تۇركىستان وبلىسىنىڭ اۋماعىندا كەڭ تارالعان پايدالى قازبالاردى وندىرەتىن 198 جەر قويناۋىن پايدالانۋشى بار. ونىڭ 74-ءى كەلىسىمشارت جانە 124-ءى ليتسەنزيا نەگىزىندە جۇمىس ىستەيدى. ال جۇمىسى توقتاتىلعان 24-ءى جىل باسىنان بەرى كەلىسىمشارتتىق ليتسەنزيالىق مىندەتتەمەلەرىن ورىنداماعان, دەپ حابارلايدى Egemen.kz.
سونىمەن قاتار ءوڭىردىڭ الەۋمەتتىك دامۋىنا ارنالعان تولەمدەردى مىندەتتەۋ ءۇشىن 8 جەر قويناۋىن پايدالانۋشى بويىنشا سوتقا تالاپ-ارىز جولدانىپ, 12-ىنە قايتا ەسكەرتپە حات جولداندى. ودان بولەك, جەر قويناۋىن پايدالانۋشىلاردىڭ كەن ورنىنداردىڭ جەرلەرىنە زەردەلەۋ جۇمىستارىن جۇرگىزۋ جونىندەگى ءىس-شارا جوسپارىن بەكىتۋ ۇسىنىلعان.
جەرگىلىكتى پوليتسيا قىزمەتى باسقارماسى باسشىسىنىڭ ورىنباسارى بەگىمحان احمەتوۆتىڭ مالىمەتىنشە, وبلىس اۋماعىندا قۇرىلىس جۇمىستارىنىڭ قارقىندى جۇرگىزىلۋىنە بايلانىستى توپىراق, قۇم جانە قيىرشىق تاسقا سۇرانىس ارتىپ, جەر قويناۋىن زاڭسىز پايدالانۋ دەرەكتەرى ورىن الۋدا.
جىل باسىنان زاڭسىز جەر قويناۋىن پايدالانۋدىڭ 155 دەرەگى انىقتالىپ, جيناقتالعان قۇجاتتار اكىمشىلىك كودەكسىنىڭ 139-بابىندا كوزدەلگەن جاۋاپكەرشىلىككە تارتۋ ءۇشىن, قۇزىرلىعىنا قاراي ەكولوگيا دەپارتامەنتىنە جولدانعان. زاڭسىز جەر قويناۋىنا قاتىستى فاكتىلەر ورداباسى, سارىاعاش, قازىعۇرت, كەلەس, ماقتاارال, جەتىساي, شاردارا, وتىرار, ساۋران اۋداندارى مەن كەنتاۋ, ارىس قالالارى اۋماعىندا ءجيى تىركەلىپ وتىر.
جەرگىلىكتى پوليتسيا قىزمەتى باسقارماسى جۇرگىزگەن رەيدتىك ءىس-شارا بارىسىندا زاڭسىز جەر قويناۋىن پايدالانۋدىڭ – 21, زاڭسىز جەر قويناۋىن تاسىمالداۋدىڭ 12 دەرەگى انىقتالدى.