كەشە قوناەۆ قالاسىنىڭ الماتى وبلىسىنىڭ اكىمشىلىك ورتالىعى مارتەبەسىن العانىنا ءۇش جىل تولدى. 2022 جىلى 8-ماۋسىمدا بۇرىنعى قاپشاگاي قالاسى وبلىس ورتالىعى بولىپ جاريالانعان بولاتىن, دەپ جازادى Egemen.kz.
سول ۋاقىتتان بەرى قالادا جانە وبلىس اۋماعىندا اۋقىمدى الەۋمەتتىك-ەكونوميكالىق وزگەرىستەر ورىن الدى. ءۇش جىل ىشىندە جالپى وڭىرلىك ءونىم 109,6%-عا ارتىپ, 5,9 ترلن تەڭگەنى قۇرادى. شيكىزاتتىق ەمەس سەكتورداعى ءوسىم قارقىنى بويىنشا الماتى وبلىسى رەسپۋبليكادا العاشقى بەس ءوڭىردىڭ قاتارىندا.
وبلىسقا 2,3 ترلن تەڭگەدەن استام ينۆەستيتسيا تارتىلدى. حالىقارالىق دەڭگەيدەگى PepsiCo, LC Waikiki, KT&G, Qazaq Global Food كومپانيالارى ءوز ءوندىرىس ورىندارىن اشتى. سونىمەن قاتار, قىتايمەن جالپى قۇنى 7 ملرد اقش دوللارىنا جۋىق كەلىسىمدەر جاسالىپ, ناتيجەسىندە شامامەن 6 مىڭ جۇمىس ورنى قۇرىلدى.
ينفراقۇرىلىمدىق سالادا دا بىرقاتار جۇمىستار اتقارىلدى. 1000 شاقىرىمنان استام اۆتوجول جوندەلىپ نەمەسە جاڭادان سالىندى. گازبەن قامتۋ دەڭگەيى 58,1%-دى قۇرادى, ال اۋىلدىق ەلدى مەكەندەردىڭ 99,5%-ى ورتالىقتاندىرىلعان اۋىزسۋمەن قامتاماسىز ەتىلدى. ءۇش جىلدا شامامەن 2 ملن شارشى مەتر تۇرعىن ءۇي پايدالانۋعا بەرىلدى.
ادام كاپيتالى مەن تسيفرلاندىرۋ سالاسىندا دا ناتيجەلەر بار. 140 مىڭنان استام جاڭا جۇمىس ورنى قۇرىلدى, جۇمىسسىزدىق دەڭگەيى 4,6%-عا دەيىن تومەندەدى. «تسيفرلىق وتباسى كارتاسى» مەن ءبىلىم بەرۋ پلاتفورمالارى سەكىلدى زاماناۋي سەرۆيستەر ەنگىزىلدى.
قوناەۆ قالاسى Smart Qonaev جوباسى اياسىندا دامىپ كەلەدى. قارجىلاندىرۋ كولەمى ءتورت ەسەگە ارتتى. قالادا قوعامدىق كەڭىستىكتەر جاڭارتىلىپ, تۋريستىك ينفراقۇرىلىم جەتىلدىرىلۋدە. 2025 جىلى قالاعا 1,6 ملن تۋريست كەلەدى دەپ كۇتىلۋدە.
سونىمەن قاتار, قوناەۆ قالاسىنىڭ ماڭىندا ەركىن ەكونوميكالىق ايماق مارتەبەسىمەن جاڭا الاتاۋ قالاسىنىڭ قۇرىلىسى باستالدى. 2025 جىلى بۇل جوبانىڭ ينفراقۇرىلىمىنا 100,7 ملرد تەڭگە باعىتتالادى.
قازىرگى ۋاقىتتا الماتى وبلىسى – تۇراقتى دامىپ كەلە جاتقان ءوڭىر. وڭىردە ءومىر سۇرۋگە, جۇمىس ىستەۋگە جانە كاسىبي تۇرعىدا وسۋگە بارلىق جاعدايلار جاسالۋدا. ال قوناەۆ قالاسى وبلىستىڭ الەۋمەتتىك-ەكونوميكالىق دامۋىنىڭ ورتالىعىنا اينالدى.
الماتى وبلىسى