كەيىنگى ۋاقىتتا جامبىل وبلىسىندا بىرنەشە ءوندىرىس وشاعى بوي كوتەرىپ جاتىر. ولاردىڭ بىرقاتارى جۇمىستى باستاپ تا ۇلگەردى. ناقتىراق ايتساق, وڭىردە تۇڭعىش رەت شىڭدالعان شىنى شىعاراتىن زاۋىت ىسكە قوسىلدى. بايزاق اۋدانىنا قاراستى ۇلگىلى اۋىلىندا اشىلعان جاڭا كاسىپورىن قىزمەتكەرلەرى جۇمىستى باستاپ كەتتى.
جەرگىلىكتى اتقارۋشى بيلىك وكىلدەرى كەلتىرگەن دەرەككە جۇگىنسەك, يندۋستريالىق جوبانى قارجىلاندىرۋعا جەرگىلىكتى كاسىپكەر تاۋەكەل ەتكەن ەكەن. ول وسى جوبانى ساتىمەن جۇزەگە اسىرۋ ءۇشىن ىنتى-شىنتىسىمەن ىسكە كىرىسىپ كەتتى.
وبلىس ورتالىعى تاراز قالاسىنان تاياقتاستام جەردە ورنالاسقان جاڭا زاۋىتتىڭ قۇرىلتايشىسى جامالحان يبراگيموۆتىڭ ايتۋىنشا, شىڭدالعان شىنى شىعاراتىن كاسىپورىن جەرگىلىكتى 40 ازاماتتى تۇراقتى جۇمىس ورنىمەن قامتىپ وتىر. باستاپقىدا 1 ملرد تەڭگە كولەمىندە ينۆەستيتسيا سالىنعان زاۋىت جىلىنا 100 مىڭ شارشى مەتر شىڭدالعان شىنى وندىرۋگە قاۋقارلى. كاسىپورىن ونىمىنە جەرگىلىكتى تۇتىنۋشىلار عانا ەمەس, كورشىلەس وڭىرلەردىڭ ازاماتتارى دا قىزىعۋشىلىق تانىتقان.
«مەملەكەت باسشىسى قاسىم-جومارت توقاەۆتىڭ ينۆەستيتسيالىق جوبالاردى قولداۋ ارقىلى وڭىرلەردە جاڭا ءوندىرىس ورىندارىن قۇرۋ جونىندەگى تاپسىرماسى نازارىمىزدان تىس قالماق ەمەس. قازىرگى كەزدە وبلىس اۋماعىندا جاڭا كاسىپورىندار اشۋ بويىنشا قارقىندى جۇمىس جۇرگىزىلىپ جاتىر.
بىرنەشە كۇن بۇرىن توعىز جولدىڭ تورابىندا ورنالاسقان شۋ قالاسىندا جىلىنا 1 500 لوكوموتيۆ جوندەۋگە الەۋەتى جەتەتىن تەحنيكالىق قىزمەت كورسەتۋ دەپوسى اشىلدى. پرەزيدەنت تاپسىرماسىن جۇزەگە اسىرۋ ماقساتىندا قولعا الىنعان جۇمىس از ەمەس. جاڭا جوبالاردىڭ بارلىعىن ساتىمەن ورىنداۋ ءۇشىن جەرگىلىكتى اتقارۋشى بيلىك وكىلدەرى قولدان كەلگەنشە ەڭبەك ەتىپ جاتىر.
بۇگىن ىسكە قوسىلعان شىڭدالعان شىنى وندىرەتىن زاۋىت – وڭىردە اتقارىلىپ جاتقان اۋقىمدى جۇمىستىڭ ناقتى ءبىر كورىنىسى. بۇل كاسىپورىن – ءوڭىر ەكونوميكاسىنىڭ وركەندەۋىنە, جەرگىلىكتى حالىقتىڭ الەۋمەتتىك جاعدايىن جاقسارتۋعا باعىتتالعان ماڭىزدى جوبالاردىڭ ءبىرى.
«تۋعان جەرگە تۋىڭدى تىك» دەگەن حالىق دانالىعىنىڭ ءمانى تەرەڭدە جاتىر. وسى قاعيدانى ۇستانىپ, تۋعان جەرگە ينۆەستيتسيا سالىپ, جاڭا ءىس باستاعان ىسكەر ازاماتتارعا العىستان باسقا ايتارىمىز جوق. ءوندىرىس وشاعىن اشقان ازاماتتاردىڭ باستاماسى باياندى بولاتىنىنا سەنىمىمىز زور», دەيدى ءوڭىر باسشىسى ەربول قاراشوكەەۆ.
رەسمي دەرەككە سۇيەنسەك, جوبانى «Js Glass» جشس جۇزەگە اسىرىپتى. زاۋىت باسشىلارى وندىرىلگەن ءونىمنىڭ ساپاسى مەن قاۋىپسىزدىك تالاپتارىنا ايرىقشا نازار اۋدارىپ وتىر. سونداي-اق قۇرىلتايشىلار كاسىپورىن ءونىمىن, ىشكى نارىقتى قامتىپ قانا قويماي, كورشىلەس جاتقان الماتى, تۇركىستان وبلىستارىنىڭ نارىعىنا شىعارۋدى دا جوسپارلاپ وتىر.
«كاسىپورىن قىزمەتكەرلەرى زاماناۋي ۇلگىدەگى قوندىرعىلارمەن جۇمىس ىستەيدى. قىتاي ەلىنەن كەلگەن كاسىبي ماماندار ءبىر اي بويى بىلگەنىن ۇيرەتتى. سونىڭ ارقاسىندا ءبىز دە جاڭا قۇرىلعىلاردى ءبىر كىسىدەي مەڭگەرىپ الدىق. اۋىلىمىزدا جاڭا زاۋىتتىڭ اشىلعانى كوڭىل قۋانتادى. ەندى تەك ادال جۇمىس ىستەپ, ءوڭىر ەكونوميكاسىنىڭ وركەندەۋىنە كۇش سالۋىمىز كەرەك», دەيدى شىڭدالعان شىنى شىعاراتىن زاۋىت قىزمەتكەرى داستان ابدەليەۆ.
جالپى العاندا, جامبىل وبلىسىندا ىلكىمدى جوبالاردى جۇزەگە اسىرۋ بويىنشا ءبىرشاما جۇمىس اتقارىلىپ جاتىر. ءىرى جوبالاردى كەزەڭ-كەزەڭىمەن ىسكە اسىرۋ ماقساتىندا قولعا الىنعان جۇمىس ىلكى ساتكە دە توقتاماق ەمەس.
وبلىستىق كاسىپكەرلىك جانە يندۋستريالدى-يننوۆاتسيالىق دامىتۋ باسقارماسىنىڭ باسشىسى اسپانديار سەيسەباەۆتىڭ ايتۋىنشا, بيىل «Alit Holding» جشس جىلدىق قۋاتى 150 مىڭ توننانى قۇرايتىن قۇرعاق قۇرىلىس قوسپالارىن وندىرەتىن كاسىپورىندى ىسكە قوسۋعا نيەتتەنىپ وتىر. سونداي-اق «كناۋف گيپس تاراز» جشس جىلىنا 22 ميلليون شارشى مەتر گيپسوكارتون وندىرەتىن كاسىپورىن قۇرىلىسىن باستاماق.
بۇدان بولەك, «Qazaq soda» كومپانياسى جىلىنا 1 ميلليون توننا كالتسيلەندىرىلگەن سودا وندىرەتىن زاۋىت قۇرىلىسىن جۇرگىزىپ جاتىر. ءوندىرىس وشاعى 2027 جىلى ىسكە قوسىلادى. سونىمەن قاتار «Talas Investment Company» كومپانياسىنىڭ
ناتري ءتسيانيدىن ءوندىرۋ جوباسىنىڭ ەكىنشى كەزەڭى جۇزەگە اساتىن كۇن دە الىس ەمەس. سول ارقىلى جىلىنا 30 مىڭ توننا ناتري ءتسيانيدىن ءوندىرۋ مۇمكىن بولماق.
قالاي دەسەك تە, وڭىردە يننوۆاتسيالىق جوبالاردى ىسكە اسىرۋ جونىندە اتقارىلىپ جاتقان جۇمىس از ەمەس. ءبىز سولاردىڭ ءبىر پاراسىن عانا تىلگە تيەك ەتىپ وتىرمىز. جەرگىلىكتى اتقارۋشى بيلىك وكىلدەرى پرەزيدەنت تاپسىرماسىن لايىقتى ورىنداۋ ارقىلى جەرگىلىكتى حالىقتى جاڭا جۇمىس ورنىمەن قامتۋعا باسىمدىق بەرىپ وتىر.
جامبىل وبلىسى,
بايزاق اۋدانى