الەم چەمپيوناتى: ەنشىمىزدە كۇمىس مەدال!

KazChess كومانداسى فينالعا دەيىن جەتىپ, قازاقستان شاحماتتان الەمدە دەرجاۆاعا اينالىپ كەلە جاتقانىن پاش ەتە ءتۇستى.

 «بليتستەن كوماندالىق الەم چەمپيوناتىندا تاماشا ويىن كورسەتىپ, كۇمىس مەدال جەڭىپ العان Kazchess كومانداسىن قۇتتىقتايمىز! ءبىز شىنىمەن دە مىقتى جانە ىنتىماعى جاراسقان ۇجىم قۇرا الدىق. جاس شاحماتشىلارىمىز بەن تاجىريبەلى ويىنشىلارىمىز بۇكىل ءتۋرنيردى ابىرويمەن وتكىزىپ, تەگەۋرىندى قارسىلاستارىن ىعىستىردى. بۇل تۋرنير ءبىزدىڭ الەمنىڭ ەڭ مىقتى كوماندالارىمەن تەڭ دارەجەدە باسەكەلەس بولا الاتىنىمىزدى ايقىندادى. ويىنشىلارىمىزدىڭ جاس ەرەكشەلىگى مەن الەۋەتىن ەسكەرە وتىرىپ, الداعى ۋاقىتتا تالاي رەت ۇلكەن جەڭىسكە جەتەمىز دەپ سەنەمىز», – دەدى قازاقستان شاحمات فەدەراتسياسىنىڭ پرەزيدەنتى تيمۋر تۋرلوۆ.

KazChess كومانداسى اتىنان قاتىسقاندار: الەكساندر گريششۋك (2683, FID), ريحارد راپپورت (2631, ۆەنگريا), اندرەي ەسيپەنكو (2646, FID), دارمەن سادۋاقاسوۆ (2575), الديار اڭسات (2488), مەرۋەرت كاماليدەنوۆا (2255), ەلناز قالياحمەت (2189), يسلام ايتەن (1929, اۋەسقوي شاحماتشى). كاپيتاندىق مىندەتتى قازاقستان شاحمات فەدەراتسياسىنىڭ اتقارۋشى ديرەكتورى, بىلىكتى مامان گۇلميرا داۋلەتوۆا ارقالادى.

KazChess كومانداسى D توبىنداعى ويىندا ەكىنشى ورىنعا شىقتى, سودان كەيىن 1/8 فينالدا Rookies كومانداسىن جەڭدى, شيرەك فينالدا Freedom ۇجىمىن باسىپ وزدى جانە جارتىلاي فينالدا Uzbekistan كومانداسىنان باسىم ءتۇستى. فينالدا KazChess ويىنشىلارى WR Chess Team ۇجىمىنا عانا ەسە جىبەردى. الەم چەمپيوناتىنىڭ جەڭىمپاز كلۋبىنا – 75 000, كۇمىس مەدال ولجالاعان ۇجىمعا – 50 000, قولا جۇلدەگەرلەرگە – 30 000, 4-ورىن العاندارعا – 20 000, 5- ورىنعا تۇراقتاعان كومانداعا 15 000 ەۋرو تابىس ەتىلدى.

قازاقستاننىڭ التى شاحماتشىسى  جەكەلەي سايىستا  دا دارا شىقتى. تۋرنيرلىك پەرفومانس بويىنشا انىقتالاتىن توعىز تاقتانىڭ ارقايسىسىندا ۇزدىك ويىنشىلار ۇشتىگىنە ەندى. ەرعالي سۇلەيمەن (Rookies, 7-ءشى تاقتا) مەن الديار سايلاۋباي (Ashdod Elit Chess Club, 9-شى تاقتا) التىن مەدال جەڭىپ الدى. الديار اڭسات (KazChess, 6-شى تاقتا), كسەنيا بالاباەۆا (Barys.kz, 7-ءشى تاقتا) جانە دارمەن داۋرەن (Rookies, 9-شى تاقتا) كۇمىس جۇلدەنى قانجىعاسىنا بايلادى. دانيال ساپەنوۆ (Rookies, 2-ءشى تاقتا) قولا مەدالگە يە بولدى.

راپيد پەن بليتستەن 2025 جىلعى كوماندالىق الەم چەمپيوناتى ءۇشىنشى مارتە ءوتتى. العاش 2023 جىلى ديۋسسەلدورف قالاسىندا ءوتتى, ەكىنشىسى بىلتىر استانادا ۇيىمداستىرىلدى. ال بيىل 11-15 ماۋسىم ارالىعىندا لوندوندا 52 كوماندا جينالدى. ءبىر كۇن بۇرىن راپيدتەن جارىس اياقتالدى: Team MGD1 التىن, Hexamind Chess Team كۇمىس, Freedom كومانداسى قولا مەدال الدى. بليتستە (3 مينۋت + ءار ءجۇرىس ءۇشىن 2 سەكۋند) كوماندالار التى تاقتادا: ءتورت نەگىزگى, ءبىر ايەلدەر تاقتاسىندا, رەيتينگى 2000-نان تومەن اۋەسقوي ويىنشىعا ارنالعان ءبىر تاقتادا باق سىناستى.