ۆيتسە-پرەمەر – ۇلتتىق ەكونوميكا ءمينيسترى سەرىك جۇمانعارين وتكىزگەن كەڭەستە بيىلعى 5 ايداعى ەلىمىزدىڭ ءجىو ءوسىمىنىڭ قۇرامداس بولىگى مەن ەكونوميكاعا قوماقتى ۇلەس قوسىپ وتىرعان سالالاردىڭ دامۋ سەرپىنىن ارتتىرۋ مۇمكىندىكتەرى تالقىلاندى, دەپ حابارلايدى Egemen.kz.
ءمينيستردىڭ ايتۋىنشا, ەل ەكونوميكاسىنىڭ نەگىزگى تىرەگى – ونەركاسىپ سالاسى, ول 2024 جىلدىڭ قورىتىندىسى بويىنشا ءجىو قۇرىلىمىنىڭ 25,7%-ىن قۇراعان. بيىلعى بەس ايدا سالا 6,4% ءوسىم كورسەتكەن.
كەڭەستە ونەركاسىپتىڭ ىشكى باعىتتارى – ماشينا جاساۋ, تاماق, حيميا جانە مۇناي وڭدەۋ سالالارىنىڭ دا ءوسىم الەۋەتى قاراستىرىلعان.
ايتا كەتەيىك, قۇرىلىس سالاسى ەرەكشە قارقىن كورسەتىپ وتىر. 2025 جىلدىڭ العاشقى بەس ايىندا ءوسىم 15,4%-عا جەتىپ, ورىندالعان جۇمىس كولەمى 2 ترلن تەڭگەدەن اسقان.
تۇرعىن ءۇي قۇرىلىسى دا وڭ سەرپىن كورسەتىپ, جىل سوڭىنا دەيىن 19 ملن شارشى مەتر تۇرعىن ءۇيدى پايدالانۋعا بەرۋ جوسپارلانعان. قازىردىڭ وزىندە 6 ملن شارشى مەتر تاپسىرىلىپ, وتكەن جىلدىڭ سايكەس كەزەڭىمەن سالىستىرعاندا 5,7% ءوسىم تىركەلگەن.
ء«بىزدىڭ ماقساتىمىز – بيىل ءجىو 6%-دىق وسىمىنە قول جەتكىزۋ. ول ءۇشىن ناقتى سەكتورداعى بارلىق سالا بەلگىلەنگەن ينديكاتورعا سايكەس جۇمىس ىستەۋى ءتيىس. اكىمشىلىك كەدەرگىلەردى جەدەل جويىپ, كومپانيالار ءوز ءونىمىن شىعارۋدى ۇلعايتۋى ءۇشىن ءاربىر سالاداعى قارقىننىڭ باياۋلاۋى ەسەبىنەن ناقتى ايلىق جوسپارلار ازىرلەۋ قاجەت», دەدى سەرىك جۇمانعارين.