىسى بويىنشا قاتىسۋشىلار ساران قالاسىنداعى بىرقاتار ونەركاسىپ جانە الەۋمەتتىك نىسانداردى ارالادى.
قازىرگى ۋاقىتتا قاراعاندى وبلىسىندا ءتورت مونوقالا بار – تەمىرتاۋ, شاحتينسك, اباي جانە بالقاش, وندا 340 مىڭعا جۋىق ادام تۇرىپ جاتىر, بۇل ءوڭىر حالقىنىڭ ۇشتەن ءبىرىن قۇرايدى. وڭىردەگى ونەركاسىپ ءوندىرىسىنىڭ جارتىسىنا جۋىعى مونوقالالار ۇلەسىنە تيەسىلى.