بيىل ەل ەكونوميكاسى 6%-عا دەيىن وسكەن. بۇل تۋرالى ۇلتتىق بانك توراعاسى تيمۋر سۇلەيمەنوۆ مالىمدەدى, دەپ جازادى Egemen.kz.
ونىڭ ايتۋىنشا ەكونوميكالىق بەلسەندىلىك ارتىپ كەلەدى.
«الدىن-الا مالىمەت بويىنشا, قاڭتار-ءساۋىر ايلارىندا جالپى ىشكى ءونىم قارقىنى 6%-عا جەتتى. مۇناي ءوندىرىسىنىڭ قالىپقا كەلۋى جانە شيكىزاتتىق ەمەس سالالاردىڭ قارقىندى دامۋى وسىنداي ناتيجەگە قول جەتكىزۋگە مۇمكىندىك بەردى. ەڭ جوعارى ءوسىم 22,4 %-بەن كولىك جانە قويمالاۋ سالاسىندا بايقالدى. مۇنىڭ ءبارى ينفراقۇرىلىمدىق جوبالاردىڭ ىسكە اسىرىلۋىمەن تىعىز بايلانىستى. باعا ءوسىمى تىركەلگەن سالالاردا ەڭبەك ونىمدىلىگىنىڭ دە ارتقانى بايقالادى. اعىمداعى جىلدىڭ ءبىرىنشى توقسانىندا ءونىم بەرۋ كولىك, قۇرىلىس, اۋىل شارۋاشىلىعى مەن وڭدەۋ ونەركاسىبى سالالارىندا ناقتى جالاقىنىڭ ديناميكاسىنان اسىپ ءتۇستى», دەدى ۇلتتىق بانك توراعاسى.
تيمۋر سۇلەيمەنوۆ سوعان قاراماستان ەكونوميكاداعى ءوندىرىس سەكتورى ىشكى سۇرانىستى قامتاماسىز ەتە الماي وتىرعانىن اتاپ ءوتتى.
«سۇرانىس پەن ۇسىنىس اراسىنداعى ايىرماشىلىق ساقتالىپ, ينفلياتسيالىق قىسىمدى كۇشەيتە ءتۇستى», دەدى ول.