پاۆلودارداعى Bellagio مەيرامحاناسىندا وتكەن بانكەتتەن سوڭ 34 ادام, ونىڭ ىشىندە ءبىر بالا, تاماقتان ۋلانۋ بەلگىلەرىمەن دارىگەرگە جۇگىندى; سانيتارلىق تەكسەرىس مەيرامحانانىڭ رۇقسات قۇجاتىنسىز جۇمىس ىستەگەنىن انىقتاپ, نىساننىڭ قىزمەتىنە بىردەن تىيىم سالدى.
زارداپ شەككەندەردىڭ 20-سى اۋرۋحاناعا جاتقىزىلسا, قالعاندارى ءۇي جاعدايىندا ەم قابىلداۋدا. اقىلبەكوۆانىڭ ايتۋىنشا, جاپپاي ۋلانۋ دەرەگى رەسمي تۇردە تىركەلگەن. ال زارداپ شەككەندەردىڭ تۋىستارى بانكەتكە 50-گە جۋىق ادامنىڭ قاتىسقانىن جانە ولاردىڭ كوپشىلىگى ءوزىن ناشار سەزىنگەنىن حابارلاعان. كەيبىر قوناقتار جەدەل جاردەم شاقىرماعان.
– 8 ماۋسىم كۇنى بىزگە اقپارات ءتۇستى. سول كۇنى ەپيدەميولوگيالىق تەرگەۋ باستالدى. الدىن الا مالىمەتتەرگە سايكەس, مەيرامحانا سانيتارلىق-ەپيدەميولوگيالىق قورىتىندىسىز, ياعني رۇقسات قۇجاتىنسىز جۇمىس ىستەگەن, – دەدى اقىلبەكوۆا.
7 ماۋسىمدا ساعات 13:00-دە نىسانعا تەكسەرۋ جۇرگىزىلىپ, ساعات 16:00-دە مەيرامحانانىڭ جۇمىسىنا ۋاقىتشا تىيىم سالۋ تۋرالى قاۋلى شىعارىلعان. Bellagio اكىمشىلىگى بۇل شەشىممەن جازباشا تۇردە تانىسقان. الايدا زارداپ شەككەندەردىڭ تۋىستارى مەيرامحانا قاۋلىعا قاراماستان جۇمىسىن جالعاستىرعانىن ايتۋدا. سول كۇنى ساعات 18:00-دە مەكەمەدە تاعى دا قوناقتار قابىلدانعانى بەينەجازبا ارقىلى راستالعان.
سانيتارلىق قىزمەتتىڭ مالىمەتىنشە, مەكەمەدە مەديتسينالىق تەكسەرۋدەن وتپەگەن جەتى قىزمەتكەر جۇمىس ىستەگەن. قازىرگى ۋاقىتتا ولاردىڭ دا قىزمەتىنە تىيىم سالىنعان.
مەيرامحانانى تەكسەرۋ ناتيجەلەرى ءبىر اپتا ىشىندە دايىن بولادى. سودان كەيىن ماتەريالدار قىلمىستىق ءىس قوزعاۋ ءۇشىن پوليتسياعا جولدانادى.
جانەل تولەۋبەكوۆا, ەۇۋ ستۋدەنتى