1970 جىلى پايدالانۋعا بەرىلگەن استانا سۋ قويماسىنىڭ ءتۇبىن شوگىندىلەردەن تازارتۋ جۇمىستارى باستالدى, دەپ جازادى Egemen.kz.
اتالعان سۋ قويماسىنان بيىلعى قازان ايىنىڭ سوڭىنا دەيىن 50 مىڭ توننا لاي شىعارۋ جوسپارلانعان, مۇنداي جۇمىس – 13 جىل بويى, ءار جىل سايىن جۇرگىزىلمەك. ناتيجەسىندە سۋ قويمانىڭ سىيىمدىلىعى 47 ملن تەكشە مەترگە ارتىپ, ەلوردا تۇرعىندارىن سۋمەن قامتاماسىز ەتۋدى جاقسارتۋعا مۇمكىندىك بەرەدى.
سالا مينيسترلىگىنىڭ قولداۋىمەن «قازسۋشاردىڭ» اقمولا وبلىسىنداعى فيليالى جۇرگىزىپ جاتقان سۋ قويماسىن تازارتۋعا ارنايى ەكى تەحنيكا جۇمىلدىرىلعان: ساعاتىنا 2000 تەكشە مەترگە دەيىن ءتۇرلى شوگىندىلەردەن تازارتاتىن ۇلكەن جەرسنارياد جانە قۋاتى ساعاتىنا 900 تەكشە مەترگە دەيىن جەتەتىن كوپفۋنكتسيونالدى ءارى وزدىگىنەن جۇرەتىن شاعىن جەرسنارياد.
«پرەزيدەنتتىڭ تاپسىرماسىن ورىنداۋ ءۇشىن ارنايى ماماندار توبى قۇرىلدى. بارلىق قىزمەتكەر ارنايى تەحنيكامەن جۇمىس ىستەۋ ءۇشىن قاجەتتى وقىتۋدان جانە دايىندىقتان ءوتتى. استانا سۋ قويماسى – ەلوردانى سۋمەن قامتاماسىز ەتۋدە ماڭىزدى ءرول اتقاراتىن ستراتەگيالىق نىسان. زاماناۋي تەحنيكانىڭ ارقاسىندا ءبىز بۇل سۋ قويماسىن جارتى عاسىردان كەيىن العاش رەت تازارتىپ, جۇمىستى جاقسى ءارى ءتيىمدى اتقارا الامىز», دەدى سالا ءمينيسترى نۇرجان نۇرجىگىتوۆ.