وتباسىنىڭ تسيفرلىق كارتاسىن (وتسك) ەنگىزۋدىڭ ناتيجەسىندە 2025 جىلدىڭ باسىنان بەرى الەۋمەتتىك-ەڭبەك سالاسىنداعى مەملەكەتتىك قىزمەتتەردى پرواكتيۆتى كورسەتۋ ءۇشىن 221,6 مىڭ ادامعا SMS-حابارلاما جولداندى. بۇل رەتتە ءوتىنىش بەرۋسىز جاردەماقى نەمەسە تولەم الۋ مۇمكىندىگىن 116,9 مىڭ ادام پايدالانعان, دەپ حابارلايدى Egemen.kz ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنە سىلتەمە جاساپ.
وتباسىنىڭ تسيفرلىق كارتاسى مەملەكەتتىك ورگانداردىڭ قولدانىستاعى بارلىق اقپاراتتىق جۇيەلەرىنىڭ دەرەكتەرى نەگىزىندە قالىپتاستىرىلادى. بۇگىندە وندا قازاقستاننىڭ 20 ملن ازاماتى نەمەسە 6,2 ملن-نان استام وتباسى تۋرالى اقپارات جيناقتالعان.
وتسك ەنگىزۋدىڭ باستى ماقساتى – وتانداستارىمىزدىڭ مەملەكەتتىك قولداۋ جۇيەسىنە تەڭ قولجەتىمدىلىگىن قامتاماسىز ەتۋ. وسىعان بايلانىستى قر الەۋمەتتىك كودەكسىندە وتباسىنىڭ تسيفرلىق كارتاسى الەۋمەتتىك ساياساتتىڭ ورتا جانە ۇزاق مەرزىمدى مىندەتتەرى مەن باعىتتارىن ايقىنداۋ قۇرالى رەتىندە بەلگىلەنگەن. سونداي-اق, وتسك ازاماتتاردىڭ الەۋمەتتىك مارتەبەسىنە بايلانىستى كەپىلدەندىرىلگەن مەملەكەتتىك قولداۋدىڭ قانداي دا ءبىر ءتۇرىن الۋعا قۇقىلى ەكەندىگى تۋرالى كۇندەلىكتى «ەلەكتروندىق حابارلاما» بولىپ تابىلادى.
قازىرگى ۋاقىتتا وتسك مەملەكەتتىك قولداۋ شارالارىن الۋعا قۇقىعى بار قازاقستان ازاماتتارىنا قانداي دا ءبىر وتىنىشتەرسىز جاردەماقىلار مەن الەۋمەتتىك تولەمدەردىڭ 11 ءتۇرىن رەسىمدەۋگە مۇمكىندىك بەرەدى. ولار ەڭبەك ەتۋ قابىلەتىنەن ايىرىلعان جاعدايدا الەۋمەتتىك تولەم; جۇمىسىنان ايىرىلعان جاعدايدا الەۋمەتتىك تولەم, اسىراۋشىسىنان ايىرىلۋ بويىنشا الەۋمەتتىك تولەم; بالا تۋ مەن كۇتىمىنە جاردەماقى, مۇگەدەكتىگى بار بالانى تاربيەلەپ وتىرعان اتا-اناسىنا (قامقورشىسىنا) جاردەماقى, مۇگەدەكتىگى بويىنشا جاردەماقى, كوپبالالى وتباسىلارعا بەرىلەتىن جاردەماقى, «التىن القا» جانە «كۇمىس القامەن» ماراپاتتالعان كوپبالالى انالارعا بەرىلەتىن جاردەماقى, اتاۋلى الەۋمەتتىك كومەك, سونداي-اق جەرلەۋگە ارنالعان بىرجولعى تولەم.
سونداي-اق, وتسك ارقىلى زەينەتاقى تولەمدەرىن الۋ مۇمكىندىگى, «قانداس» مارتەبەسى بەرىلگەندە نەمەسە ۇزارتىلعاندا مارتەبەنىڭ اياقتالۋ مەرزىمى جانە جۇمىسسىز ادامدار ءۇشىن جۇمىسپەن قامتۋ شارالارى تۋرالى اۆتوماتتى حابارلامالار ىسكە اسىرىلدى.
مەملەكەتتىك قولداۋ شارالارىن الۋعا قۇقىق بەلگىلەنگەن كەزدە الەۋەتتى الۋشىعا 1414 بىرىڭعاي بايلانىس ورتالىعىنان SMS-حابارلاما جىبەرىلەدى. حابارلاما العان ازامات وعان كەلىسىمى تۋرالى جاۋاپ بەرۋى كەرەك. ءوتىنىشتى رەسىمدەۋ جانە الەۋمەتتىك جاردەماقى نەمەسە تولەم تاعايىنداۋ اۆتوماتتى رەجيمدە جۇرگىزىلەدى, سودان كەيىن اقشا قاراجاتى الۋشىنىڭ بانك شوتىنا اۋدارىلادى.
الاياقتىق تاۋەكەلىن بولدىرماۋ ماقساتىندا 1414 بىرىڭعاي بايلانىس ورتالىعىنان كەلىپ تۇسكەن SMS-كە جاۋاپ بەرۋ قاجەتتىگىن اتاپ وتەمىز.
بارلىق سۇراقتار بويىنشا 1414 ءنومىرى بويىنشا Call-ورتالىققا حابارلاسىڭىز, قوڭىراۋ سوعۋ تەگىن.