ۇلتتىق ۇلانداعى ساباقتاستىق

كىشى سەرجانت التىنبەك امانعاليەۆ بالا كۇنىنەن اسكەري كيىم كيگەن, ەل قورعانى بولعان اكەسىنە قاراپ بوي تۇزەگەن. قازىرگى تاڭدا ول اسكەري بولىمدە ءتارتىپ پەن جاۋاپكەرشىلىكتى باستى ۇستانىم ەتىپ, ناعىز سارباز رەتىندە قالىپتاسىپ كەلەدى.

— بالا كۇنىمنەن اسكەري قىزمەتشى بولۋدى ارماندادىم. اسكەري جولدى تاڭداۋىما, ارينە, ەڭ الدىمەن اكەم سەبەپكەر بولدى. ونىڭ جۇمىسقا دەگەن جاۋاپكەرشىلىگى, تەمىردەي ءتارتىبى مەن وتانعا ادالدىعى مەنى جىگەرلەندىردى. قازىر ءوزىم دە اسكەري سالادا قىزمەت ەتىپ ءجۇرىپ, بۇل سالانىڭ وڭاي ەمەستىگىن, بىراق مارتەبەلى مىندەت ەكەنىن شىن جۇرەكتەن سەزىنۋدەمىن, — دەيدى ا. امانعاليەۆ.

ۇلىنىڭ بۇل تاڭداۋى – 25 جىلعا جۋىق ءومىرىن ۇلتتىق ۇلانعا ارناعان رۇستەمبەك بەكمۋرزين ءۇشىن زور ماقتانىش.

— اسكەري سالادا جۇرگەنىمە 25 جىلعا جۋىقتادى. قازىر روتا ستارشيناسى قىزمەتىندەمىن. 5 ايدان كەيىن زەينەتكە شىعامىن. ءۇش ۇلىم بار. ۇلكەن ۇلىم – التىنبەك مەنىڭ ءىزىمدى جالعاپ, اسكەري قىزمەتكە كەلدى. ال ەكىنشى ۇلىم اسكەرگە كەتكەلى جاتىر. بورىشىن ابىرويمەن وتەپ كەلگەن سوڭ, ول دا وسى جولدى تاڭداۋعا نيەتتى. بۇل – مەن ءۇشىن ۇلكەن مارتەبە. ۇرپاعىمنىڭ ەل قورعانى بولۋعا ۇمتىلىسى – ناعىز اكە ارمانى, — دەيدى 3 سىنىپ سەرجانتى.

مەملەكەت قاۋىپسىزدىگى مەن قوعامدىق ءتارتىپ جولىندا قىزمەت ەتۋ – ۇلكەن جاۋاپكەرشىلىك پەن ەرلىككە تولى مىندەت. وسىنداي اۋىر جۇكتى ارقالاپ جۇرگەن اسكەري اكەلەردىڭ ونەگەلى جولىن جالعاعان ۇلداردىڭ قاتارى ارتقانى – قۋانتارلىق جايت. ولار – وتانسۇيگىشتىكتىڭ, ءتارتىپ پەن تەكتىلىكتىڭ ناقتى كورىنىسى.

قوعامدا اكە جولىن قۋىپ, اسكەري سالادا ابىرويمەن قىزمەت ەتىپ جۇرگەن جاستار از ەمەس. بۇل – ۇلتقا قورعان, ەلگە تىرەك بولار ازاماتتاردىڭ ءوسىپ كەلە جاتقانىن بىلدىرەدى.

ەگەمەن ەلىمىزدىڭ ەرتەڭى ءۇشىن ەڭبەك ەتىپ جۇرگەن بارشا اكەلەردى اكەلەر كۇنىمەن شىن جۇرەكتەن قۇتتىقتايمىز! وتانعا قىزمەت ەتۋ – ۇرپاققا ۇلگى بولار بيىك بورىش!