استاناداعى امفيتەاتردا «استانا سازى» قازاق مەملەكەتتىك فولكلورلىق ءانسامبلىنىڭ كونتسەرتى ءوتتى. ونەر ۇجىمى ءداستۇرلى كۇي مەن حالىق اندەرىن زاماناۋي اۆتورلىق وڭدەۋدە ورىنداپ, ۇلتتىق مۇرانى جاڭاشا ۇلگىدە كورسەتتى.
كونتسەرتتىك باعدارلامادا جاڭا تۋىندىلار مەن ەكسكليۋزيۆتى مۋزىكالىق كومپوزيتسيالار ۇسىنىلىپ, انسامبل ارتىستەرىنىڭ شەبەرلىگىن ايقىن كورسەتەتىن بىرەگەي مۋزىكالىق اۋەندەر ورىندالدى.
ءىس-شاراعا قازاقستاننىڭ ەڭبەك سىڭىرگەن قايراتكەرلەرى ايزات قارابەك, ەربولات شالدىبەكوۆ, حالىقارالىق كونكۋرستاردىڭ لاۋرەاتى جانتۋ داداباەۆ قاتىستى.
ايتا كەتەيىك, مادەني جوبا «قازاقكونتسەرت» مەملەكەتتىك اكادەميالىق كونتسەرتتىك ۇيىمى ۇيىمداستىرعان «Grand fest» مۋزىكالىق فەستيۆالى اياسىندا كونتسەرتتىك باعدارلامالار سەرياسىنىڭ ءبىر بولىگى بولدى.
اشىق اسپان استىنداعى امفيتەاتر ساحناسى, جاندى مۋزىكا جانە جانرلىق ەرەكشەلىك – بارلىعى دا ءتۇرلى بۋىن وكىلدەرىن ونەر اينالاسىنا توپتاستىراتىن جىلى ءارى شابىت سىيلايتىن اتموسفەرانى قالىپتاستىردى.