بەكتەنوۆ پرەزيدەنت تاپسىرمالارىنىڭ ورىندالۋ بارىسىن تەكسەردى

كەڭەستە كولىك ءمينيسترىنىڭ مىندەتىن اتقارۋشى ماقسات قالياقپاروۆ, سونداي-اق «قتج» ۇك» اق باسقارما توراعاسى نۇرلان ساۋرانباەۆ, «قازاۆتوجول» ۇك» اق باسقارما توراعاسى دارحان يماناشەۆ بايانداما جاسادى.

كولىك مينيسترلىگىنىڭ مالىمەتىنشە, قازىرگى ۋاقىتتا تەمىرجول سالاسىندا جالپى قۇنى 2,3 ترلن تەڭگەنى قۇرايتىن بەس ءىرى جوبا ىسكە اسىرىلىپ جاتىر. اتاپ ايتقاندا, «دوستىق – مويىنتى» ۋچاسكەسىندەگى (836 كم) ەكىنشى جول, الماتى ستانساسىنىڭ اينالما جولى (75 كم), «داربازا – ماقتاارال» تەمىر جولى (152 كم), «قىزىلجار – مويىنتى» جانە «باقتى – اياگوز» (272 كم) باعىتتارىنداعى جوبالار قولعا الىنعان.

سونىمەن قاتار جۇمىس تەمىرجول جەلىسىنىڭ جەكەلەگەن ۋچاسكەلەرىن قامتيدى. مەملەكەت باسشىسىنىڭ تاپسىرماسىنا سايكەس, 2029 جىلعا دەيىن جالپى 11 مىڭ شاقىرىم تەمىر جولدى جوندەۋدەن وتكىزۋ جوسپارلانسا, بيىل جالپى سوماسى 177 ملرد تەڭگەگە 1 480 شاقىرىم جول جاڭعىرتىلادى. سونىمەن قاتار 2025 جىلى اياقتالاتىن 125 ۆوكزال كەشەنىن رەكونسترۋكتسيالاۋ جۇمىستارى جۇرگىزىلەدى.

«اۆتوجول قۇرىلىسى سالاسىندا بيىل 13 مىڭ شاقىرىمعا جۇمىس جۇرگىزۋ جوسپارلانۋدا, ونىڭ ىشىندە 2,2 مىڭ شاقىرىمى – رەكونسترۋكتسيالاۋ بويىنشا جوبالار, 6,6 مىڭ شاقىرىمى – جوندەۋ, سونداي-اق 4,2 مىڭ شاقىرىمى – جەرگىلىكتى جەلىنى جوندەۋ جۇمىستارى. قازىرگى ۋاقىتتا 9 مىڭ شاقىرىم جول جاڭعىرتىلۋدا. ۇزىندىعى 1 083 شاقىرىمدى قۇرايتىن اۋىسپالى جوبالاردى رەكونسترۋكتسيالاۋ جالعاسۋدا, ونىڭ ىشىندە جىل سوڭىنا دەيىن 847 شاقىرىم جول جۇمىستارىن اياقتاۋ جوسپارلانۋدا. جاڭا جوبالار قاتارىندا «ورتالىق – باتىس» كۇرە جولىنىڭ قۇرىلىسى بار, ول استانادان اقتاۋ پورتى باعىتىنداعى ترانزيتتىك باعىتتاردىڭ قاشىقتىعىن 889 شاقىرىمعا قىسقارتۋعا مۇمكىندىك بەرەدى. سونداي-اق «اقتوبە – ۇلعايسىن» (234 كم), «قاراعاندى – جەزقازعان» (572 كم) ۋچاسكەلەرى بويىنشا جۇمىستار باستالدى», دەلىنگەن حابارلامادا.

جيىن بارىسىندا پرەمەر-مينيستر جول جۇمىستارىنىڭ ساپاسى ماسەلەسىن كوتەردى. «قازاۆتوجول» ۇك» اق باسقارما توراعاسى دارحان يماناشەۆ اۆتوماتتاندىرىلعان ولشەۋ جۇيەلەرىنىڭ ء(اوج) جۇمىسى تۋرالى باياندادى. قازىرگى ۋاقىتتا رەسپۋبليكالىق جولداردا وسىنداي 27 كەشەن جۇمىس ىستەيدى, 2025 جىلعا تاعى 25 ءاوج ورناتۋ جوسپارلانعان, 2026 جىلى ولاردىڭ جالپى سانى 126 بىرلىككە دەيىن جەتكىزىلەدى. ارنايى داتچيكتەر كومەگىمەن اۆتوماتتاندىرىلعان ولشەۋ جۇيەلەرى  شامادان تىس جۇكتەمەنى انىقتاۋ جانە جول جامىلعىسىنىڭ بۇزىلۋىن بولدىرماۋ ءۇشىن كولىك قۇرالدارىنىڭ ولشەمدەرى تۋرالى اقپاراتتى جەدەل تۇردە جىبەرەدى.

«اۆياتسيا سالاسىندا قاتونقاراعاي, زايسان, كەندىرلىدە ءۇش جاڭا اۋەجاي  سالۋ, سونداي-اق ارقالىق قالاسىنداعى اۋەجايدى قالپىنا كەلتىرۋ جوبالارى جۇزەگە اسىرىلۋدا. پاۆلودار جانە بالقاش اۋە ايلاقتارىندا ينفراقۇرىلىم جاڭعىرتىلىپ جاتىر. سۋ كولىگى سالاسىندا اقتاۋ پورتىن تەرەڭدەتۋ جۇمىستارىن باستاۋ وسى جىلدىڭ شىلدە ايىندا جوسپارلانۋدا. سونىمەن قاتار 2025 جىلى ساۋدا فلوتىن دامىتۋ اياسىندا 8 بىرلىك كەمە, ونىڭ ىشىندە 6 قۇرعاق جۇك كەمەسى جانە 2 پاروم ساتىپ الىنادى», دەلىنگەن حابارلامادا.

پرەمەر-مينيستر جوسپارلانعان بارلىق جوبانى كەشەندى ءارى جۇيەلى تۇردە جۇزەگە اسىرۋدىڭ ماڭىزدىلىعىن اتاپ ءوتتى.

«كولىك سالاسى سوڭعى 5 ايدا 24% ءوسىمدى كورسەتتى. كولىك ەنەرگەتيكالىق جانە باسقا ينفراقۇرىلىممەن بىرگە كەز كەلگەن ەكونوميكالىق دامۋدىڭ نەگىزى سانالادى. نەلىكتەن پرەزيدەنت پەن ۇكىمەت بۇل ماسەلەمەن اينالىسۋدا: ەگەر ءبىز قازىر ينۆەستيتسيا سالماساق, وندا ۇزاقمەرزىمدى ەكونوميكالىق ءوسۋ بولمايدى. ءبىز بارلىق قاجەتتى رەسۋرستاردى بولەمىز. بارلىق سالالىق قۇرىلىمداردىڭ مىندەتى – اتالعان قاراجاتتى ماقساتسىز پايدالانباي جانە بارلىق نىسانداردى ۋاقىتىندا تاپسىرۋ. بارلىق نىسان وسى جىلدىڭ ەكونوميكالىق ءوسۋ جوسپارىنا ەنگىزىلگەن. بۇل قىسقامەرزىمدى ناتيجەگە قاتىستى جانە تۇتاستاي العاندا – بۇل الداعى 10 جىلداعى تۇراقتى ەكونوميكالىق ءوسۋدىڭ نەگىزى», دەدى ولجاس بەكتەنوۆ. 

جيىن سوڭىندا كولىك مينيسترلىگىنە, «سامۇرىق-قازىنا» قورىنا جانە وزگە دە جاۋاپتى ۇيىمدارعا بىرقاتار تاپسىرما بەرىلدى.