قاراقۇرت قاپتاپ كەتتى

باياناۋىل ۇلتتىق پار­كىنىڭ عىلىمي قىز­مەتكەرلەرى تورايعىر كولىنىڭ سولتۇستىك-شىعىسىنداعى تاستاق جەرلەردەن قاراقۇرت جۇ­مىرتقالارىن تاپقانىن ما­لىمدەدى. دەمەك جاز ماۋسىمىندا قاۋىپتى جاندىكتىڭ قايتا شىعۋ ىقتيمالدىلىعى بار.

– تاستار اراسىندا ۋلى ور­مەكشىلەردىڭ جۇمىرتقالارى بارى انىقتالدى. جاندىكتەر قىستا تاستاردىڭ قۋىسىنا كىرىپ جان ساقتايدى دا, كۇن جىلىنا جەر بەتىنە شىعادى. ايرىقشا قورعالاتىن جەر بولعان سوڭ, پارك اۋماعىندا حيميالىق وڭدەۋگە رۇقسات جوق. جۇمىرتقالارىن قولمەن جيناپ, قۇتىعا سالىپ ورتەپ جىبەرەمىز. بىلتىر شامامەن 30 گا جەردە وسىنداي ءىس-شارالاردى اتقارعانبىز. الداعى اپتالاردا ماماندارىمىز جۇمىرتقالاردى جويۋعا قايتا كىرىسەدى. سونداي-اق تو­رايعىر اۋىلدىق وكرۋگىنىڭ اكىم­دىگىنە ەسكەرتۋ حات جىبەردىك. ولار وزدەرىنە تيەسىلى جەرلەردى وڭدەۋى كەرەك, – دەيدى ۇلتتىق پاركتىڭ عىلىم جانە مونيتورينگ ءبولى­مىنىڭ عىلىمي قىزمەتكەرى مۇرات جاسۇلان.

قاراقۇرت وسىمەن ۇلتتىق پاركتەن ءۇشىنشى جىل قاتارىنان تابىلىپ وتىر. قىزمەتكەرلەر 2023 جىلى 1593 جۇمىرتقا مەن قارا­قۇرتتىڭ 356 ۇرعاشىسىن جيناپ, جويسا, بىلتىر 523 جۇمىرت­قا مەن 124 ۇرعاشىسى ورتەلگەن.

باياناۋىل اۋدانىنىڭ اكىمى ارداق كىسەنتاەۆتىڭ ايتۋىنشا, تورايعىر اۋىلدىق وكرۋگىنە قاراستى جەرلەردىڭ ءبىراز بولىگى (ۇلتتىق پارككە تيەسىلى ەمەس جەرلەر) قاراقۇرتقا قارسى حي­ميالىق وڭدەۋدەن وتەدى.

– بۇل ماقساتقا بيۋدجەتتەن 1,8 ملن تەڭگە ءبولىنىپ, مەردىگەر تاڭدالىپ قويدى. وتكەن جىلى تامىز ايىندا قاراقۇرت قاپتاپ كەتۋىنە بايلانىستى توتەنشە جاعداي رەجىمىن جاريالاۋعا ءماجبۇر بولعانبىز. بيىل ەرتە قامداندىق. وڭدەۋ ءىس-شارا­لارىن ەكى رەت جۇرگىزۋ قاراس­تىرىل­عان. بىلتىر 150 گا جەر وڭدەلسە, بيىلعى شاما دا سودان كەم بولمايدى, – دەدى ا.كىسەنتاەۆ.

قاراقۇرت ادامعا وتە قاۋىپتى. دارىگەرلەر ەگەر قاراقۇرت شاعىپ السا, بىردەن مەديتسينالىق كو­مەككە جۇگىنگەن ابزال دەيدى. مەديتسينالىق كومەك كەلىپ جەتكەنشە قاراقۇرت شاققان جەر­دى 2-3 مينۋت كۇيدىرۋگە بولادى. ول جاندىكتىڭ ۋلى اسەرىن جويادى.

پاۆلودار وبلىسى,

باياناۋىل اۋدانى,

تورايعىر اۋىلى